នេះគឺជាម៉ាស៊ីនកុំព្យូទ័រយួរដៃហ្គេមីងមួយស៊េរីទៀតរបស់ក្រុមហ៊ុននាគរាជតៃវ៉ាន់ស៊េរី MSI GF65 ម៉ូដែល Thin-10UE ដែលផលិតឡើងយ៉ាងពិសេសដោយភ្ជាប់នូវផ្នែករឹងខ្លាំងៗសមស្របទៅនឹងបរិបទការងារប្រចាំថ្ងៃទាំងការងារទូទៅ ការកម្សាន្ត និងការលេងហ្គេម។ ហើយខាងក្រោមនេះគឺជាចំនុចខ្លាំងខ្លឹមមួយចំនួនដែលម៉ាស៊ីនកុំព្យូទ័រយួរដៃហ្គេមីង MSI GF65 មាន៖
បំពាក់នូវអង្គ CPU និង GPU ដ៏ខ្លាំងក្លាដំណើររលូនគ្មានទាស់ចិត្ត
MSI GF65 ម៉ូដែល Thin-10UE នេះ ត្រូវបានក្រុមហ៊ុនដំឡើងមកជាមួយនូវ Hardware ខ្លាំងបំផុតរបស់ក្រុមហ៊ុន Intel និង NVIDIA។ ម៉ាស៊ីនកុំព្យួទ័រយួរដៃមួយនេះ ទទួលបានការបំពាក់នូវអង្គ CPU ជំនាន់ទី 10 របស់ Intel ស៊េរី Core i7 មានលេខ 10750H កម្រិត 6-Core ដែលអាច Boost បង្កើនល្បឿនបានខ្ពស់បំផុតដល់ 5.0GHz ។
បន្ថែមពីនេះ ម៉ាស៊ីនេះ ក៏មានភ្ជាប់ដោយអង្គ GPU របស់ NVIDIA ស៊េរី GeForce RTX3060 ទំហំ 6GB-GDDR6 ភ្ជាប់នូវបច្ចេកវិទ្យា Dynamic Boost 2.0 ដែលមានល្បឿន Boost Clock 1485MHz ថែមទៀតផង។ នៅក្នុងម៉ាស៊ីនរបស់ MSI GF65 គាំទ្រដោយរ៉េមប្រភេទ DDR4-2666Hz ដែលមានរន្ធ DIM-Slot ចំនួនពីរទ្រទ្រង់ទំហំធំបំផុតដល់ 64GB និងមាន Hard Disk ចំនួនពីរជាប្រភេទ M.2 SSD NVMe ដែលទ្រទ្រង់នូវប្រព័ន្ធបច្ចេកវិទ្យាផ្ទេរទិន្នន័យចេញចូល PCIe Gen3។
កាន់តែពិសេសម៉ាស៊ីនកុំព្យូទ័រយួរដៃ MSI GF65 ភ្ជាប់មកជាមួយថ្មទំហំ 51Whr ប្រើប្រាស់ឆ្នាំងសាកភ្លើងកំលាំង 180W និងប្រតិបត្តិការដោយ Microsoft Windows Home-64bit មានដំឡើងមកជាមួយនឹងកម្មវិធី Dragon Center ជំនាន់ថ្មីដែលមានដាក់បន្ថែមនូវមុខងារ Gaming Mode 2.0 ដើម្បីជួយសម្រួលដល់ល្បឿនប្រតិបត្តិការអោយកាន់តែមានប្រសិទ្ធិភាពខ្ពស់សម្រាប់ការលេងហ្គេម ក៏ដូចជាកម្មវិធី MSI APP Player សម្រាប់ធ្វើការភ្ជាប់លេងហ្គេមជាមួយទូរស័ព្ទដៃស្មាតហ្វូនផងដែរ។
បំពាក់នូវប្រព័ន្ធសារធាតុត្រជាក់ជាមួយបច្ចេកវិទ្យា Cooler Boost 5
នៅក្នុងម៉ាស៊ីន MSI GF65 បានភ្ជាប់នូវប្រព័ន្ធបំពងសារធាតុត្រជាក់ចំនួន 6 ដើម ដោយប្រើប្រាស់នូវបច្ចេកវិទ្យា Cooler Boost 5 រួមនឹងប្រព័ន្ធកង្កាលចំនួនពីរនៅសងខាង CPU/GPU សម្រាប់ជួយសម្រួលដល់ការបំភាពចំហាយខ្យល់ក្តៅចេញ និងស្រូបខ្យល់ត្រជាក់ចូល ដើម្បីជួយធ្វើអោយប្រព័ន្ធដំណើរការរបស់ម៉ាស៊ីនមានស្ថិរភាពល្អ និងមិនងាយឡើងក្តៅ។
បន្ទះអេក្រង់ធំទូលាយជាមួយកម្រិត Refresh rate លឿនដូចហោះ 144Hz
