ស្មាតហ្វូនស៊េរីថ្មី OPPO F9 បង្ហាញខ្លួនជាផ្លូវការនៅក្នុងប្រទេសហ្វីលីពីន និងតៃវ៉ាន់។ ឆាប់ៗនេះ ស្មាតហ្វូនស៊េរីថ្មីនេះនឹងបង្ហាញខ្លួននៅក្នុងទីផ្សារជាច្រើននៅក្នុងតំបន់អាស៊ីអាគ្នេយ៍ផ្សេងទៀតដូចជាប្រទេសឥណ្ឌូនេស៊ី ម៉ាឡេស៊ី និងប្រទេសថៃជាដើម។ នៅក្នុងប្រទេសឥណ្ឌា ត្រូវបានគេរំពឹងថា នឹងទទួលបានស្មាតហ្វូន OPPO F9 Pro។ ស្មាតហ្វូន OPPO F9 គឺជាជំនាន់បន្ទាប់របស់ស្មាតហ្វូន OPPO F7 ដែលមានអេក្រង់ Notch Display ដែលបានបង្ហាញខ្លួនកាលពីពេលមុននេះ។
ស្មាតហ្វូន F9 មានអេក្រង់ Notch Display ដែលមានរូបរាងដូចជាដំណក់ទឹក។ ក្រុមហ៊ុនធ្វើការរចនារូបរាងថ្មីសម្រាប់ស្មាតហ្វូនរបស់ខ្លួនដែលមានអេក្រង់រូបរាងដូចដំណក់ទឹកដ៏ស្រស់ស្អាត។ អ្វីដែលកាន់តែអស្ចារ្យទៀតនោះ ស្មាតហ្វូននេះប្រើប្រាស់នូវការផ្លាស់ប្តូរពណ៌រូបរាងថ្មី ការបញ្ចូលថាមពលជាមួយនឹងបច្ចេកវិទ្យា VOOC flash charging និងកាមេរ៉ា AI Selfies ផងដែរ។ ស្មាតហ្វូនស៊េរីថ្មី OPPO F9 នេះមានពណ៌ដ៏ស្រស់ស្អាតដូចជា Starry Purple, Twilight Blue និង Sunrise Red ។ សម្រាប់ពណ៌ទាំងអស់របស់ស្មាតហ្វូននេះគឺមានការរចនា Pattern ចាំងភ្លឺដូចត្បូងពេជ្រតែម្តងដែលមើលទៅភ្លឺចាំងគ្រប់គែមជ្រុងរបស់វា។ ស្មាតហ្វូននេះ មានវិមាត្រ 156.7 x 74 x 7.99mm និងមានទម្ងន់ 169 grams ។
OPPO F9 មានអេក្រង់ទំហំ 6.3-inch LTPS IPS LCD screen ជាមួយកម្រិតភាពច្បាស់ Full HD+ 2340 x 1080 pixels ។ អេក្រង់របស់វាមានកម្រិតសមាមាត្រ 19.5:9 ។ តាមការបញ្ជាក់របស់ក្រុមហ៊ុន OPPO អេក្រង់របស់ស្មាតហ្វូន F9 នេះកម្រិតអេក្រង់ដល់ទៅ90.8% បើធៀបជាមួយនឹងតួខ្លួនរបស់វានោះ។ បន្ទះឈីប Helio P60 ដែលប្រើប្រាស់នៅលើស្មាតហ្វូន OPPO F7 ក៏ត្រូវបានប្រើប្រាស់ដូចគ្នានៅលើស្មាតហ្វូន OPPO F9។ បន្ទះឈីបនេះ ប្រើប្រាស់ជាមួយនឹងរ៉េមទំហំ 4GB និង 6GB ។ ស្មាតហ្វូននេះមានថាមពលថ្ម 3,500mAh ដែលទ្រទ្រង់នូវបច្ចេកវិទ្យា VOOC flash chargingតាមរយៈរន្ធដោត microUSB។
