ក្រុមហ៊ុន MSI រំពឹងថា ការលក់ម៉ាស៊ីនកុំព្យូទ័រប្រភេទ Gaming Notebook របស់ខ្លួន នឹងកើនឡើងខ្លាំងចាប់ពីខែកញ្ញានេះទៅ

ក្រុមហ៊ុន Micro-Star International ឬ MSI ដែលជាក្រុមហ៊ុនផលិតម៉ាស៊ីនកុំព្យូទ័រដ៏ល្បីឈ្មោះរបស់តៃវ៉ាន់ ហើយបច្ចុប្បន្នកំពុងឈរនៅលេខរៀងទីពីរជាក្រុមហ៊ុនផ្គត់ផ្គង់ម៉ាស៊ីនកុំព្យូទ័រ Gaming Notebook ក្នុងទីផ្សារពិភពលោក និងជាម៉ាកម៉ាស៊ីនកុំព្យូទ័រឈរនៅលំដាប់កំពូលក្នុងទីផ្សារអាមេរិកខាងជើង និងទី្វបអឺរ៉ុបក្នុងការលក់ម៉ាស៊ីនកុំព្យូទ័រ Gaming Notebook ចាប់ពីធុនកណ្តាល (Mid-range) ដល់ថ្នាក់កំពូល (High End)ថែមទៀតផង។ MSI បានរំពឹងទុកថាការលក់ម៉ាស៊ីនកុំព្យូទ័រ Gaming Notebook របស់ខ្លួននឹងផ្តើមមានការកើនឡើងខ្លាំងចាប់ពីខែកញ្ញានេះដោយសារមានតម្រូវការពីសិស្សានុសិស្សដែលបានត្រឡប់សិក្សាវិញ និងថ្ងៃសំរាកនាដំណាច់ឆ្នាំនេះ។ 

MSI បានរំពឹងយ៉ាងមុខមាំថាតម្រូវការនៃម៉ាស៊ីនកុំព្យូទ័រ Gaming Notebook របស់ខ្លួននឹងកើតឡើងដល់កម្រិតកំពូលក្នុងត្រីមាសទីបួនឆ្នាំ 2018 នេះដែលវានឹងផ្តល់នូវប្រាក់ចំណេញយ៉ាងច្រើនដល់ក្រុមហ៊ុនផងដែរ។ ចំណែកទីផ្សារម៉ាស៊ីនកុំព្យូទ័រ Gaming Notebook  របស់ MSIបានកើនឡើងចាប់តាំងពីឆ្នាំ 2012 ហើយអាជីវកម្មម៉ាស៊ីនកុំព្យូទ័រប្រភេទនេះកំពុងតែមានការប្រកូតប្រជែងទីផ្សារយ៉ាងប្រគៀកប្រកិតបំផុតជាមួយម៉ាស៊ីនកុំព្យូទ័រ  Gaming ម៉ាក ROG (Republic of Gamers) របស់ក្រុមហ៊ុន Asustek Computers។ 

ក្រុមហ៊ុនតៃវ៉ាន់នេះ ត្រូវបានគេមើលឃើញថា បានខិតខំធ្វើការងារយ៉ាងលំបាកក្នុងទីផ្សារម៉ាស៊ីនកុំព្យូទ័រ Gaming អស់រយះពេលជាច្រើនឆ្នាំ ហើយក្រុមការងារ R&D របស់ MSI បាននឹងកំពុងធ្វើការស្រាវជ្រាវ និងអភិវឌ្ឍលើលក្ខណៈពិសេសនៃផ្នែករឹងកុំព្យូទ័រ (Hardware) ដើម្បីបង្កើននូវសមត្ថភាពប្រើការឲ្យកាន់តែខ្លាំងជាមួយការរចនាអោយកាន់តែមានលក្ខណៈពិសេសដើម្បីបំពេញតម្រូវការអតិថិជនពិសេស Gamers គ្រប់រូបតែម្តង។ បន្ថែមពីលើនេះកម្មវិធី និងមុខងារថ្មីៗក៏ត្រូវបានក្រុមការងាររបស់ MSI បានដាក់បញ្ចូលយ៉ាងពេញលេញជាមួយនឹងប្រព័ន្ធ  Gaming Ecosystem។ ហើយដើម្បីធ្វើការផ្សព្វផ្សាយម៉ាកសញ្ញាកុំព្យូទ័ររបស់ខ្លួនអោយកាន់តែមានភាពល្បីល្បាញ MSI បានរួមចំនែកក្នុងការរៀបចំព្រឹត្តិការណ៍ការប្រកូតកីឡាអនឡាញ e-Sports Event និងជាអ្នកឧបត្ថម្ភផ្តាច់មុខសម្រាប់ក្រុមកីឡា e-Sport អស់ជាច្រើនឆ្នាំមកហើយផងដែរ។ 

