ក្រុមហ៊ុន Samsung Electronics ប្រហែលជានៅមិនទាន់អាចដំណើរការប្រព័ន្ធ AI Speaker នៅក្នុងពេលណាមួយឆាប់ៗនេះទេ ដោយសារតែវាមានបញ្ហាជាច្រើននៅលើទីផ្សារ នេះបើតាមការបញ្ជាក់អំពីប្រភពនៃបញ្ហាផ្ទាល់តែម្តង។ វាមានការព្យាករណ៍កាន់តែច្រើនថា ក្រុមហ៊ុន Samsung អាចនឹងដកចេញនូវការប្រើប្រាស់ AI Speaker នេះបើយោងតាមរបាយការណ៍ជាច្រើននៃការអភិវឌ្ឍបន្ទាប់ពីជំនួយការឆ្លាតវៃ Bixby។ គម្រោងមួយនេះមានឈ្មោះថា Vega ត្រូវគេរាយការណ៍ថាដំណើរការមានរយៈពេលច្រើនជាងមួយឆ្នាំហើយ។ ប្រភពព័ត៌មានអនាមិកមួយប្រាប់ទៅកាន់ The Korea Herald ថា “ថ្មីៗនេះ ក្រុមហ៊ុន Samsung នឹងមិនទាន់ដាក់ដំណើរការនូវ AI Speakers នៅលើទីផ្សារនោះទេ ខណៈពេលដែលទីផ្សារពិភពលោកកំពុងតែប្រើប្រាស់នូវផលិតផលរបស់ក្រុមហ៊ុន Amazon ហើយទីផ្សារនៅក្នុងប្រទេសកូរ៉េគឺនៅតូចនៅឡើយ។
ទីផ្សាររបស់ AI Speaker កំពុងតែគ្របដណ្តប់ដោយការប្រើប្រាស់ Amazon Echo ដែលមានចំនួនច្រើនជាង 70% ។ ឥឡូវនេះ វាក៏មានវត្តមានរបស់ Google Home ថែមទៀត។ ទីផ្សារនៅក្នុងប្រទេសកូរ៉េខាងត្បូង គឺគ្រប់គ្រងដោយ SK Telecom’s NUGU ដែលមានការលក់ត្រឹមតែ 100000 គ្រឿងប៉ុណ្ណោះ។ ប្រភពនេះ បានបញ្ជាក់ទៀតថា អ្វីដែលសំខាន់នោះ ក្រុមហ៊ុន Samsung មិនមានលទ្ធភាពផ្តោតទៅលើទីផ្សរមិនប្រាកដប្រជានោះទេសម្រាប់ AI Speakers ដែលមានចំនួនតិចជាងការលក់ឧបករណ៍ AI Speakers នៅក្នុងសហរដ្ឋអាមេរិច។ AI Speakers របស់ក្រុមហ៊ុន Samsung នឹងត្រូវអភិវឌ្ឍន៍ក្រោមការដំណើរការនៃប្រព័ន្ធ Bixby។ គម្រោងនៃការដំណើរការឧបករណ៍បច្ចេកវិទ្យាថ្មីភ្ជាប់ជាមួយ Bixby ក្នុងការសន្ទនាជាភាសាអង់គ្លេសក៏ត្រូវពន្យារពេលដោយសារតែបញ្ហាបច្ចេកទេស និងបញ្ហាទៅលើទិន្នន័យជាច្រើន។
ប្រភពដដែលនេះបន្តទៀតថាបើទោះបីជាក្រុមហ៊ុនកូរ៉េខាងត្បូងនេះនៅមិនទាន់ប្រកាសបង្ហាញ AI Speakers នៅក្នុងពេលណាមួយឆាប់ៗនេះក្តី ក្រុមហ៊ុនក៏ត្រៀមការតេស្តទៅលើ AI Speakers នេះតាមរយៈបច្ចេកវិទ្យាថ្មីជាច្រើនសម្រាប់ប្រើប្រាស់ជាមួយនឹងឧបករណ៍ប្រើប្រាស់ក្នុងផ្ទះដូចជាទូរទឹកកកឆ្លាតវៃជាដើម។ លោក Kim Jong-ki អ្នកជំនាញផ្នែកស្រាវជ្រាវនៅក្នុងឧស្សាហកម្មទូរស័ព្ទនៅក្នុងវិទ្យាស្ថាននៃប្រទេសកូរ៉េផ្នែកសេដ្ឋកិច្ចឧស្សាហកម្ម និងពាណិជ្ជកម្មនិយាយថា ក្រុមហ៊ុនបច្ចេកវិទ្យា Samsung ប្រហែលជាកំពុងរង់ចាំ និងមើលស្ថានភាពជាមុនសិនជាជាងការលោតផ្លោះចូលទៅក្នុងទីផ្សារមិនប្រាកដប្រជាជាមួយនឹងវត្តមានរបស់ឧបករណ៍ថ្មីរបស់ខ្លួនដែលមិនមុខងារមិនខុសប្លែកពីក្រុមហ៊ុនប្រកួតប្រជែងនោះ។
AI Speaker គឺជាឧបករណ៍ឆ្លាតវៃដែលអនុញ្ញាតអោយអ្នកប្រើប្រាស់ធ្វើការគ្រប់គ្រងឧបករណ៍នេះតាមរយៈសំឡេងដើម្បីចាក់តន្រ្តី ឬផ្តល់ព័ត៌មាន។ ចាប់តាំងពីក្រុមហ៊ុន Amazon ដាក់លក់ Amazon Echo នៅក្នុងឆ្នាំ 2014 ក្រុមហ៊ុនបច្ចេកវិទ្យាធំៗជាច្រើន នៅលើពិភពលោកចាប់ផ្តើមដើរតាមក្រុមហ៊ុនមួយនេះ។ ក្រុមហ៊ុន Google ចាប់ផ្តើមប្រឡូកក្នុងទីផ្សារជាមួយនឹងវត្តមានរបស់ Google Echo កាលពីចុងឆ្នាំមុននេះ ខណៈពេលក្រុមហ៊ុន Apple និងក្រុមហ៊ុន Microsoft មានគម្រោងក្នុងប្រកួតប្រជែងទីផ្សារតាមរយៈ HomePod និង Invoke នៅក្នុងឆ្នាំនេះផងដែរ៕