បើគិតមកទល់នឹងពេលនេះទូរស័ព្ទ iPhone X របស់ Apple បានចេញលក់លើទីផ្សារមានរយះពេល 10 ខែមកហើយ។ នៅក្នុងរយះពេលនេះ ការនាំចេញនៃស្មាត ហ្វូនលេងក្បាលឆកមួយនេះ គឺមានចំនួនដល់ទៅ 60 លានគ្រឿងឯណោះ ដែលចំនួននេះ គឺស្មើរនឹងការនាំចេញ iPhone 6 ក្នុងរយះពេល 6 ខែ ហើយរយះពេល 10 ខែការនាំចេញ iPhone 6 មានចំនួន 90 គ្រឿង។
ដោយសារតែ iPhone X មានតម្លៃថ្លៃ ដូចនេះក្នុងរយៈពេល 10 ខែនៃការចេញលក់ គឺវាបានប្រមូលប្រាក់ចំណូលប្រហែលគ្នា នឹងប្រាក់ចំណូលពីការលក់ iPhone 6 ក្នុងរយៈពេលដប់ខែដំបូងដូចគ្នា។ បើយោងតាមទិន្នន័យរបស់ក្រុមហ៊ុន Counterpoint បានឱ្យដឹងថា iPhone X បានរកប្រាក់ចំណូលច្រើនជាងគេបើធៀបនឹងក្រុមហ៊ុន Huawei, Oppo, Vivo និង Xiaomi ក្នុងការចេញលក់នៅរយៈពេល 10 ខែកន្លងមកនេះ។
ទីផ្សារនាំចេញខ្លាំងជាងគេរបស់ iPhone X គឺអាមេរិក និងចិន ដែលទីផ្សារប្រទេសទាំងពីរនេះ គឺមានចំនួននៃការនាំចេញ ជាងពាក់កណ្តាលនៃការនាំចេញសរុបក្នុងរយះពេល 10 ខែកន្លងមកនេះ។ ហើយបើធៀបក្នុងការនាំចេញនៅទីផ្សារប្រទេសឥណ្ឌា គឺបានតែ 1% ប៉ុណ្ណោះនៃចំនួននាំចេញសរុប។ សម្រាប់ការផ្គត់ផ្គងក្នុងទីផ្សារនៃ iPhone X គឺមានតែប្រមាណ 1 ភាគ 3 ប៉ុណ្ណោះនៃការនាំចេញទូរស័ព្ទ iPhone ស៊េរីថ្មីទាំងអស់ក្នុងរយះពេល 10 ខែចុងក្រោយនេះ ប៉ុន្តែវាបានរកប្រាក់ចំណូលអោយ Apple បានពាក់កណ្តាលនៃប្រាក់ចំណូលពីការលក់ iPhone ទាំងអស់ក្នុងរយះពេលដូចគ្នានេះ។
ក្រុមហ៊ុន Counterpoint បានព្យាករណ៍ទុកថា ប្រាក់ចំណូល Apple នឹងកើនឡើងបន្ថែមទៀតក្រោយពីការបង្ហាញចេញ iPhone ជំនាន់ថ្មីកាលពីយប់មិញនេះ ដោយសារនៅក្នុងចំណោមនេះ គឺ iPhone មានតម្លៃធូរថ្លៃដែលប្រើអេក្រង់ LCD និងពីរម៉ូដែលទៀតមានតម្លៃថ្លៃដោយប្រើអេក្រង់ OLED និងអាចប្រើប្រាស់ស៊ីមពីបាន៕
