កាលពីថ្ងៃទី 12 ខែឧសភានេះ តុលាការកំពូលក្នុងទីក្រុង Dallas បានទទួលពាក្យបណ្តឹងពីក្រុមហ៊ុន ZeniMax Media ដែលបានអះអាងថា ក្រុមហ៊ុន Samsung ល្មើសច្បាប់ក្នុងការប្រើប្រាស់នូវប៉ាតង់របស់បច្ចេកវិទ្យា VR ពីមុន ទៅលើឧបករណ៍ Gear VR Headsets ស៊េរីថ្មីរបស់ខ្លួន។ នេះគឺជាពាក្យបណ្តឹងដំបូងបំផុតមកទល់ពេលនេះ បន្ទាប់ពី Samsung ជោគជ័យជាមួយនឹងការលក់ Gear VR នាពេលថ្មីៗនេះ ប៉ុន្តែបើសិនជាពិតមែន វានិងអាចធ្វើឱ្យខូចខាតទឹកប្រាក់រាប់លានដុល្លារអាមេរិច។ ពាក្យបណ្តឹងនេះ បានចោទប្រកាន់ថា ក្រុមហ៊ុន Samsung ជាអ្នកដែលទទួលបាននូវផលប្រយោជន៍យ៉ាងច្រើនពីគំនិតនៃ VR របស់ក្រុមហ៊ុន ZeniMax Media ។
នៅក្នុងពាក្យបណ្តឹងនេះ គឺមានជម្លោះរវាងក្រុមហ៊ុន ZeniMax Media ជាមួយនឹង Oculus VR កាលពីឆ្នាំ 2012 ដែលតុលាការ បានវិនិច្ឆ័យអោយក្រុមហ៊ុន Oculus បង់ប្រាក់ចំនួន 500 លានដុល្លារទៅកាន់ក្រុមហ៊ុន Zeni ទៅលើការរំលោភប៉ាតង់ VR។ ក្រុមហ៊ុនេះបានបញ្ជាក់ថា ក្រុមហ៊ុន Samsung គួរតែដឹងច្បាស់អំពីជម្លោះជាមួយនឹងក្រុមហ៊ុន Oculus និងក្រុមហ៊ុន Zeni ។ ឧបករណ៍ Gear VR ត្រូវបានផលិតឡើងដោយក្រុមហ៊ុន Oculus ដែលមានន័យថា វាអាចជាកម្មសិទ្ធិបញ្ញារបស់ក្រុមហ៊ុន ZeniMax ផងដែរ ក្រោយពេលដែលក្រុមហ៊ុន Oculus ក៏បានកេងបន្លំទៅលើប៉ាតង់។ ដើមបណ្តឹង បានចោទប្រកាន់ថា ក្រុមហ៊ុន Samsung បានទទួលផលប្រយោជន៍យ៉ាងច្រើនពីបច្ចេកវិទ្យា VR ដែលកេងបន្លំ មិនស្របច្បាប់ពីក្រុមហ៊ុន Zeni ហើយវាគឺជាស្នាដៃរបស់លោក Palmer Luckey អគ្គនាយកក្រុមហ៊ុន Oculus VR និងលោក John Carmack នាយកគ្រប់គ្រងបច្ចេកទេស និង Software ។
រហូតមកដល់ពេលនេះ ក្រុមហ៊ុន ZeniMax Media កំពុងតែតវ៉ាប្រឆាំងជាមួយនឹងក្រុមហ៊ុន Samsung អោយបញ្ឈប់អោយលក់ឧបករណ៍ Gear VR headsets សិន រង់ចាំទាល់តែតុលាការសម្រេចរឿងនេះ។ បន្ថែមពីនេះទៀត ពាក្យបណ្តឹងនេះ ក៏ទាមទារអោយក្រុមហ៊ុន Samsung បង់ប្រាក់ខាតបង់ និងការរំលោភទៅលើប៉ាតង់នេះផងដែរ។ យ៉ាងណាមិញ ដំណើរការនៃពាក្យបណ្តឹងនេះ គឺស្ថិតនៅក្នុងការចាប់ផ្តើមនៅឡើយទេ។ ហើយក្រុមហ៊ុន Samsung នៅតែបន្តលក់ផលិតផល Gear VR headsets របស់ខ្លូនដោយមិនបានខ្វល់ពីបញ្ហានេះឡើយ។
