ស្មាតហ្វូនស៊េរីថ្មី OPPO R17 ត្រៀមបង្ហាញខ្លួនហើយបន្ទាប់ពីវាទទួលបានការទទួលស្គាល់ពី TENAA នៅក្នុងប្រទេសចិន។ នៅក្នុងបញ្ជីរបស់ TENAA នេះ មានការបង្ហាញអំពីស្មាតហ្វូនដែលមានរូបភាព និងលក្ខណៈសម្បត្តិជាច្រើនរបស់វាផងដែរ។ នៅថ្ងៃនេះ មានការទម្លាយចេញពីប្រភពរបស់ចិនដែលចែករំលែកនូវលក្ខណៈសម្បត្តិរបស់ស្មាតហ្វូន OPPO R17 នេះ។ តាមរយៈរូបភាពនេះ បានទម្លាយថា ស្មាតហ្វូន OPPO R17 នឹងបង្ហាញខ្លួនជាមួយនឹងអេក្រង់ទំហំ 6.4-inch AMOLED ហើយមានទំហំអេក្រង់ដល់ទៅ 91.5% បើធៀបទៅនឹងតួខ្លួនរបស់វានោះ។ អេក្រង់នេះ គឺការពារដោយកញ្ចក់ Gorilla Glass ។
ទោះជាយ៉ាងណាក៏ដោយ លក្ខណៈសម្បត្តិរបស់វានៅមិនទាន់ទម្លាយអោយដឹងថាតើកញ្ចក់ការពារ Gorilla Glass នេះគឺជំនាន់ទី 6 ឬយ៉ាងណានោះ? អេក្រង់របស់ស្មាតហ្វូននេះ នឹងប្រើប្រាស់នូវបច្ចេកវិទ្យាស្កេនក្រយ៉ៅដៃក្រោមអេក្រង់ in-display fingerprint scanner។ ស្មាតហ្វូនស៊េរីថ្មីនេះនឹងបង្ហាញខ្លួនជាច្រើនពណ៌គឺ Stream Blue, Neon Violet និង gradient Fog ។ ពាក្យចចាមអារ៉ាមជាច្រើនបញ្ជាក់ថា ស្មាតហ្វូន OPPO R17 នឹងប្រើប្រាស់នូវបន្ទះឈីប Snapdragon 710 SoC ។ ទោះជាយ៉ាងណាក៏ដោយ វាមានការទម្លាយនូវលក្ខណៈសម្បត្តិនេះដែលបង្ហាញថា ស្មាតហ្វូននេះប្រើប្រាស់នូវបន្ទះឈីប Snapdragon 670 ។
ក្រុមហ៊ុន Qualcomm ក៏ត្រៀមខ្លួនក្នុងការបង្ហាញនូវបន្ទះឈីប Snapdragon 670 ជំនាន់បន្ទាប់របស់បន្ទះឈីប Snapdragon 660 ដែលបង្ហាញខ្លួននៅឆ្នាំនេះផងដែរ។ ជាជាងការប្រកាសបង្ហាញនូវបន្ទះឈីប Snapdragon 670 នោះក្រុមហ៊ុននេះ បានបង្ហាញនូវបន្ទះឈីប Snapdragon 710 ដែលជាជំនាន់បន្ទាប់របស់បន្ទះឈីប Snapdragon 660 សម្រាប់ប្រើប្រាស់នៅលើស្មាតហ្វូនជាច្រើននៅក្នុងឆ្នាំ 2017។ នៅថ្ងៃនេះ មានការទម្លាយថា ស្មាតហ្វូន OPPO R17 នឹងប្រើប្រាស់នូវបន្ទះឈីប Snapdragon 670។ បន្ទះឈីបនេះ អាចទ្រទ្រង់រ៉េមទំហំ 8GB និងម៉េមូរីក្នុងម៉ាស៊ីនទំហំ 128GB ។ ស្មាតហ្វូននេះ ប្រើប្រាស់នូវ ColorOS 5.2 ផ្អែកទៅលើប្រព័ន្ធប្រតិបត្តិការ Android 8.1 Oreo។ ស្មាតហ្វូននេះ ប្រើប្រាស់នូវថាមពលថ្ម 3,500mAh ដែលទ្រទ្រង់នូវបច្ចេកវិទ្យា VOOC flash charging តាមរយៈ USB-C ។
ស្មាតហ្វូន OPPO R17 ត្រូវគេរំពឹងថា នឹងប្រើប្រាស់នូវកាមេរ៉ាខាងមុខប្រភេទ Sony IMX576 ទំហំ 25MP ដែលទ្រទ្រង់នូវមុខងារ AI និង 3D Portrait ។ កាមេរ៉ាខាងក្រោយរបស់ស្មាតហ្វូននេះគឺមានទំហំ 16MP+5MP ជាមួយនឹងមុខងារ Super Night Mode ផងដែរ។ ស្មាតហ្វូននេះត្រូវគេរំពឹងថានឹងបង្ហាញខ្លួននៅចុងខែនេះ ឬនៅដើមខែកញ្ញាខាងមុខនេះ៕