ឆ្នាំនេះព្រឹត្តិការណ៍ IFA2017 នឹងត្រូវប្រារព្ធធ្វើឡើងចាប់ពីថ្ងៃទី 01 ដល់ថ្ងៃទី 06 ខែកញ្ញា ហើយបើតាមព័ត៌មាន គឺថាមានក្រុមហ៊ុនល្បីៗជាច្រើន ដូចជា Samsung, Sony, Lg, Huawei, Lenovo, BlackBerry, Asus… ជាដើម ត្រៀមនាំផលិតផលទូរស័ព្ទស្មាតហ្វូនថ្មីៗចុងក្រោយរបស់ខ្លួនទៅដាក់តាំងបង្ហាញក្នុងព្រឹត្តិការណ៍នេះ។ ហើយខាងក្រោមនេះគឺជាកំពូលស្មាតហ្វូនដែលនឹងលេចរូបបង្អួតរាងនៅក្នុងព្រឹត្តិការណ៍ IFA ឆ្នាំនេះ៖
1-Samsung Galaxy Note 8
កំពូលស្មាតហ្វូនប្រភេទហ្វាប់ជំនាន់ថ្មីរបស់ក្រុមហ៊ុនបច្ចេកវិទ្យាយក្សកូរ៉េខាងត្បូងមួយនេះ ត្រូវបានគេដឹងច្បាស់ថា នឹងបង្ហាញវត្តមាននៅថ្ងៃទី 23 ខែសីហាសប្តាហ៍ក្រោយនេះ ហើយ Samsung ក៏នឹងពាំនាំយកទៅដាក់តាំងបង្ហាញនៅក្នុងព្រឹត្តិការណ៍ IFA នាទីក្រុងបែកឡាំងដើមខែកញ្ញាផងដែរ។ Note 8 ត្រូវបានលេចលឺព័ត៌មានមកថានឹងបំពាក់នូវកញ្ចក់អេក្រង់ទំហំ 6.3 អ៊ីងប្រភេទ AMOLED Infinity Display, ប្រើបន្ទះឈីប Snapdragon 835 និងជាកំពូលស្មាតហ្វូនដំបូងគេរបស់ Samsung ដែលបំពាក់នូវប្រព័ន្ធកាមេរ៉ាភ្លោះ (dual rear camera)៕
2-LG V30
ក្រុមហ៊ុនបច្ចេកវិទ្យាលំដាប់ពិភពដែលមានប្រទេសកំណើតជាមួយ Samsung ដែរនោះក៏បានត្រៀមខ្លួនរួចរាល់ហើយក្នុងការបង្ហាញចេញកំពូលស្មាតហ្វូនជំនាន់ថ្មីទី 2 បន្ទាប់ពី LG G6 នោះ គឺ LG V30។ V30 ត្រូវបានគេដឹងថានឹងបំពាក់កញ្ចក់អេក្រង់ប្រភេទ OLED FullVision Display ទំហំ 6.0 អ៊ីង, បំពាក់បន្ទះឈីប Snapdragon 835 ជាមួយរ៉េមទំហំ 6GB, បំពាក់ប្រព័ន្ធកាមេរ៉ាភ្លោះដែលមានកម្រិត aperture ធំបំផុតកម្រិត f/1.6 និងទ្រទ្រង់នូវមុខងារសាកថ្មឥតប្រើខ្សែ Wireless Charge ជាដើម។ LG V30 នឹងបង្ហាញខ្លួននោះថ្ងៃទី 31 ខែសីហានេះគឺមុនមួយថ្ងៃនៃថ្ងៃព្រឹត្តិការណ៍ IFA ចាប់ផ្តើម។
3-Sony Xperia XZ1