ក្រុមហ៊ុនបានអះអាងថា ស្មាតហ្វូននេះអាចប្រើប្រាស់បាន 2 ម៉ោងសម្រាប់ការបញ្ចូលថ្មត្រឹមតែ 5 នាទីប៉ុណ្ណោះ។ បច្ចេកវិទ្យា VOOC នាំយកនូវការការពារដល់ទៅ ៥ កម្រិតសម្រាប់ Adapter ដើម្បីការពារការឡើងកម្តៅខណៈពេលដែលកំពុងតែបញ្ចូលថាមពលថ្មនោះ។ សម្រាប់ផ្នែកខាងក្រោយរបស់ស្មាតហ្វូន OPPO F9 នេះគឺភ្ជាប់ជាមួយនឹងប្រព័ន្ធកាមេរ៉ាភ្លោះ f/1.85 aperture 16-megapixel + f/1.85 aperture 2-megapixel សម្រាប់ប្រើប្រាស់ជាមួយនឹង Effects ជាច្រើន។ ស្មាតហ្វូននេះផ្តល់នូវទស្សនីយភាពដល់ទៅ 16 ដូចជាការថតរូបភាពជាលក្ខណៈ sunset, grass, indoor, food, snow, night, dog, scenery និងជាច្រើនទៀតដែលធ្វើឱ្យរូបភាពទាំងនោះស្រស់ស្អាតបំផុត។ ស្មាតហ្វូន OPPO F9 ភ្ជាប់ជាមួយនឹងកាមេរ៉ាខាងមុខ f/2.0 aperture 25-megapixel AI selfie ដែលទ្រទ្រង់នូវបច្ចេកវិទ្យា sensor HDR hardware ដែលធ្វើការថតរូបភាពបានស្រស់ស្អាតមិនថាពេលថ្ងៃ ឬពេលយប់នោះទេ។
ម៉េមូរីក្នុងម៉ាស៊ីនរបស់ស្មាតហ្វូនOPPO F9នេះមានទំហំ64 GB ។ ស្មាតហ្វូននេះក៏មានរន្ធដោត microSD ផងដែរ។ ស្មាតហ្វូននេះប្រើប្រាស់នូវ ColorOS 5.2 ផ្អែកទៅលើប្រព័ន្ធប្រតិបត្តិការ Android 8.1 Oreo ។ សម្រាប់ការតភ្ជាប់នៅលើស្មាតហ្វូននេះគឺមានដូចជាការប្រើប្រាស់ស៊ីមពីរ 4G VoLTE, Wi-Fi 802.11ac, Bluetooth 4.2, microUSB, USB OTG និងរន្ធដោតកាសស្តាប់ 3.5mm audio jack ផងដែរ។ ស្មាតហ្វូននេះប្រើប្រាស់នូវប្រព័ន្ធ NFC ហើយប្រព័ន្ធស្កេនក្រយ៉ៅដៃក៏ស្ថិតនៅផ្នែកខាងក្រោយនៃស្មាតហ្វូននេះផងដែរ។ ក្រុមហ៊ុនបច្ចេកវិទ្យា OPPO នៅក្នុងប្រទេសថៃ បានបញ្ជាក់ថា ស្មាតហ្វូន OPPO F9 គឺមានតម្លៃ THB10,990 (~$329)។ នៅក្នុងប្រទេសវៀតណាម ស្មាតហ្វូននេះដែលមានរ៉េមទំហំ 4GB គឺមានតម្លៃ VND 7,990,000 (~$340) ។ នៅកម្ពុជា ការកម្មង់ទិញមុនស្មាតហ្វូន F9 គឺចាប់ផ្តើមហើយ ស្មាតហ្វូននេះ នឹងដាក់លក់នៅលើទីផ្សារនៅចុងខែសីហាខាងមុខនេះ៕
