ទូរស័ព្ទស៊េរីថ្មី iPhone 8 ត្រូវគេរំពឹងថា នឹងក្លាយជាឧបករណ៍បច្ចេកវិទ្យាមួយដ៏អស្ចារ្យបំផុតនៅក្រុមហ៊ុនបច្ចេកវិទ្យាយក្ស Apple សម្រាប់ប្រកួតប្រជែងប្រជែងជាមួយនឹងស្មាតហ្វូន Android ដែលកំពុងតែពេញនិយមនៅលើទីផ្សារ។ យោងទៅតាមរបាយការណ៍ថ្មីនេះ ការប្រើប្រាស់រន្ធដោត USB-C កំពុងមានការពេញនិយមយ៉ាងខ្លាំងនៅលើស្មាតហ្វូនត្រកូល Android ហើយក្រុមហ៊ុនបច្ចេកវិទ្យា Apple ប្រហែលជាប្រើប្រាស់នូវរន្ធដោត Lightning port និង USB-C សម្រាប់ទូរស័ព្ទ iPhone 8 ស៊េរីថ្មីរបស់ខ្លួនផងដែរ ។
អ្នកវិភាគ Christopher Rolland ប្រាប់គេហទំព័រ Phone Arena នៅថ្ងៃអង្គារនេះថា ទូរស័ព្ទ iPhone ស៊េរីឆ្នាំ 2017 នឹងប្រើប្រាស់នូវរន្ធដោត hybrid USB-C និង Lightning port ។ រន្ធ Connectors នេះ អាចប្រើប្រាស់បានសម្រាប់ Lightning និង USB-C chargers ។ ការប្រើប្រាស់នូវ USB-C នៅលើទូរស័ព្ទ iPhone មានន័យថា លោកអ្នកអាចបញ្ចូលថ្ម iPhone តាមរយៈឆ្នាំងសាក Android charger បានដូចគ្នា។
លោក Rolland ទម្លាយទៀតថា ក្រុមហ៊ុនបច្ចេកវិទ្យា Apple នឹងបង្ហាញទូរស័ព្ទ iPhone 2017 ចំនួន 3 ម៉ូដែលដែលប្រើប្រាស់ប្រព័ន្ធ wireless charging កម្រិតចម្ងាយឆ្ងាយ និងនាឡិកាឆ្លាតវៃ Apple Watch 3 ដែលទ្រទ្រង់ប្រព័ន្ធ LTE ផងដែរ។ ទូរស័ព្ទ iPhone 8 ត្រូវគេរំពឹងថាមានតម្លៃប្រហែលជា 1000 ដុល្លារខណៈពេលដែលទូរស័ព្ទ iPhone 7S ពីរម៉ូដែលផ្សេងទៀតមានតម្លៃទាបជាងនេះ។ កាលបរិច្ឆេទនៃការដាក់លក់ទូរស័ព្ទស៊េរីថ្មី និងនាឡិកាឆ្លាតវៃគឺនៅរដូវក្តៅឆ្នាំ 2017 នេះ។
ការប្រើប្រាស់ប្រព័ន្ធ wireless charging ចម្ងាយឆ្ងាយសម្រាប់ទូរស័ព្ទ iPhone 8 ត្រូវបានពាក្យចចាមអារ៉ាមជាច្រើនលើកឡើងជាយូរមកហើយ។ ការប្រើប្រាស់ប្រព័ន្ធ wireless charging នៅលើទូរស័ព្ទ iPhone 2017 ចំនួន 3 ស៊េរីនេះពិតជាអាចប្រកួតប្រជែងជាមួយនឹងស្មាតហ្វូន Galaxy S8 និង Galaxy S8+ ដែលនឹងប្រកាសសម្ភោធន៍ជាផ្លូវការនៅថ្ងៃនេះ។
ជាមួយគ្នានេះផងដែរ លោក Rolland រកឃើញទៀតថា នាឡិកាឆ្លាតវៃ Apple Watch 3 នឹងមានប្រភេទ SIM និង LTE Connectivity ។ Apple Watch 3 ប្រើប្រាស់បន្ទះឈីប CAT-M1 chipset ហើយវាភ្ជាប់ជាមួយប្រព័ន្ធ (VoIP) calls ថែមទៀត។ ទោះជាយ៉ាងណាក៏ដោយ ក្រុមហ៊ុនបច្ចេកវិទ្យា Apple នៅមិនទាន់បញ្ជាក់អំពីរឿងនេះនៅឡើយទេ៕
