HTC U11 គឺជាស្មាតហ្វូនស៊េរីថ្មីជំនាន់បន្ទាប់របស់ស្មាតហ្វូន HTC 10 ដែលទើបតែប្រកាសបង្ហាញខ្លួនជាផ្លូវការ។ ស្មាតហ្វូនស៊េរីថ្មីនេះ មានអេក្រង់ទំហំ 5.5 អ៊ីងដំណើរការដោយប្រព័ន្ធប្រតិបត្តិការ Android ភ្ជាប់ជាមួយនឹងជំនួយការឆ្លាតវៃ Alexa របស់ក្រុមហ៊ុន Amazon ព័ទ្ធដោយលោហធាតុពីក្រៅដ៏រលើបរលោង និងមានកាមេរ៉ាដែលទទួលបានពិន្ទុ 90 ពី DxOMark។
ការរចនារូបរាង
ក្រុមហ៊ុនបច្ចេកវិទ្យា HTC ប្រកាសសម្ពោធស្មាតហ្វូនស៊េរីថ្មីឆ្នាំ 2017 របស់ខ្លួននៅក្នុងអំឡុងព្រឹត្តិការណ៍ដ៏ពិសេសមួយនៅក្នុងទីក្រុងតៃប៉ិ កោះតៃវ៉ាន់។ ស្មាតហ្វូន HTC U11 ភ្ជាប់ជាមួយអេក្រង់ទំហំ 5.5 អ៊ីងកម្រិតភាពច្បាស់ Quad HD Super LCD 5 display និងកញ្ចក់ Gorilla Glass 5 ។ រូបរាងរបស់ស្មាតហ្វូននេះ រលើបរលោងធ្វើពីកញ្ចក់ដែលជាការសម្រិតសម្រាំងបន្តពីស្មាតហ្វូន HTC U Ultra និង HTC U Play ។ ដូចទៅនឹងកញ្ចក់ផ្នែកខាងមុខដែរ កញ្ចក់ផ្នែកខាងក្រោយក៏ជាប្រភេទ Gorilla Glass 5 ហើយវាមាន 5 ពណ៌សម្រាប់ជ្រើសរើសផងដែរគឺពណ៌ខៀវ ពណ៌ទឹកសមុទ្រ ពណ៌ខ្មៅ ពណ៌ក្រហម និងពណ៌ស។ ដូចគ្នាទៅនឹងស្មាតហ្វូន High-End ដែរ ស្មាតហ្វូន HTC U11 បំពាក់ជាមួយនឹងមុខងារ IP67 សម្រាប់ការពារការជ្រាបទឹក និងធូលីដូចគ្នាទៅនឹងទូរស័ព្ទ iPhone 7 និង iPhone 7 Plus របស់ក្រុមហ៊ុន Apple ។ វាមានន័យថា ស្មាតហ្វូនស៊េរីថ្មីឆ្នាំ 2017 នេះអាចដំណើរការបានធម្មតានៅក្រោមជម្រៅទឹក 1 ម៉ែត្ររយៈពេល 30 នាទី។
សមត្ថភាពខ្លាំងក្លា
ស្មាតហ្វូន HTC U11 ដំណើរការដោយបន្ទះឈីប Snapdragon 835 របស់ក្រុមហ៊ុន Qualcomm ដូចគ្នាទៅនឹងស្មាតហ្វូន Galaxy S8 និង Galaxy S8+ ដែរ។ ស្មាតហ្វូននេះដំណើរការជាមួយរ៉េមផ្ទុកទិន្នន័យបណ្តោះអាសន្នទំហំ 4GB ម៉ូមេរីក្នុងម៉ាស៊ីនទំហំ 64GB ដែលអាចប្រើប្រាស់ microSD ទំហំបានដល់ទៅ 2TB ។ សម្រាប់តំបន់មួយចំនួន ស្មាតហ្វូននេះនឹងមានទំហំ 6GB RAM/128GB ស៊ីមពីរផងដែរ។ ស្មាតហ្វូននេះបំពាក់ថ្មថាមពល 3000mAh និងទ្រទ្រង់មុខងារ QuickCharge 3.0 ផងដែរ។
ប្រព័ន្ធកាមេរ៉ា
