អ្នកប្រើប្រាស់គេហទំព័រប្រព័ន្ធផ្សព្វផ្សាយសង្គម Reddit បានកត់សម្គាល់ឃើញថា ក្រុមហ៊ុនទូរគមនាគមន៍ក្នុងប្រទេសហ្វាំងឡង់ Telia ឥឡូវនេះ បានទទួលការបញ្ជាទិញជាមុនសម្រាប់ទូរស័ព្ទ Asus ROG Phone។ កំពូលស្មាតហ្វូនដែលផលិតឡើងដោយផ្តោតសំខាន់ទៅលើការលេងហ្គេមមួយនេះ ត្រូវបានក្រុមហ៊ុន Asus ធ្វើការប្រកាសបង្ហាញចេញកាលពីដើមឆ្នាំ 2018 នេះ ប៉ុន្តែនេះ ជាលើទីមួយហើយដែលត្រូវបានបង្ហាញពីតម្លៃរបស់វាដោយប្រភពដ៏ល្បីល្បាញមួយ។
នៅលើបណ្តាញវ៉ិបសាយរបស់ក្រុមហ៊ុនទូរគមនាគមន៍ Telia បានដាក់អោយធ្វើការ Pre-Order ស្មាតហ្វូនហ្គេមីងមួយនេះជាមួយតម្លៃខ្ទង់ 999 អឺរ៉ូឬស្មើរនឹងប្រមាណជា $1,150 អាមេរិក ដោយតម្លៃនេះគឺរាប់បញ្ចូលទាំងការតម្លៃពន្ធប្រមាណ 24% ផងដែរ ហើយប្រសិនបើដកតម្លៃពន្ធចេញគឺវាមានតម្លៃត្រឹមតែ $930 អាមេរិកប៉ុណ្ណោះសម្រាប់កំពូលស្មាតហ្វូនដ៏អស្ចារ្យមួយនេះ។
យ៉ាងណាមិញយើងច្បាស់ជាគិតថាតម្លៃរបស់ Asus ROG Phone ហាក់រាងថ្លៃបន្តិចប៉ុន្តែតម្លៃនេះសម្រាប់អតិថិជនដែលបានធ្វើការកុម៉្មង់មុនក្រុមហ៊ុននឹងថែមជូននៅកាសស៊េរី ROG Delta Headset ជាមួយខ្សែ USB Type-C ដែលមានតម្លៃប្រមាណ $190 មួយ។ ហើយលក្ខណៈពិសេសនៃកាសនេះគឺវាត្រូវបានរចនាឡើងដោយរំលេចជាមួយរូបឡូហ្គោ ROG Republic Of Game ហើយវាមិនត្រូវតែមានភាពស្រស់ស្អាតប៉ុណ្ណោះទេប៉ុន្តែវាមានមុខងារពិសេសៗច្រើនយ៉ាងទៀតផង។
អ្នកប្រើប្រាស់អាចធ្វើការភ្ជាប់កាសនេះទៅកាន់ឧបករណ៍ AeroActive Cooler តាមរន្ធ USB Type-C port ដោយវាជួយកាត់បន្ថយការរំខានដោយខ្សែកាសនៅពេលកាន់ទូរស័ព្ទលេងហ្គេម។ AeroActive Cooler គឺជាឧបករណ៍ដែលមានភ្ជាប់មកក្នុងប្រអប់ទូរស័ព្ទស្រាប់ ដោយឧបករណ៍នេះមានលក្ខណៈពិសេសគឺវាអាចភ្ជាប់ជាមួយទូរស័ព្ទ ROG Phone តាមរយះរន្ធ Dot ហើយវាមានកូនកង្ហាតូចមួយសម្រាប់ជួយកាត់បន្ថយការឡើងកំដៅម៉ាស៊ីនទូរស័ព្ទនៅពេលប្រើការយូរ។ ប្រភពបន្តថាអតិថិជននឹងអាចទទួលបានទូរស័ព្ទរបស់គេនៅសប្តាហ៍ទី 38 ដែលចាប់ផ្តើមនៅក្នុងខែកញ្ញាខាងមុខនេះ។
រហូតមកដល់ពេលនេះ គេមិនទាន់ច្បាស់ទេថាតើ ក្រុមហ៊ុនចែកចាយផ្សេងទៀតសម្រាប់បណ្តាទីផ្សារក្នុងប្រទេសដទៃក្រុមហ៊ុនអាចនឹងមានការបន្ថែមជូនដូចគ្នាដែររឺទេសម្រាប់ការ Pre-Order ស្មាតហ្វូន Asus ROG Phone មួយនេះ ប៉ុន្ដែយើងរំពឹងថា ការផ្តល់ជូនពីក្រុមហ៊ុនផ្សេងទៀតនឹងចាប់ផ្តើមបង្ហាញឆាប់ៗនេះផងដែរ ពិសេសនៅក្នុងទីផ្សារប្រទេសកម្ពុជាយើងតែម្តង៕