ប៉ុន្មានថ្ងៃមុខនេះ យើងទទួលបានព័ត៌មានមួយទាក់ទងនឹងទូរស័ព្ទជំនាន់ថ្មី Mi6 របស់ក្រុមហ៊ុនផលិតស្មាតហ្វូនរបស់ចិន Xiaomi ដែលថាវានឹងបង្ហាញខ្លួននៅថ្ងៃណាមួយក្នុងខែមេសានេះ ដោយក្នុងនោះប្រភពក៏បានបង្ហាញពីប្រអប់ផ្នែកខាងក្រោយដែលអាចឲ្យយើងបានឃើញពីគុណសម្បត្តិមួយចំនួនរបស់វាផងដែរ។ ដោយឡែកសម្រាប់ថ្ងៃនេះវិញយើងបានទទួលព័ត៌មានថ្មីមួយពីនាយកប្រតិបត្តិក្រុមហ៊ុន Xiaomi លោក Lei Jun ផ្ទាល់តែម្តងដែលលោកបានប្រកាសបញ្ជាក់យ៉ាងច្បាស់ថា ក្នុងខែនេះយើងនឹងបានឃើញទូរស័ព្ទស៊េរីថ្មី Xiaomi Mi6 ការប្រកាសរបស់លោក Jun គឺធ្វើឡើងក្នុងកម្មវិធី Live Stream មួយ។
នាយកប្រតិបត្តិរូបនេះ មិនបានបញ្ជាក់ច្បាស់ពីកាលបរិច្ឆេទក្នុងការប្រកាសចេញនោះទេ ប៉ុន្តែមានរបាយការណ៍មួយបានបញ្ជាក់ថា Xiaomi Mi6 អាចប្រកាសចេញនៅថ្ងៃទី 11 ឬក៏ថ្ងៃទី 18 ក្នុងខែមេសានេះ។ គេមិនទាន់ដឹងថា ទូរស័ព្ទស្មាតហ្វូនស៊េរីថ្មីមួយនេះ មានគុណសម្បត្តិអ្វីខ្លះទេ ប៉ុន្តែបើតាមព័ត៌មានបែកធ្លាយកន្លងមកបានលើកឡើងថា Mi 6 អាចនឹងបំពាក់ប្រព័ន្ធកាមេរ៉ាភ្លោះទំហំ 30MP (2x15MP) ហើយមួយវិញទៀតគេរំពឹងថា Xiaomi អាចប្រកាសចេញម៉ូដែល Mi 6 Plus ដែលបំពាក់កញ្ចក់អេក្រង់ទំហំ 5.7” និងម៉ូដែល Mi6 ដែលមានទំហំអេក្រង់ 5.15”។
គួរបញ្ជាក់ផងដែរថា ទូរស័ព្ទស្មាតហ្វូនជំនាន់ថ្មី Mi6 របស់ក្រុមហ៊ុន Xiaomi ត្រូវបានស្ថាប័នវាយតម្លៃគុណភាព CCC របស់ចិនផ្តល់អាជ្ញាប័ណ្ឌផលិតរួចហើយ ហើយវាបានខិតជិតដល់ថ្ងៃដែល Xiaomi ប្រារព្ធព្រឹត្តិការណ៍ប្រកាសចេញជាផ្លូវការណ៍ផងដែរ ដូចនេះយើងនឹងរងចាំមើលថាតើ Xiaomi Mi6 នឹងមានចំនុចពិសេសអ្វីខ្លះសម្រាប់ផ្គាប់ចិត្តហ្វែនរបស់ខ្លួនដែរទៅ៕
