Galaxy S Series គឺជាស្មាតហ្វូនស៊េរីថ្មីរបស់ក្រុមហ៊ុន Samsung ដែលជាស្មាតហ្វូនមួយនៅក្នុងចំណោមស្មាតហ្វូនថ្នាក់ប្រណិតជាច្រើន។ នៅក្នុងរយៈពេលប៉ុន្មានខែកន្លងមកនេះ មានព័ត៌មានបែកធ្លាយជាច្រើន នៅមុនពេលដែលស្មាតហ្វូន នឹងបង្ហាញខ្លួនជាផ្លូវការ។ ថ្មីៗនេះ យើងគ្រប់គ្នា ក៏បានលឺនូវពាក្យចចាមអារ៉ាមជាច្រើនរបស់ស្មាតហ្វូន Galaxy S10 ផងដែរ ប៉ុន្តែ នេះមិនមែនជារឿងចម្លែលនោះទេ ពីព្រោះថា ក្រុមហ៊ុន Samsung បានខិតខំប្រឹងប្រែងនៅក្នុងការងាររបស់ខ្លួនសម្រាប់ស្មាតហ្វូនម៉ូដែលថ្មីនេះផងដែរ។
នៅពេលនេះ ក្រុមហ៊ុន Samsung ធ្វើការតេស្ត៍ទៅលើស្មាតហ្វូនស៊េរីថ្មី Galaxy S10 ដែលភ្ជាប់ជាមួយនឹងប្រព័ន្ធស្កេនក្រយ៉ៅដៃនៅខាងក្រោយ ដូចគ្នាទៅនឹងស្មាតហ្វូន Galaxy S9 និង Galaxy S8 អញ្ចឹងដែរ។ បើតាមព័ត៌មានកន្លងមក បានបញ្ជាក់ថា ស្មាតហ្វូន Galaxy S10 នេះ ទំនងប្រហែលជានឹងប្រើប្រាស់នូវប្រព័ន្ធស្កេនក្រយ៉ៅដៃក្រោមអេក្រង់ In-Display Fingerprint Scanners នៅផ្នែកខាងមុខក្រោមកញ្ចក់ ដូចបណ្តាស្មាតហ្វូនចិន ដែលបានចេញកន្លងមកដែរ។ ស្មាតហ្វូនម៉ូដែល Galaxy S10 នឹងមានចំនួន 3 ម៉ូដែលនៅឆ្នាំក្រោយនេះ។
រហូតមកដល់ពេលនេះ មានពាក្យចចាមអារ៉ាមជាច្រើន បានបញ្ជាក់ថា ក្រុមហ៊ុន Samsung នឹងធ្វើដូចគ្នាទៅនឹងក្រុមហ៊ុន Apple ដែលបានប្រកាសចេហញនូវទូរស័ព្ទ iPhone ចំនួន 3 របស់ខ្លួននៅក្នុងឆ្នាំនេះអញ្ចឹង។ តាមការប៉ាន់ប្រមាណបញ្ជាក់ថា សម្រាប់ស្មាតហ្វូនចំនួនពីរម៉ូដែលរបស់ Samsun S Series នេះ នឹងប្រើប្រាស់នូវបច្ចេកវិទ្យាស្កេនក្រយ៉ៅដៃក្រោមអេក្រង់ in-glass fingerprint scanner នៅផ្នែកខាងមុខ ស្របពេលដែលម៉ូដែលទី 3 ស្ថិតនៅក្នុងការសង្ស័យនៅឡើយ។ ចំពោះតម្លៃវិញនេះ ក៏បានបង្ហាញផងដែរ ស្មាតហ្វូន Galaxy S10 អាចនឹងមានតម្លៃចាប់ផ្តើមពី $650 ទៅ $700៕