មានពាក្យចចាមអារ៉ាមជាច្រើន បាននិយាយអំពីការរចនារូបរាងថ្មីរបស់ទូរស័ព្ទ iPhone ស៊េរីថ្មីរបស់ក្រុមហ៊ុន Apple ដែលត្រូវបានគេរំពឹងថា នឹងបង្ហាញខ្លួននៅក្នុងខួបអនុស្សាវរីយ៍លើកទី 10 របស់ខ្លួន ដោយគ្រោងនឹងបង្ហាញខ្លួននៅក្នុងឆ្នាំនេះ គឺទូរស័ព្ទ iPhone 8។ ការរំពឹងទុកជាច្រើនផ្តោតទៅលើអេក្រង់ Full-Screen ស៊ុមព័ទ្ធអេក្រង់ស្តើង (Bezel-Less) ដែលលោកអ្នកធ្លាប់ឃើញរូបរាងនៃការរចនាររបស់វារួចមកហើយនៅក្នុងខែមីនា។ ថ្មីៗនេះ ក្រុមហ៊ុន Meizu ក៏មានគម្រោងក្នុងការបញ្ចេញស្មាតហ្វូនស៊េរីថ្មី ដែលមានស៊ុមព័ទ្ធអេក្រង់ស្តើងរបស់ខ្លួនផងដែរ ប៉ុន្តែពាក្យចចាមអារ៉ាមជាច្រើនចុងក្រោយបំផុត បានបញ្ជាក់ថា ស្មាតហ្វូននេះនៅមិនទាន់បង្ហាញខ្លួនក្នុងឆ្នាំនេះទេ ប្រហែលជាបង្ហាញខ្លួនក្នុងឆ្នាំ 2018 ។
លោក Jack Wong អគ្គនាយករបស់ក្រុមហ៊ុន Meizu បានបង្ហើបកាលពីពេលថ្មីៗនេះថា ក្រុមហ៊ុន មានគម្រោងជាច្រើនក្នុងការបញ្ចេញស្មាតហ្វូនស៊េរីថ្មីរបស់ខ្លួន ប៉ុន្តែក្រុមហ៊ុនមានចំណុចអាទិភាពដទៃទៀតក្នុងឆ្នាំ 2017 នេះ ខណៈពេលដែលក្រុមហ៊ុនកំពុងតែរៀបចំដំណើរការនៃការរៀបចំរចនាសម្ព័ន្ធសារឡើងវិញ។ ក្នុងឆ្នាំ 2018 ក្រុមហ៊ុនបច្ចេកវិទ្យា Meizu នឹងប្រារព្ធខួបលើកទី 15 របស់ខ្លួនដែលត្រូវគេរំពឹងថានឹងបញ្ចេញស្មាតហ្វូនស៊េរីថ្មីដែលមានអេក្រង់ Cutting-Edge ស៊ុមព័ទ្ធអេក្រង់ស្តើងដែលដូចអ្វីដែលលោកអ្នកធ្លាប់បានឃើញ និងលឺអំពីស្មាតហ្វូនរបស់ក្រុមហ៊ុន Apple និង Samsung ។
យោងទៅតាមប្រភពពី GizmoChina ស្មាតហ្វូនស៊េរីថ្មីរបស់ក្រុមហ៊ុនបច្ចេកវិទ្យា Meizu នឹងប្រើប្រាស់បន្ទះឈីប Qualcomm flagship chip ហើយវានឹងមានតម្លៃប្រហែលជា 400 យ័ន (ប្រហែល 580 ដុល្លារអាមេរិច) ។ ពាក្យចចាមអារ៉ាមកាលពីមុននេះបញ្ជាក់ថា ស្មាតហ្វូន Meizu ស៊េរីថ្មីនេះនឹងមានអេក្រង់ Full-Screen ដែលមានកម្រិតមិនចាញ់អេក្រង់ស្មាតហ្វូន Mi Mix របស់ក្រុមហ៊ុន Xiaomi នោះទេ។ ស្មាតហ្វូនស៊េរីថ្មីរបស់ក្រុមហ៊ុន Meizu នឹងមានតួខ្លួនស៊េរ៉ាមិកមិនមែនជាលោហធាតុនោះទេ។ ដូចអ្វីដែលយើងបញ្ជាក់ហើយ នេះគ្រាន់តែជាពាក្យចចាមអារ៉ាមតែប៉ុណ្ណោះ។ យើងត្រូវរង់ចាំរហូតទាល់តែមានការបញ្ជាក់ជាផ្លូវការពីក្រុមហ៊ុន Meizu៕