រហូតមកដល់ពេលនេះ ក្រុមហ៊ុន Apple បានអះអាងនៅលើគេហទំព័រជាភាសាចិនរបស់ខ្លួនកាលពីថ្ងៃសុក្រនេះ អំពីទូរស័ព្ទ iPhone ដែលបិទរលត់ម៉ាស៊ីនហើយ វាមិនអាចជផ្ទុះនោះទេ ការធ្វើបែបនេះ គឺដើម្បីការពារពីការខូចខាតទៅលើផ្នែករឹងដោយសារតែកម្រិតតង់ស្យុងទាប។ កាលពីថ្ងៃអង្គារ អង្គការឃ្លាំមើលអតិថិជន (Consumer Watchdog)របស់ប្រទេសចិន បានបដិសេធការអះអាងនេះ ដោយនិយាយថា ខ្លួនបានទទួលពាក្យបណ្តឹងជាច្រើនរបស់ទូរស័ព្ទ iPhone ដែលផ្ទុះ និងបង្ករឆាប់ឆេះតែម្តង។
ក្រុមប្រឹក្សាយោបល់អតិថិជននៅក្រុងសៀងហៃ បានអំពាវនាវឱ្យក្រុមហ៊ុន Apple ធ្វើការដោះស្រាយទៅលើពាក្យបណ្តឹងទាំងនោះ “ក្រុមហ៊ុន Apple គួរតែមានការទទួលខុសត្រូវសម្រាប់អតិថិជនរបស់ខ្លួន។ ពាក្យបណ្តឹងជាច្រើនអ្នកប្រើប្រាស់មិនទាន់ត្រូវបានដោះស្រាយឱ្យមានប្រសិទ្ធិភាពនៅឡើយទេ។ វេទិកាការពារអ្នកប្រើប្រាស់ដែលគ្រប់គ្រងដោយរដ្ឋបានចោទប្រកាន់ថា ខ្លួនបានទទួលនូវការរាយការណ៍ចំនួនប្រាំបីអំពីទូរស័ព្ទ iPhones ដែលបានផ្ទុះខណៈពេលដែលទូរស័ព្ទនេះកំពុងតែប្រើប្រាស់ ឬកំពុងបញ្ចូលថ្ម នេះបើតាមការបញ្ជាក់នៅក្នុងរបាយការណ៍ដែលបានបង្ហោះកាលពីថ្ងៃសុក្រនៅលើគេហទំព័ររបស់ខ្លួន។
របាយការណ៍នេះ បានដកស្រង់នូវសម្តីរបស់ស្ត្រីម្នាក់បាននិយាយថាទូរស័ព្ទ iPhone 6s របស់នាងបានផ្ទុះនៅក្នុងខែសីហា ដែលបណ្តាលឱ្យអេក្រង់បែកខ្ទេច និងមានស្នាមឆេះខ្មៅនៅផ្នែកខាងក្រោយ និងថ្មរបស់ទូរស័ព្ទនេះ។ ក្រុមប្រឹក្សានេះ បានបន្ថែមទៀតថា វាមានការកើនឡើងចំនួនប្រាំមួយករណីនៃចំនួននៃពាក្យបណ្តឹងក្នុងរយៈពេលត្រឹមតែពីរខែដែលជាប់ពាក់ព័ន្ធទៅនឹងទូរស័ព្ទ iPhone 6 និង iPhone 6s ។ វាមិនមែនជាលើកទីមួយនោះទេ ដែលដំណឹងនៃការផ្ទុះទូរស័ព្ទ iPhone នេះបានកើតឡើង។ នៅថ្ងៃទី 1 ខែតុលា ទូរស័ព្ទ iPhone បានផ្ទុះនៅក្នុងហោប៉ៅខាងក្រោយរបស់សិស្សម្នាក់នៅក្នុងរដ្ឋ New Jersey និងនៅថ្ងៃទី 20 ខែតុលា ទូរស័ព្ទ iPhone បានផ្ទុះនៅក្នុងរថយន្តមួយរបស់បុរសជនជាតិអូស្ត្រាលីម្នាក់បណ្តាលឱ្យរថយន្តឆេះផ្នែកខាងក្នុងផងដែរ។
ក្រុមហ៊ុន Apple នៅប្រទេសចិនក៏បានលើកឡើងអំពីបញ្ហានៃការបិទទូរស័ព្ទដោយចៃដន្យនៃទូរស័ព្ទ iPhone 6s ជាច្រើនគ្រឿងនៃថ្ងៃទី 2 ខែធ្នូ ហើយក្រុមហ៊ុន បានបញ្ជាក់ថា ពាក្យបណ្តឹង ដែលពាក់ព័ន្ធតែទូរស័ព្ទ ដែលផលិតឡើងនៅចន្លោះខែកញ្ញានិងខែតុលា។ របាយការណ៍របស់អង្គការឃ្លាំមើលអតិថិជន ក៏បាននិយាយពីរឿងអាស្រូវរបស់ទូរស័ព្ទ Samsung Galaxy Note 7 ដែលបានផ្ទុះ ហើយក្រុមហ៊ុន បានធ្វើការប្រកាសប្រមូលនូវទូរស័ព្ទទាំងអស់ត្រឡប់មកវិញដែលធ្វើឱ្យក្រុមហ៊ុនកូរ៉េខាងត្បូងនេះ ខាតបង់ទឹកប្រាក់ប្រមាណជា 5 ពាន់លានដុល្លារអាមេរិច។ ក្រុមហ៊ុន Apple ក៏ត្រូវបានគេមើលឃើញផងដែរថា ប្រាក់ចំណេញរបស់ក្រុមហ៊ុននេះ បានធ្លាក់ចុះ ហើយឧប្បត្តិហេតុមួយចំនួន ក៏អាចបង្ករផលប៉ះពាល់ដល់ក្រុមហ៊ុននេះ ថែមទៀតផងដែរ៕