Sony ក៏ត្រៀមប្រកាសចេញកំពូលស្មាតហ្វូនជំនាន់ថ្មីទី2 របស់ខ្លួនផងដែរនាចុងឆ្នាំនេះ។ ប៉ុន្តែមិនមែនមួយគ្រឿងនោះទេគឺមានដល់ទៅពីរគ្រឿងឯណោះគឺXperia XZ1 និង XZ1 Compact។ ស្មាតហ្វូនជំនាន់ថ្មីនេះនឹងបំពាក់កញ្ចក់អេក្រង់ទំហំ 5.2 អ៊ីងប្រភេទអេក្រង់ HDR Full-HD Display, បំពាក់បន្ទះឈីប Snapdragon 835 ជាមួយរ៉េមទំហំ 4GB និងថ្មកំលាំង 2,800mAh ទៅ 3,000mAh។ ហើយយើងដឹងហើយថាស្មាតហ្វូនជំនាន់ XZ គឺជាកំពូលស្មាតហ្វូនដំបូងក្នុងលោកដែលមានកាមេរ៉ាថតវីដេអូបានយឺតបំផុតរហូតដល់ទៅ 960 fps គឺយឺតទាល់តែមែន ទែនតែម្តង ហើយជំនាន់ថ្មី XZ1 ក៏នឹងនៅតែបន្តបំពាក់កាមេរ៉ានេះដដែល។ កំពូលស្មាតហ្វូនកាមេរ៉ាកប់ស៊េរីមួយនេះអាចនឹងបង្ហាញវត្តមាននៅថ្ងៃទី 31 ខែសីហាដំណាលគ្នាជាមួយ LG V30 ដែរ។
4-Huawei Mate 10
គេនៅមិនទាន់ដឹងច្បាស់នៅឡើយទេថា Huawei នឹងបង្ហាញវត្តមានកំពូលស្មាតហ្វូនប្រភេទហ្វាប់ប្លែតជំនាន់ថ្មី Mate 10 របស់ខ្លួននៅក្នុងព្រឹត្តិការណ៍ IFA ឆ្នាំនេះដែរឬអត់ទេព្រោះថាជាទម្លាប់ Huawei តែងតែបញ្ចេញកំពូលហ្វាប់ប្លែតរបស់ខ្លួននៅចុងឆ្នាំគឺកំឡុងខែវិច្ឆកា។ Mate 10 ត្រូវបានគេរាយការណ៍មកថានឹងប្តូររចនាបថរូបរាងបែបថ្មីខុសពីជំនាន់ Mate 9 ដោយវានឹងបំពាក់កញ្ចក់អេក្រង់ប្រភេទថ្មី EntireView OLED Display ទំហំ 6.1 អ៊ីងដែលមានគែមជុំវិញអេក្រង់ស្តើងបំផុត និងអាចបង្ហាញរូបភាពបានក្នុងកម្រិត Quad-HD។ ហ្វាប់ប្លែតជំនាន់ថ្មីនេះនឹងបំពាក់បន្ទះឈីបចុងក្រោយរបស់ខ្លួនជំនាន់ Kirin 970 ជាមួយរ៉េមទំហំ 6GB, មានថ្មកំលាំង 4,000mAh និងបំពាក់ប្រព័ន្ធកាមេរ៉ាភ្លោះចុងក្រោយរបស់ Leica។
5-Google Pixel2 / Pixel XL2
ក្រុមហ៊ុនបណ្តាញរុករកដ៏ធំបំផុតក្នុងពិភពលោក Google បានត្រៀមប្រកាសចេញកំពូលទូរស័ព្ទជំនាន់ទីពីរគឺ Google Pixel2 និង Pixel XL2។ បើតាមព័ត៌មានបែកធ្លាយកន្លងមកបានអោយដឹងថា កំពូលស្មាតហ្វូនជំនាន់ទី 2 នេះនឹងត្រូវបាន Google ធ្វើការកែប្រែលម្អររចនាបថរូបរាងថ្មី បំពាក់កញ្ចក់អេក្រង់ថ្មី កំលាំងម៉ាស៊ីនកាន់តែខ្លាំងក្លា ហើយនិងដំឡើងមកជាមួយប្រតិបត្តិការ Android ជំនាន់ថ្មីចុងក្រោយបង្អស់គឺ Android O ស្រាប់ចេញពីប្រអប់តែម្តង។ គេមិនច្បាស់ទេថាស្មាតហ្វូនទាំងពីរនេះអាចនឹងបង្ហាញវត្តមានក្នុងព្រឹត្តិការណ៍ IFA2017 ព្រោះបើតាមព័ត៌មានចចាមអារ៉ាមបានបញ្ជាក់ថា Google នឹងប្រកាសចេញកំពូលស្មាតហ្វូនជំនាន់ទី 2 របស់ខ្លួននៅខែតុលានាជិតដំណាច់ឆ្នាំនេះ៕