ស្មាតហ្វូន HTC U11 ភ្ជាប់ជាមួយនឹងកាមេរ៉ាខាងក្រោយទំហំ 12MP ដែលទទួលបានពិន្ទុ 90 ពី DxOMark ដែលជាពិន្ទុខ្ពស់បំផុតមិនធ្លាប់មានពីមុនមកហើយវាយកឈ្នះពិន្ទុរបស់ Google Pixel ដែលមានពិន្ទុ 89 ។ កាមេរ៉ាទំហំ 12MP ភ្ជាប់ជាមួយនឹងមុខងារ f/1.7 aperture lens ដែលអាចថតរូបភាពបានកាន់តែប្រសើរនៅកន្លែងដែលងងឹត។ អ្វីកាន់តែពិសេសជាងនេះទៀត លោកអ្នកអាចប្រើប្រាស់ HTC U11 ថតរូបភាពជាប្រភេទ RAW Format បានផងដែរ។ កាមេរ៉ានេះអាចថតរូបភាពត្រឹមកម្រិត1080p ប៉ុណ្ណោះ វាមិនអាចថតក្នុងទម្រង់ 4K បាននោះទេ។ កាមេរ៉ាខាងមុខរបស់ស្មាតហ្វូននេះមានទំហំ 15MP ដែលអាចថតកម្រិត 150 ដឺក្រេជាប្រភេទ Wide-Angle Lens ។ ជាពិសេស វាអាចថតរូបភាព Selfie Panoramas បានផងដែរ។
ជំនួយការឆ្លាតវៃ Google Assistant និង Alexa
ស្មាតហ្វូន HTC U11 ដំណើរការប្រព័ន្ធប្រតិបត្តិការ Android 7.1.1 Nougat ជាមួយនឹង HTC’s Sense 9 UI នៅពីលើ។ ចាប់តាំងពីការប្រើប្រាស់ប្រព័ន្ធជំនួយជាសំឡេងទទួលបានការពេញនិយមខ្លាំង ស្មាតហ្វូននេះក៏ភ្ជាប់ជាមួយនឹងជំនួយការឆ្លាតវៃ Google Assistant ផងដែរ។ បន្ថែមពីនេះទៀត ក្រុមហ៊ុន HTC ក៏បន្ថែមនូវជំនួយការឆ្លាតវៃ Alexa របស់ក្រុមហ៊ុន Amazon នៅលើស្មាតហ្វូន HTC U11 នេះផងដែរ។ នៅខណៈពេលនេះ ស្មាតហ្វូន HTC U11 អាចទ្រទ្រង់ដំណើរការជំនួយការឆ្លាតវៃ Google Assistant តែប៉ុណ្ណោះ។ សម្រាប់ Alexa របស់ក្រុមហ៊ុន Amazon នឹងដំណើរការនៅលើស្មាតហ្វូននេះចាប់ពីចុងខែកក្កដានេះតទៅបន្ទាប់ពីការ Update ទៅលើ Software នេះបើតាមការបញ្ជាក់របស់ Android Central ។
រន្ធដោត Headphone Jack លែងមានទៀតហើយ
ដូចគ្នាទៅនឹងស្មាតហ្វូន HTC Bolt និង U Ultra ស្មាតហ្វូន HTC U11 មិនមានរន្ធដោតកាសស្តាប់ 3.5mm headphone jack នោះទេ។ ជំនួសមកវិញ ស្មាតហ្វូននេះភ្ជាប់មកជាមួយនឹងរន្ធដោត USB-C តែមួយប៉ុណ្ណោះសម្រាប់សាកថ្ម ការបញ្ជូនទិន្នន័យ និងការស្តាប់កាស។ ស្មាតហ្វូន HTC U11 នឹងភ្ជាប់ជាមួយនឹងខ្សែ DAC Adapter មួយទៀតសម្រាប់អោយអ្នកប្រើប្រាស់អាចស្តាប់កាស 3.5mm headphone jack បាន។
កាលបរិច្ឆេទនៃការលក់ និងតម្លៃ
ស្មាតហ្វូន HTC U11 នឹងដាក់លក់ក្នុងទីផ្សារអាស៊ីនៅថ្ងៃទី 18 ខែឧសភាខាងមុខនេះ ហើយវា នឹងទៅដល់ទឹកដីសហរដ្ឋអាមេរិចនៅក្នុងខែមិថុនាខាងមុខនេះ។ ស្មាតហ្វូននេះ ដាក់លក់នៅក្នុងតម្លៃ 649 ដុល្លារអាមេរិច ហើយលោកអ្នកអាច ទិញបានពីគេហទំព័ររបស់ក្រុមហ៊ុន HTC ។ ស្មាតហ្វូន HTC U11 ពណ៌ខៀវ និងពណ៌ខ្មៅនឹងដាក់លក់នៅលើក្រុមហ៊ុន Sprint នៅថ្ងៃទី 9 ខែមិថុនា ហើយសម្រាប់អតិថិជនដែលកម្មង់ទិញមុន (Pre-order) ស្មាតហ្វូននេះ នឹងទទួលបាន Amazon Echo Dot speakers ផងដែរ៕