មុនពេលដែលមានការប្រកាសវត្តមានរបស់ស្មាតហ្វូនស៊េរីថ្មី Galaxy S8/S8+ វាមានការបែកធ្លាយ និងព័ត៌មានជាច្រើនអំពីស្មាតហ្វូនស៊េរីថ្មី និងឧបករណ៍បច្ចេកវិទ្យាជាច្រើនទៀតរបស់ក្រុមហ៊ុន Samsung ។ ប៉ុន្តែអ្វីដែលកាន់តែអស្ចារ្យជាងនេះទៀតនោះ ហើយក៏ជាអ្វីដែលលោកអ្នកមិនធ្លាប់បាននឹកស្មានដល់ផងដែរគឺវីដេអូផ្សព្វផ្សាយពាណិជ្ជកម្មរបស់សត្វស្លាប Ostrich ។ ប្រសិនបើលោកអ្នកមិនធ្លាប់បានទស្សនាវីដេអូនេះនៅឡើយទេនោះ លោកអ្នកអាចទស្សនាវីដេអូនេះជាមុនសិន វាពិតជាទាក់ទាញខ្លាំងមែនទែន។
ជាក់ស្តែង វីដេអូផ្សព្វផ្សាយពាណិជ្ជកម្មមួយនេះទទួលបានការចាប់អារម្មណ៍ខ្លាំង ហើយថែមទាំងឈ្នះពានរង្វាន់ចំនួន 7 នៅក្នុងព្រឹត្តិការណ៍ Cannes Lions International Festival of Creativity ដែលជាព្រឹត្តិការណ៍ធំបំផុតនៅក្នុងឧស្សាហកម្មផ្សព្វផ្សាយពាណិជ្ជកម្ម។ ការផ្សាយពាណិជ្ជកម្មនេះឈ្នះពានរង្វាន់មាសចំនួន 3 ទៅលើផ្នែក visual impact, animation និង direction categories រួមទាំងពានរង្វាន់ប្រាក់ 2 និងពានរង្វាន់សំរឹទ្ធិ 2 ផងដែរ។
នៅក្នុងវីដេអូផ្សព្វផ្សាយពាណិជ្ជកម្មថ្មីនេះផ្តោតសំខាន់ទៅលើឧបករណ៍ Samsung Gear VR ជាជាងការផ្តោតទៅលើស្មាតហ្វូនស៊េរីថ្មី Samsung Galaxy S8 ដែលបង្ហាញអំពីសត្វស្លាប Ostrich ដែលជឿថា ខ្លួនអាចហោះ បានតាមរយៈការផ្តល់ភាពជឿជាក់ពីឧបករណ៍ VR headset របស់ក្រុមហ៊ុន Samsung ។ នៅក្នុងសារចុងក្រោយរបស់ក្រុមហ៊ុន Samsung គឺ “do what you can’t” មានន័យថា “ធ្វើនូវអ្វីដែលអ្នកមិនអាចធ្វើបាន” គឺជាឃ្លាមួយដែលជម្រុញនូវភាពជឿជាក់ខ្លាំងមែនទែន៕