MSI ត្រូវបានគេរំពឹងថានឹងនៅតែជាក្រុមហ៊ុនផ្គត់ផ្គង់ម៉ាស៊ីនកុំព្យូទ័រ Gaming Notebook ដែលមានដំណើរការលើ Intel Core i5 CPU និងកាតក្រាហ្វិកដែលមានសមត្ថភាពខ្ពស់ Nvidia GeForce GTX 1050 នាំមុខគេក្នុងឆ្នាំ 2018 នេះជាមួយចំនួននៃការនាំចេញបានប្រហែល 1,3 លានគ្រឿង។ ជាមួយគ្នានេះដែរ MSI  ត្រូវបានគេដឹងទៀតថា “នឹងក្លាយជាក្រុមហ៊ុនផ្គត់ផ្គង់ម៉ាស៊ីនកុំព្យូទ័រយួរដៃ Gaming Notebook ឈានមុខគេនៅក្នុងទីផ្សារសហរដ្ឋអាមេរិក រុស្ស៊ី អាល្លឺម៉ង់ បារាំង និងប៉ូឡូញ និងនៅចំនាត់ថា្នកលេខ 2 នៅទីផ្សារទ្វីបអឺរ៉ុបខាងជើង តៃវ៉ាន់ អាស៊ីអាគ្នេយ៍ និងកូរ៉េនៅឆ្នាំ 2018។ MSI បានរំពឹងទុកថាទីផ្សារភាគហ៊ុនរបស់ខ្លួននឹងមានការកើនឡើងពី 8 ទៅ 9 ដុលា្លរតៃវ៉ាន់ក្នុងមួយភាគហ៊ុនក្នុងឆ្នាំ 2018 នេះ ដែលកំណើនគួរអោយកត់សំគាល់នេះគឺខ្ពស់ជាងកាលពីឆ្នាំ 2017 ដែលមានតម្លៃភាគហ៊ុន 5,84 ដុល្លារតៃវ៉ាន់ក្នុងមួយភាគហ៊ុន។ 

នៅក្នុងឆ្នាំនេះក្រុមហ៊ុន MSI បានបង្ហាញចេញម៉ាស៊ីនកុំព្យូទ័រ Gaming Notebook ស៊េរីថ្មីៗជាច្រើនស៊េរីដែលរួមមានដូចជា MSI PS42 និង P65 Creator ដែលបានបង្កើនសមត្ថភាពប្រើការកាន់តែខ្លាំងមានប្រសិទ្ធិភាពខ្ពស់ មុខងារ និងបច្ចេកវិទ្យាប្រើប្រាស់កាន់តែទំនើប។ ម៉ាស៊ីន MSI P65 Creator បំពាក់នូវ CPU Intel-core-i7 ឬ i9, ប្រើក្រាហ្វិចកាត Nvidia's GeForce GTX 1070 Max-Q, មានរ៉េមប្រភេទ  DDR4-2666 ទំហំ 32GB និងថាសរឹងផ្ទុកទិន្នន័យប្រភេទ SSD ទំហំ 512GB។ 

ថ្មីៗនេះ ក្នុងព្រឹត្តិការណ៍ IFA 2018,  MSI ក៏បានពាំនាំនូវផលិតផលថ្មីៗរបស់ខ្លួនទៅដាក់បង្ហាញផងដែររាប់បញ្ចូលទាំងម៉ាស៊ីនកុំព្យូទ័រស៊េរីថ្មីម៉ូដែល MSI GS65 Gaming Notebook ដែលទ្រទ្រង់នូវបច្ចេកវិទ្យាជំនួយការបញ្ជាដោយសំឡេងដ៏វៃឆ្លាត Amazon Alexa Voice Assistant ថែមទៀតផង។ MSI GS65 នឹងប្រកាសចេញលក់នៅជិតដំណាច់ឆ្នាំ 2018។ MSI មានគម្រោងក្នុងការប្រកាសចេញម៉ាស៊ីនកុំព្យូទ័រ Gaming ស៊េរីថ្មីៗជាបន្តបន្ទាប់ដែលទ្រទ្រង់នូវបច្ចេកវិទ្យា Alexa Voice Assistant នេះដើម្បីផ្គត់ផ្គង់តម្រូវការទីផ្សារនៃអ្នកប្រើប្រាស់នៅទូទាំងពិភពលោក៕