ថ្ងៃនេះគឺជាថ្ងៃដែលអតិថិជនគាំទ្រ និងក្រុមហ៊ុន Samsung មិនអាចរង់ចាំតទៅទៀតបាននោះទេ។ ថ្ងៃនេះគឺជាថ្ងៃដែលស្មាតហ្វូនស៊េរីថ្មី Samsung Galaxy S8 និង Galaxy S8+ ដាក់លក់ជាផ្លូវការ។ សម្រាប់អ្នកគាំទ្ររបស់ក្រុមហ៊ុនបច្ចេកវិទ្យា Samsung វាជាឱកាសមួយដែលលោកអ្នកអាចក្លាយជាម្ចាស់របស់ស្មាតហ្វូនដ៏ស្រស់ស្អាតទំនើបមួយនេះ។ សម្រាប់ក្រុមហ៊ុនបច្ចេកវិទ្យា Samsung វិញ វាគឺជាឱកាសក្នុងការសាងកេរ្តិ៍ឈ្មោះឡើងវិញបន្ទាប់ពីរឿងអាស្រូវរបស់ហ្វាប់ប្លេត Samsung Galaxy Note 7 កាលពីឆ្នាំមុន។ ក្រុមហ៊ុន Samsung ចង់បង្ហាញថា ខ្លួនអាចបង្កើតនូវស្មាតហ្វូនដែលពោរពេញដោយសមត្ថភាពខ្លាំងក្លាមិនមែនត្រឹមតែជាពិលនោះទេ។ ទីផ្សារចំនួន 4 បានទទួលស្មាតហ្វូន Galaxy S8 និង Galaxy S8+ ហើយនៅថ្ងៃនេះ។ ទីផ្សារទាំងនេះមានសហរដ្ឋអាមេរិច កាណាដា ប៉រទ័ររីកូ និងប្រទេសកូរ៉េ។ សម្រាប់ទីផ្សារជាច្រើនទៀតនឹងទទួលបានស្មាតហ្វូនស៊េរីថ្មីនេះនៅក្នុងរយៈពេលប៉ុន្មានសប្តាហ៍បន្ទាប់ទៀត។
ស្មាតហ្វូន Samsung Galaxy S8 ប្រើប្រាស់កញ្ចក់ការពារ Gorilla Glass 5 សម្រាប់អេក្រង់ 5.8 អ៊ីង Super AMOLED display ជាមួយនឹងកម្រិតភាពច្បាស់ 1440x2960 ។ សម្រាប់ default setting នៅលើអេក្រង់គឺ 1080x2220 (FHD) ។ អ្នកប្រើប្រាស់អាចកែប្រែកម្រិតភាពច្បាស់ (Resolution) កាន់តែធំបានប្រសិនបើពួកគេកំពូងតែប្រើប្រាស់ស្មាតហ្វូនរបស់ពួកគេសម្រាប់ VR ។ អាស្រ័យទៅតាមតំបន់នីមួយៗដែលស្មាតហ្វូននេះនឹងបំពាក់បន្ទះឈីប Snapdragon 835 ឬ Exynos 8895 SoC នៅខាងក្នុង។ បន្ទះឈីបទាំងពីរនេះប្រើប្រាស់នូវ CPU Octa-Core រ៉េមផ្ទុកទិន្នន័យបណ្តោះអាសន្នទំហំ 4GB និងម៉េមូរីក្នុងម៉ាស៊ីនទំហំ 64GB ។ សម្រាប់លោកអ្នកដែលចង់បន្ថែមម៉េមូរី វាមានរន្ធដោត microSD កាតទ្រទ្រង់បានទំហំ 256GB ។ កាមេរ៉ាខាងក្រោយរបស់ស្មាតហ្វូននេះមានទំហំ 12MP ភ្ជាប់ជាមួយនឹងមុខងារ aperture f/1.7 និង OIS ផងដែរ។ កាមេរ៉ាខាងមុខរបស់ស្មាតហ្វូននេះមានទំហំ 8MP សម្រាប់ថតរូប Selfie ក្នុងកម្រិត Wide angle ។
ប្រព័ន្ធស្កែនក្រយ៉ៅដៃ Fingerprint Scanner ស្ថិតនៅផ្នែកខាងក្រោយជាប់ជាមួយនឹងកាមេរ៉ា Lens ទំហំ 12MP។ ការដាក់ប្រព័ន្ធស្កែនក្រយ៉ៅដៃនៅកៀកទៅនឹងកាមេរ៉ាអាចធ្វើឱ្យស្នាមប្រឡាក់នៅលើកាមេរ៉ាផងដែរនៅពេលដែលពួកគេព្យាយាមស្កែនម្រាមដៃរបស់ពួកគេ។ ជំនួយការឆ្លាតវៃ AR assistant Bixby មានសមត្ថភាពក្នុងការជួយលោកអ្នកនូវកិច្ចការងារជាច្រើន។ ស្មាតហ្វូននេះបំពាក់នូវថាមពលថ្មទំហំ 3000mAh និងប្រើប្រាស់បច្ចេកវិទ្យា Quick Charge រួមជាមួយនឹងប្រព័ន្ធប្រតិបត្តិការ Android 7.0 ថែមទៀត។ ចំនែកស្មាតហ្វូន Galaxy S8+ វិញភ្ជាប់ជាមួយនឹងលក្ខណៈសម្បត្តិស្រដៀងគ្នាដែរគ្រាន់តែអេក្រង់របស់វាមានទំហំ 6.2 អ៊ីង ថាមពលថ្មទំហំ 3500mAh ។ ស្មាតហ្វូនទាំងពីរម៉ូដែលនេះអាចរកទិញបានហើយនៅទីផ្សារទាំង 4 នេះក្នុងថ្ងៃនេះ៕