6-Asus Zenfone 4 Series
និយាយដល់ក្រុមហ៊ុនបច្ចេកវិទ្យាផលិតកុំព្យូទ័រយូរដៃម៉ាកល្បី Asus របស់តៃវ៉ាន់ឯណេះវិញគឺបានប្រកាសចេញស្មាតហ្វូនស្រឡាយ Zenfone របស់ខ្លួនជាច្រើនស៊េរីផងដែរសម្រាប់ត្រីមាសចុងក្រោយឆ្នាំនេះមានដូចជា Asus Zenfone 4/4 Pro, Zenfone 4 Selfie/4 Selfie Pro, Zenfone 4 Max និង Zenfone 4 Max Pro ជាដើម ដែលពួកវាមានគុណសម្បត្តិ និងលក្ខណះសម្បត្តិប្រហាក់ប្រហែលគ្នា។ Asus ក៏មានគម្រោងនឹងពាំនាំស្មាតហ្វូនជំនាន់ Zenfone 4 Series ទាំងអស់នេះទៅដាក់តាំងបង្ហាញនៅក្នុងព្រឹត្តិការណ៍ IFA2017 ដែលធ្វើឡើងនាដើមខែក្រោយនេះផងដែរ។
7-BlackBerry Phone
ក្រុមហ៊ុន BlackBerry ត្រូវបានគេដឹងថាបាននឹងកំពុងតែសំងំផលិតស្មាតហ្វូនជំនាន់ថ្មីរបស់ខ្លួនចំនួនពីរស៊េរីដែលមានលេខកូដសំគាល់ Krypton និង Juno។ ចំពោះគុណសម្បត្តិនៃស្មាត ហ្វូនទាំងពីរនេះមិនទាន់ត្រូវបានទម្លាយចេញនៅឡើយទេ ក៏ប៉ុន្តែគេសន្និដ្ឋានថាពួកវាគឺស្ថិតនៅក្នុងស្រឡាយស្មាតហ្វូនធុនមធ្យមដូច Blackberry KEYOne ដែរ។ ស្មាតហ្វូនជំនាន់ថ្មីទាំងពីរនេះអាចនឹងត្រូវបានក្រុមហ៊ុន TCL ដែលជាក្រុមហ៊ុនដៃគូរបស់ BlackBerry ក្នុងការផលិតស្មាតហ្វូនឲ្យក្រុមហ៊ុនមួយនេះយកទៅបង្ហាញក្នុងព្រឹត្តិការណ៍ IFA2017 ផងដែរ។ ទាំងអស់នេះគឺជាព័ត៌មានទាក់ទងនឹងកំពូលស្មាតហ្វូន Android ដែលត្រៀមបង្ហាញវត្តមានក្នុងព្រឹត្តិការណ៍ IFAឆ្នាំនេះ។ ហើយបើនិយាយដល់ក្រុមហ៊ុនបច្ចេកវិទ្យាយក្សរបស់អាមេរិក Apple វិញក៏ត្រៀមបញ្ចេញទូរស័ព្ទ iPhone ជំនាន់ថ្មីរបស់ខ្លួនផងដែរនាខែកញ្ញាខែក្រោយនេះ។ ដូច្នេះចុងឆ្នាំ 2017 និងដើមឆ្នាំ 2018 សង្រ្គាមក្នុងទីផ្សារស្មាតហ្វូនពិភពលោកនឹងផ្ទុះកំដៅកាន់តែខ្លាំងទ្វេរឡើង ហើយអ្នកប្រើប្រាស់នឹងទទួលទូរស័ព្ទស្មាតហ្វូនដែលល្អបំផុតដែលខ្លួនចង់បានពីសង្រ្គាមមួយនេះ៕