Samsung ដែលជាក្រុមហ៊ុនបច្ចេកវិទ្យាយក្សរបស់កូរ៉េខាងត្បូង ធ្វើឱ្យមានភាពរំជើបរំជួលសារជាថ្មី ជាមួយវត្តមានរបស់ស្មាតហ្វូនស៊េរីថ្មី Galaxy S8 និង Galaxy S8+ ដោយសារតែការរចនារូបរាងច្នៃប្រឌិតថ្មីដ៏ស្រស់ស្អាត ទាក់ទាញចិត្តអ្នកប្រើប្រាស់បំផុត។ នៅថ្ងៃនេះ ក្រុមហ៊ុន Samsung មានមោទនភាពជាមួយនឹងការរចនារូបរាង ប្រព័ន្ធជំនួយការឆ្លាតវៃ Bixby និងការពង្រឹងទៅលើលក្ខណៈសម្បត្តិជាច្រើនទៀត។
ស្មាតហ្វូនត្រកូល Galaxy S8 ស៊េរីថ្មីទាំងពីរម៉ូដែលនេះមានអេក្រង់កាន់តែធំ (ស៊ុមគែមព័ទ្ធអេក្រង់កាន់តែស្តើង) និងមានរូបរាងស្តើងស្រស់ស្អាត។ ក្រុមហ៊ុនបច្ចេកវិទ្យា Samsung ផ្លាស់ប្តូរពីការប្រើប្រាស់កម្រិត aspect ratio ស្តង់ដារ 16:9 នៅលើស្មាតហ្វូន Galaxy S8/S8+ ដើម្បីអាចពង្រីកអេក្រង់កាន់តែធំ និងស៊ុមគែមព័ទ្ធអេក្រង់ស្តើង។ អេក្រង់ថ្មីនេះមានឈ្មោះថា “Infinity Display” ដែលមានកម្រិត aspect ratio ដល់ទៅ 18.5:9 ដែលខ្ពស់ជាងស្តង់ដារ 16:9 ។ ក្រុមហ៊ុនបច្ចេកវិទ្យា LG ក៏ធ្វើរឿងស្រដៀងគ្នានេះដែរសម្រាប់ស្មាតហ្វូន LG G6 ប៉ុន្តែអេក្រង់របស់វាមានឈ្មោះថា “FullVision” ។
បច្ចេកវិទ្យាថ្មីនៃអេក្រង់ “Infinity Display” ពិតជាអស្ចារ្យមែនទែន នៅលើស្មាតហ្វូនស៊េរីថ្មី Galaxy S8/S8+ ។ លើសពីនេះទៀត ស្មាតហ្វូននេះ ដំណើរការលឿនដោយសារតែការពង្រឹងទៅលើប្រព័ន្ធដំណើរការរបស់វា ហើយបន្ថែមពីលើនេះ វាក៏បានប្រើប្រាស់នូវ S8-themed wallpaper និង icon collections ដ៏ស្រស់ស្អាតនៅលើប្រព័ន្ធប្រតិបត្តិការ Android ផងដែរ៕
