ខណៈពេលដែលយើងនៅមិនទាន់បានឃើញនូវអ្វីដែលជាគំនិតថ្មីស្រឡាងរបស់ស្មាតហ្វូនស៊េរីថ្មីរបស់ក្រុមហ៊ុន Huawei ពេលនេះក្រុមហ៊ុនបច្ចេកវិទ្យាយក្សមួយនេះបានបញ្ចេញនូវឈ្មោះរបស់ទូរស័ព្ទស៊េរីថ្មីនេះហើយភ្ជាប់ជាមួយនឹងរូបភាព Teaser មួយសន្លឹកដែលយើងអាចដឹងថាវត្តមានទូរស័ព្ទស៊េរីថ្មីនោះគឺត្រកូល Honor ។
នៅក្នុងរូបភាព Teaser នេះបានទម្លាយឱ្យដឹងថា ទូរស័ព្ទដែលនឹងបង្ហាញខ្លួននាពេលខាងមុខរបស់ក្រុមហ៊ុន Huawei ត្រូវបានគេហៅថា Honor Magic។ យើងនៅមិនទាន់បានដឹងអំពីលក្ខណៈសម្បត្តិរបស់ទូរស័ព្ទនេះនៅឡើយទេ ប៉ុន្តែវាត្រូវបានគេរំពឹងថានឹងមានអេក្រង់កោងដូចទៅនឹងអេក្រង់របស់ទូរស័ព្ទ Samsung ប្រភេទ Galaxy Edge ។ សម្រាប់ពាក្យចចាមអារ៉ាមចុងក្រោយគេបំផុតបានឱ្យដឹងថា ទូរស័ព្ទនេះនឹងភ្ជាប់ជាមួយនឹងអេក្រង់កោងពិតមែនគឺនៅលើគែមទាំង 4 របស់កញ្ចក់អេក្រង់។ ហើយហេតុអ្វីបានជាទូរស័ព្ទនេះដាក់ឈ្មោះថា Magic ទៅវិញ តើមានអ្នកណាដឹងទេ?
កាលបរិច្ឆេទនេះការប្រកាសបង្ហាញទូរស័ព្ទនេះត្រូវបានកំណត់ពេលវេលាប្រកាសរួចហើយនៅថ្ងៃទី 16 ខែធ្នូខាងមុខនេះនៅក្នុងប្រទេសចិន។ យើងនឹងឃើញនូវលក្ខណៈសម្បត្តិជាច្រើនទៀតប្រសិនបើក្រុមហ៊ុន Huawei ពិតជាសម្រេចចិត្តក្នុងការបញ្ចេញព័ត៌មានមួយចំនួនរបស់ Honor Magic ព្រោះថាតាមរយៈរូបភាព Teaser នេះនៅមិនទាន់បានបង្ហាញអ្វីក្រៅពីឈ្មោះរបស់ទូរស័ព្ទនេះនោះទេ។