កាលថ្ងៃសុក្រម្សិលមិញនេះ ក្រុមហ៊ុនចែកចាយស្មាតហ្វូននៅក្នុងប្រទេសកូរ៉េខាងត្បូង បានបញ្ជាក់ថា ការកម្មង់ទិញមុនថ្ងៃដំបូងសម្រាប់ទូរស័ព្ទ iPhone X ស៊េរីថ្មីចុងក្រោយរបស់ក្រុមហ៊ុន Apple Inc គឺត្រូវបានលក់ដាច់អស់រលីងតែម្តងនៅក្នុងរយៈពេលត្រឹមតែប៉ុន្មាននាទីប៉ុណ្ណោះ។ ការលក់លឿនបែបនេះអាចទំនងជាដោយសារតែកង្វះខាតទៅលើការផ្គត់ផ្គង់ក៏ថាបាន។ ក្រុមហ៊ុនចែកចាយចំណាត់ថ្នាក់លេខ 1 SK Telecom Co. បាននិយាយថា ក្រុមហ៊ុនបានលក់អស់រលីងនូវ iPhone X នៅក្នុងរយៈពេលត្រឹមតែ 3 នាទី បន្ទាប់ពីការចាប់ផ្តើមដាក់ឱ្យការកម្មង់ទិញមុននោះ។ បើធៀបជាមួយនឹងទូរស័ព្ទ iPhone 7 កាលពីឆ្នាំមុននេះ ត្រូវចំណាយពេលដល់ទៅ 20 នាទីដើម្បីលក់ស្មាតហ្វូននេះអស់ពីស្តុកនោះ។
SK Telecom បានបញ្ជាក់បន្ថែមថា សម្រាប់ការផ្គត់ផ្គង់ទូរស័ព្ទ iPhone X គឺមានចំនួនតិចជាងពាក់កណ្តាលនៃចំនួនរបស់ទូរស័ព្ទ iPhone 8 ដែលដាក់លក់នៅក្រុមហ៊ុននេះ កាលពីដើមខែនេះផងដែរ។ សម្រាប់ពណ៌ទឹកប្រាក់ Silver-Color Editions បានលក់អស់រលីងតែម្តងនៅក្នុងរយៈពេលត្រឹមតែ 1 នាទី។ ក្រុមហ៊ុន KT Corp. បានលក់ទូរស័ព្ទ iPhone X បានចំនួនដល់ទៅ 20,000 គ្រឿងនៅក្នុងរយៈពេល 5 នាទី ចំនែកក្រុមហ៊ុន LG Uplus Corp. ក៏ត្រូវគេដឹងថាលក់ទូរស័ព្ទ iPhone X អស់រលីងផងដែរ។
ប្រភពមួយដែលចេញពីក្រុមហ៊ុនចែកចាយ បាននិយាយថា “ការផ្គត់ផ្គង់នៅក្នុងជំហានដំបូងនេះ គឺទាបណាស់ក្នុងការបំពេញតម្រូវការរបស់អ្នកប្រើប្រាស់នោះ។ ការផ្គត់ផ្គង់នាពេលអនាគតក៏នៅមិនទាន់ច្បាស់លាស់ផងដែរ។” អ្នកឃ្លាំមើលឧស្សាហកម្មនេះទស្សន៍ទាយថា ចំនួននៃការកម្មង់ទិញមុនទូរស័ព្ទ iPhone X នៅក្នុងប្រទេសកូរ៉េខាងត្បូងមានចំនួនចាប់ពី 150,000 គ្រឿងទាបជាងទូរស័ព្ទ iPhone 8 ដែលមានចំនួនដល់ទៅ 200,000 គ្រឿង។ តម្លៃរបស់ទូរស័ព្ទ iPhone X 64GB គឺមានតម្លៃ 1.36 លានវ៉ុន (ប្រហែលជា $1,237) ហើយសម្រាប់ទំហំ 256GB នឹងមានតម្លៃ 1.55 លានវ៉ុន។ សម្រាប់តម្លៃលក់នៅក្នុងប្រទេសនេះ នៅតែខ្ពស់ជាងតម្លៃនៅសហរដ្ឋអាមេរិកដែលមានត្រឹមតែ $999 តែប៉ុណ្ណោះ។
គួរបញ្ជាក់ផងដែរថា ការកម្មង់ទិញមុនសម្រាប់ទូរស័ព្ទ iPhone 8 គឺមានចំនួនត្រឹមតែ 60-70% នៃតម្រូវការរបស់ទូរស័ព្ទ iPhone 7 ។ អ្នកឃ្លាំមើលឧស្សាហកម្មនេះនិយាយថា អ្នកគាំទ្រជាច្រើនរបស់ក្រុមហ៊ុន Apple កំពុងតែរង់ចាំវត្តមាននៃការមកដល់របស់ទូរស័ព្ទ iPhone X ។ សម្រាប់ iPhone X មានអេក្រង់ទំហំ 5.8 អ៊ីងភ្ជាប់ជាមួយនឹងបច្ចេកវិទ្យា Face ID និងអេក្រង់ OLED ភ្លឺច្បាស់ក្នុងការទស្សនា៕