នៅក្នុងព្រឹត្តិការណ៍តាំងពិពរណ៍ CES ក្នុងខែមករាឆ្នាំនេះ ក្រុមហ៊ុននាឡិកា Casio ប្រកាសបង្ហាញស្មាតវ៉ចស៊េរីថ្មីចុងក្រោយបំផុត របស់ខ្លួនម៉ូដែល Pro Trek Smart WSD-F20 ។ នាឡិកាឆ្លាតវៃនេះ ជាជំនាន់បន្ទាប់ពីម៉ូដែល F10 ដែលបង្ហាញខ្លួនកាលពីឆ្នាំមុន។ ឥឡូវនេះ នាឡិកាស្មាតវ៉ចនេះដាក់លក់ជាផ្លូវការហើយ បន្ទាប់ពីការប្រកាសខ្លួនមានរយៈពេល 4 ខែកន្លងមក។ លោកអ្នកអាចរកទិញនាឡិកាស្មាតវ៉ចនេះបាននៅក្នុងតម្លៃ 500 ដុល្លារសហរដ្ឋអាមេរិចពីហាងលក់រាយជាច្រើនដូចជាក្រុមហ៊ុន Amazon ។ វាមានពីរពណ៌សម្រាប់ជ្រើសរើសគឺពណ៌ទឹកក្រូច និងពណ៌ខ្មៅ។
នាឡិកាស្មាតវ៉ច Casio F20 ដំណើរការប្រព័ន្ធប្រតិបត្តិការ Android Wear 2.0 ប្រព័ន្ធការពារការជ្រាបទឹក (Water Resistant) ជម្រៅដល់ទៅ 50 ម៉ែត្រ និងប្រើប្រាស់នូវ MIL-STD 810G ដែលផ្តល់នូវភាពធន់រឹងម៉ាំ។ រង្វង់មុខនាឡិកាមានទំហំ 1.32 អ៊ីងអេក្រង់ Touchscreen និងប្រើប្រាស់កញ្ចក់ពីរស្រទាប់គឺសម្រាប់ Monochrome Mode (ពន្លឺខ្លាំង) និង Color Mode (ពន្លឺទាប) ។
Pro Trek Smart WSD-F20 បំពាក់នូវប្រព័ន្ធសែនស័រជាច្រើនដូចជា GPS, Digital Compass, Altimeter និង Barometer ។ ស្មាតវ៉ចនេះដំណើរការរ៉េមផ្ទុកទិន្នន័យបណ្តោះអាសន្នទំហំ 512MB ម៉េមូរីក្នុងម៉ាស៊ីនទំហំ 4GB និងមានកម្រាស់ស្តើងជាងស្មាតវ៉ចជំនាន់មុនចំនួន 0.8 mm ៕
