ថ្មីៗនេះ ក្រុមហ៊ុនបច្ចេកវិទ្យាយក្ស Samsung របស់ប្រទេសកូរ៉េខាងត្បូងប្រកាសជាផ្លូវការថា ជំនួយការឆ្លាតវៃ AI របស់ខ្លួនមានឈ្មោះថា “Bixby” ហើយក្ខណៈសម្បត្តិលម្អិតរបស់ Bixby នឹងបង្ហាញឱ្យដឹងនៅថ្ងៃសម្ពោធស្មាតហ្វូនស៊េរីថ្មី Galaxy S8 និង Galaxy S8+ នៅថ្ងៃទី 29 ខែមីនាខាងមុខនេះ។ Bixby គឺជាមុខងារពិសេសមួយក្នុងចំណោមមុខងារធំៗជាច្រើននៅលើស្មាតហ្វូនត្រកូល Galaxy S8 ហើយក្រុមហ៊ុន Samsung រំពឹងក្នុងការនាំយកជំនួយការឆ្លាតវៃ Bixby នេះទៅកាន់ឧបករណ៍ទាំងអស់ដែលអាចភ្ជាប់ប្រព័ន្ធអ៊ីនធើណិតបាន:
“ការចាប់ផ្តើមជាមួយនឹងស្មាតហ្វូនជាច្រើនរបស់យើង ជំនួយការឆ្លាតវៃ Bixby នឹងដាក់ឱ្យដំណើរការទៅលើគ្រប់ឧបករណ៍ឆ្លាតវៃរបស់យើង។ នាពេលអនាគត លោកអ្នកអាចធ្វើការគ្រប់គ្រងម៉ាស៊ីនត្រជាក់ និងទូរទស្សន៍បានតាមរយៈ Bixby ។ ចាប់តាងពី Bixby បានប្រើប្រាស់នៅក្នុង Cloud នោះឧបករណ៍ដែលអាចភ្ជាប់ទៅកាន់ប្រព័ន្ធអ៊ីនធើណិតពិតជាអាចប្រើប្រាស់នូវជំនួយការជាសំឡេងនេះបានទាំងអស់ ហើយវាអាចភ្ជាប់ទំនាក់ទំនងជាមួយ Bixby បាន។ ខណៈពេលប្រព័ន្ធអេកូ Bixby រីកលូតលាស់ យើងជឿជាក់ថា Bixby អាចភ្ជាប់ទំនាក់ទំនងពីស្មាតហ្វូនទៅកាន់ផ្នែកជាច្រើននៃជីវិតរបស់អ្នក។”
យើងអាចនិយាយផ្សេងបានថា ក្រុមហ៊ុនបច្ចេកវិទ្យា Samsung ពិតជាចង់កែប្រែនូវផលិតផលប្រើប្រាស់នៅក្នុងផ្ទះក្នុងទសវត្សឆ្នាំ 90 ទៅជាការពិតមួយដ៏អស្ចារ្យ។ ជំនួយការឆ្លាតវៃ Bixby នឹងដាក់ដំណើរការមុនគេនៅលើស្មាតហ្វូនស៊េរីថ្មី ហើយក្រុមការងារអភិវឌ្ឍ Bixby កំពុងតែខិតខំប្រឹងប្រែងក្នុងការផ្តល់បទពិសោធន៍ AI សម្រាប់អ្នកប្រើប្រាស់ នេះបើយោងតាមព័ត៌មានដែលចែករំលែកនៅក្នុងសន្និសីទមួយ។
នៅក្នុងសេចក្តីថ្លែងការណ៍នេះ ជំនួយការឆ្លាតវៃ Bixby ប្រើប្រាស់នូវពាក្យបញ្ជានៅក្នុងចំនួនកំណត់ណាមួយ ហើយ Bixby អាចយល់សម្តីរបស់អ្នកប្រើប្រាស់ដែលសួរ ឬស្នើរទៅកាន់វាបើទោះបីជាព័ត៌មានមិនគ្រប់គ្រាន់ក៏ដោយ។ ក្រុមហ៊ុនបច្ចេកវិទ្យា Samsung និយាយថា Bixby នឹងជម្រុញឱ្យអ្នកប្រើប្រាស់ជាច្រើនផ្តល់ព័ត៌មានកាន់តែច្រើន ហើយវាអាចប្រតិបត្តិការងារនេះបានល្អប្រសើរជាងជំនួយការឆ្លាតវៃផ្សេងទៀតដែលបង្ហាញខ្លួននៅលើទីផ្សារនាពេលបច្ចុប្បន្ននេះ៕