MSI GF65 មានអេក្រង់ទំហំធំទូលាយដល់ 15.6 អ៊ីងជាប្រភេទបន្ទះបង្ហាញ IPS Level ដែលមានកម្រិត refresh rate ខ្ពស់បំផុតដល់ 144Hz និងទ្រទ្រង់កម្រិតបង្ហាញចេញ Full-HD ក្នុងទំហំរីសូលូហ្ស៊ិន 1920x1080px ដូច្នេះ វាមិនត្រឹមតែផ្តល់នូវកម្រិតរូបភាពធំច្បាស់ស្រឡះពេញភ្នែកប៉ុណ្ណោះទេ វាក៏ផ្តល់នូវល្បឿនប្រើប្រាស់នៅលើផ្ទៃអេក្រង់មានភាពស្ថិរភាពល្អ មិនរលកញាក់ ជាមួយកម្រិតរូបភាពបង្ហាញចេញបានច្បាស់រសរវ៉ើក។ ហើយនៅលើហ្គេមអេក្រង់ខាងលើរបស់វាមានបង្កប់នូវកាមេរ៉ាវ៉ិបខេមមួយគ្រាប់កម្រិត HD-720px សម្រាប់ប្រើជាមួយវីដេអូខល ឬអាចប្រើសម្រាប់ការ livestream នៅពេលលេងហ្គេមផងដែរ។
តួរខ្លួនស្រោបដោយសារធាតុលោហៈមានភាពរឹងមាំធន់ក្នុងការប្រើប្រាស់
តួរខ្លួនរបស់ MSI GF65 គឺស្រោបដោយសារធាតុអាលុយមីញ៉ូមស្ទើរពេញតួរតែម្តង សូម្បីតែ Keyboard របស់វាក៏ជាអាលុយមីញ៉ូមដូចគ្នាដែរ លើកលែងតែផ្ទៃបាតក្រោមម៉ាស៊ីនប៉ុណ្ណោះដែលជាជ័រស្វិត។ សម្រាប់ផ្ទាំង Keyboard របស់ MSI GF65 គឺជាប្រភេទBacklight Keyboard ដែលមានរំលេចដោយភ្លើង LED ពណ៌ក្រហមនៅខាងក្រោម។ MSI GF65 មានកម្រាស់សរុប 21.7mm និងមានទំងន់ 1.86 គីឡូក្រាម។
រន្ធ I/O មានគ្រប់សម្រាប់ប្រើប្រាស់
ទៅលើរន្ធដំណរភ្ជាប់ ឬហៅថា I/O Port ដែលមាននៅលើម៉ាស៊ីនកុំព្យូទ័រយួរដៃហ្គេមីងមួយនេះវិញគឺមានដូចជារន្ធដោត USB-C3.2 ចំនួន 2, USB-A3.2 ចំនួន 2, HDMI កម្រិត 4K@60fps, Ethernet RJ45, Audio Jack 3.5 ដែលរន្ធទាំងអស់នេះគឺស្ថិតនៅលើគែមខាងស្តាំដៃ និងនៅលើគែមចំហៀងស្តាំងដៃគឺមានរន្ធដោតសាកភ្លើង DC-In។ ជាមួយគ្នាដែរ MSI GF65 នៅមានបំពាក់ឈីប Wi-Fi 6 និង Bluetooth v5.1 រួមនឹងប្រព័ន្ធ Speaker សំឡេងដ៏លឺខ្លាំងដែលទ្រទ្រង់នូវបច្ចេកវិទ្យាសំឡេង Hi-Res Audio ជាមួយមុខងារ Nahimic 3 សម្រាប់កំនត់ទៅលើប្រព័ន្ធសំឡេងដែលយើងចង់បានថេមទៀតផង។
សរុបមក MSI GF65-Thin-10UE គឺជាម៉ាស៊ីនកុំព្យូទ័រយួរដៃហ្គេមីងដែលមានសមត្ថភាពប្រើការខ្លាំងតម្រូវបានតាមការប្រើប្រាស់ក្នុងកិច្ចការងារទូទៅប្រចាំថ្ងៃ និងជាពិសេសសម្រាប់ការលេងហ្គេមកម្សាន្តតែម្តង។ ដូចនេះ ប្រសិនបើប្រិយមិត្តកំពុងស្វែងរកម៉ាស៊ីនកុំព្យូទ័រយួរដៃដែលមានសមត្ថភាពខ្លាំងដើម្បីយកទៅប្រើប្រាស់បំពេញកិច្ចការងារទូទៅ និងការកម្សាន្តប្រចាំថ្ងៃ លោកអ្នកអាចធ្វើការពិចារណាទៅម៉ាស៊ីនកុំព្យូទ័រយួរដៃហ្គេមីង MSI GF65-Thin-10UE នេះបាន ហើយតម្លៃទៀតសោតក៏ធូរថ្លៃផងដែរខ្ទង់ប្រហែល $1,275៕
