នៅថ្ងៃនេះ ក្រុមហ៊ុនបច្ចេកវិទ្យាយក្ស Samsung Electronics បានបញ្ចេញនូវរបាយការណ៍នៃប្រាក់ចំណូលនៅក្នុងត្រីមាសទី 1 របស់ខ្លួនសម្រាប់ឆ្នាំ 2017 ហើយក្រុមហ៊ុនទទួលបានលទ្ធផលល្អ។ ក្រុមហ៊ុនមួយនេះ បានរកប្រាក់ចំណេញបានប្រហែល 8.7 ពាន់លានដុល្លារអាមេរិច នៅគ្រប់អាជីវកម្មទាំងអស់របស់ខ្លួន។ ទោះជាយ៉ាងណាក៏ដោយ ប្រាក់ចំណេញ ដែលបានមកអំពីអាជីវកម្មស្មាតហ្វូនរបស់ខ្លួនក៏ធ្លាក់ចុះផងដែរ បើធៀបជាមួយនឹងត្រីមាសទី 4 នៃឆ្នាំ 2016 បើទោះបីជាឆ្នាំនេះមានការកើនឡើងនៃការនាំចេញក៏ដោយ។
យើងអាចនិយាយបានថា ក្រុមហ៊ុនបច្ចេកវិទ្យា Samsung បានលក់ស្មាតហ្វូនបានច្រើន ប៉ុន្តែប្រាក់ចំណេញរបស់ខ្លួនគឺតិច។ អ្វីដែលគួរឱ្យចាប់អារម្មណ៍នោះ លទ្ធផលបែបនេះ គឺដោយសារតែអតិថិជនជាច្រើនកំពុងតែរង់ចាំស្មាតហ្វូនស៊េរីថ្មី Galaxy S8 ដែលទើបតែដាក់លក់កាលពីសប្តាហ៍មុននេះ។ ពេលនេះ ក្រុមហ៊ុន បានទម្លាក់តម្លៃរបស់ស្មាតហ្វូន Galaxy S7 ប៉ុន្តែការលក់ស្មាតហ្វូននេះ មានការធ្លាក់ចុះដោយសារតែអតិថិជនរង់ចាំប្រើប្រាស់ស្មាតហ្វូនជំនាន់បន្ទាប់គឺ Galaxy S8 ។ ទោះជាយ៉ាងណាក៏ដោយ ការលក់ស្មាតហ្វូនស៊េរីថ្មីនេះមានការកើនឡើងខ្លាំងដែលធ្វើឱ្យការដឹកជញ្ជូនស្មាតហ្វូននេះក៏កើនឡើងដូចគ្នា។
យ៉ាងណាមិញ ត្រីមាសទី 1 ឆ្នាំ 2017 នៅតែជាត្រីមាស ដែលល្អបំផុតលំដាប់ទី 2 របស់ក្រុមហ៊ុនដែលមិនធ្លាប់មានពីមុនមកនោះទេ នេះគឺដោយសារតែមានការកើនឡើងនៃការលក់ស្មាតហ្វូន និងនាយកដ្ឋាន Semiconductor និងអេក្រង់ Display ។ កាលពីពេលមុននេះ ក្រុមហ៊ុនព្យាករណ៍ថា ប្រាក់ចំណេញរបស់ខ្លួននឹងកើនឡើងដល់ 8.8 ពាន់លានដុល្លារអាមេរិច ហើយខ្លួនក៏សម្រេចបានកៀកនឹងការព្យាករណ៍នេះដែរ។
ក្រុមហ៊ុនបច្ចេកវិទ្យា Samsung banសន្យាទៀតថា ស្មាតហ្វូនស៊េរីថ្មីមួយគ្រឿងទៀត នឹងបង្ហាញខ្លួននៅក្នុងឆមាសទី 2 ក្នុងឆ្នាំ 2017 នេះ។ សម្រាប់អតិថិជនដែលមិនទាន់បានដឹង នេះគឺជានីតិវិធីស្តង់ដារដែលក្រុមហ៊ុនតែងតែប្រកាសបង្ហាញនូវស្មាតហ្វូនស៊េរីថ្មី Galaxy S របស់ខ្លួននៅក្នុងរដូវផ្ការីក និងហ្វាប់ប្លេត Galaxy Note នៅក្នុងរដូវស្លឹកឈើជ្រុះ។ ពាក្យចចាមអារ៉ាមជាច្រើនទៀតបង្ហាញថា ហ្វាប់ប្លេត Galaxy Note 8 គឺជារឿងពិត ហើយវា នឹងបង្ហាញខ្លួននៅក្នុងរយៈពេលប៉ុន្មានខែខាងមុខទៀត៕