រូបភាព Renders បង្ហាញអំពីគំនិតថ្មីៗ ជាច្រើននៃការរចនាទៅលើរូបរាងរបស់ស្មាតហ្វូនស៊េរីថ្មី Nokia 9 ត្រូវបានគេប្រទះឃើញនៅលើអនឡាញកាលពីថ្ងៃសុក្រកន្លងទៅនេះ ហើយវាក៏មានការបង្ហោះនៅក្នុងវីដេអូខ្លីមួយនៅលើបណ្តាញ YouTube ផងដែរ។ វីដេអូនេះ បង្ហាញអំពីស្មាតហ្វូនស៊េរីថ្មីរបស់ក្រុមហ៊ុន Nokia ដែលមានការរចនាផ្អែកទៅលើព័ត៌មានបែកធ្លាយ និងរបាយការណ៍ជាច្រើនអំពីវា។ អ្វីដែលគួរអោយចាប់អារម្មណ៍ទៀតនោះ នៅក្នុងវីដេអូនេះ ក៏បង្ហាញអំពីប្រព័ន្ធកាមេរ៉ាភ្លោះបញ្ឈរដែលមានអំពូលភ្លើង LED ចំនួនពីរគ្រាប់ស្ថិតនៅពីក្រោមសែនស័រសម្រាប់វាស់ចង្វាក់បេះដូង។
នៅក្នុងរូបភាព Renders ជាច្រើនសន្លឹកនេះ គេអាចមើលឃើញថា វាមិនមានប្រព័ន្ធស្កែនក្រយ៉ៅដៃស្ថិតនៅផ្នែកខាងក្រោយរបស់ស្មាតហ្វូននេះនោះទេ ដូចនេះ ស្មាតហ្វូននេះ ពិតជាភ្ជាប់ជាមួយនឹងប៊ូតុង Home Key ជាក់ជាមិនខាន។ ប៉ុន្តែរបាយការណ៍មួយចំនួនទៀទ បានបញ្ជាក់ថា ស្មាតហ្វូនស៊េរីថ្មី Nokia 9 នឹងមិនប្រើប្រាស់នូវប៊ូតុង Home Key នោះទេ ហើយក្រុមហ៊ុនប្រហែលជាបំពាក់នូវប្រព័ន្ធស្កែនក្រយ៉ៅដៃបង្កប់ក្រោមអេក្រង់តែម្តង។ ស្មាតហ្វូនស៊េរីថ្មីចុងក្រោយរបស់ក្រុមហ៊ុន HMD Global នេះ នឹងបំពាក់នូវបន្ទឈីប Snapdragon 835 ជំនាន់ចុងក្រោយបំផុតភ្ជាប់ជាមួយក្រាហ្វិកកាត Adreno 540 GPU ពិសេសគឺអង្គគណនា Kyro cores ចំនួន 8 គ្រាប់ដែលមានល្បឿន 2.35GHz ។
យោងតាមរបាយការណ៍ជាច្រើនថ្មីៗនេះ បានបង្ហាញថា ក្រុមហ៊ុន HMD ប្រហែលជាអាចបោះបង់ចោលការប្រើប្រាស់រ៉េមទំហំ 4GB ដោយ បានជំនួសមកវិញនូវរ៉េមទំហំ 6GB ឬ 8GB ដែលអាចជាកត្តាធ្វើអោយស្មាតហ្វូននេះ កាន់តែមានតម្លៃថ្លៃជាងមុនថែមទៀត។ ស្មាតហ្វូនស៊េរីថ្មី Nokia 9 ត្រូវគេរំពឹងថានឹងបង្ហាញខ្លួនជាផ្លូវការនៅចុងរដូវក្តៅនេះ ហើយអតិថិជនអាចទិញប្រើប្រាស់បានយ៉ាងយូរបំផុតនៅក្នុងខែកញ្ញា នេះបើតាមការបញ្ជាក់របស់អង្គការឃ្លាំមើលឧស្សាហកម្មនេះ។ សម្រាប់ព័ត៌មានលម្អិតរបស់ស្មាតហ្វូនស៊េរីថ្មីនេះអាចនឹងបង្ហាញវត្តមានជាផ្លូវការឆាប់ៗនេះ៕
