ក្រុមហ៊ុនប្រទេសហ្វាំងឡង់ HDM Global ដែលជាក្រុមហ៊ុនមេរបស់ក្រុមហ៊ុន Nokia បានបញ្ចេញ Nokia 7.1 ដែលជាទូរស័ព្ទធុនកណ្តាលស៊េរីថ្មីរបស់ខ្លួន ដែលមានការរចនារូបរាងបែបប្រណិតភាព និងមានតម្លៃធូរថ្លៃ ដើម្បីប្រកូតប្រជែងទីផ្សារស្មាតហ្វូនធុនកណ្តាលជាមួយក្រុមហ៊ុនដទៃ។ Nokia 7.1 ត្រូវបានក្រុមហ៊ុនធ្វើការរចនាឡើងយ៉ាងទាន់សម័យជាមួយផ្ទៃខាងក្រោយក្រាលដោយសារធាតុកញ្ចក់ Glossy Glass ដែលមានភាពភ្លឺថ្លា និងខាងមុខក្រាលដោយកញ្ចក់ Notch PureDisplay ទំហំ 5.84” និងមានវ័ណ្ឌជុំវិញតួរជាសារធាតុអាលុយមីញ៉ូម។
អេក្រង់របស់វាជាប្រភេទបន្ទះបង្ហាញ IPS LCD ដែលមានទំហំវិមាត្រ 19:9 ratio ស្រោបការពារពីលើដោយកញ្ចក់ Corning Gorilla Glass 3 មានលទ្ធភាពទ្រទ្រង់ការបង្ហាញចេញក្នុងកម្រិត Full-HD+ ទំហំ 1080x2280px លើផ្ទៃបង្ហាញចេញសរុប 79.9% បានច្បាស់ល្អជាមួយកម្រិតភាពម៉ដ្ឋលើផ្ទៃអេក្រង់ 432ppi ហើយជាពិសេសគឺអេក្រង់របស់វាទ្រទ្រង់នូវមុខងារបង្ហាញកម្រិត HDR10 ថែមទៀតផងដែលពិសេសបំផុតសម្រាប់ការទស្សនាខ្សែវីដេអូដែលមានកម្រិតភាពច្បាស់ខ្ពស់បានច្បាស់ត្រជាក់ភ្នែក។
ចំពោះកំលាំងម៉ាស៊ីនដែលប្រើនៅលើ Nokia 7.1 គឺបន្ទះឈីបធុនកណ្តាលរបស់ Qualcomm ស៊េរី Snapdragon 636 SoC អមកំលាំងដោយរ៉េមពីរជម្រើសគឺ 3GB ឬ 4GB និងមានទំហំផ្ទុកពីរជម្រើសគឺ 32GB និង 64GB ព្រមទាំងផ្តល់លទ្ធភាពអោយយើងដាក់បន្ថែមទំហំម៉េមូរីក្រៅបានប្រភេទ microSD។ ស្មាតហ្វូនម៉ូដែលថ្មីនេះប្រតិបត្តិការដោយ Android 8.1 Oreo ដែលជាផ្នែកមួយនៃ Android One ហើយក្រុមហ៊ុននឹងដាក់អោយបន្ទាន់សម័យឡើងទៅកាន់ Android 9.0 Pie បានក្នុងខែវិចិ្ឆកានាជិតដំណាច់ឆ្នាំនេះ។ សម្រាប់ថ្មរបស់វាវិញគឺមានទំហំ 3,060 មីលីអំពែលម៉ោងទ្រទ្រង់នូវបច្ចេកវិទ្យាសាកថ្មល្បឿនលឿនដែលក្រុមហ៊ុនបានអះអាងថាអាចសាកបញ្ចូលថាមពលថ្មពី 0 ទៅ 50% ប្រើពេលប្រមាណជា 30 នាទី។
ងាកមកផ្នែកកាមេរ៉ាវិញ គឺខាងក្រោយប្រើកញ្ចប់កែវលែនភ្លោះ Carl-Zeiss Optics ដាំបញ្ឈរតាមបណ្តោយតួរអមដោយអំពូល LED Flash មួយគ្រាប់ និងមានកងទ្រនាប់ស្កែនក្រយ៉ៅម្រាមដៃនៅពីក្រោម។ កាមេរ៉ាខាងក្រោយទាំងពីរគ្រាប់របស់ Nokia 7.1 ដោយលែនគោលមានទំហំ 12MP ក្នុង aperture f/1.8 និងមួយទៀតជាលែនជំនួយសម្រាប់ផលិតរូបភាពសខ្មៅ និងផលិតរូបព្រាលផ្ទៃខាងក្រោយដោយប្រើមុខងារ Bokeh Effect។ បន្ថែមពីនេះយើងអាចថតវីដេអូដោយប្រើកាមេរ៉ាមុខ និងកាមេរ៉ាក្រោយទាំងពីរគ្រាប់របស់វាក្នុងពេលដំណាលគ្នាបានថែមទៀតផង។ រីឯកាមេរ៉ាខាងមុខមានទំហំ 8.0MP ក្នុង aperture f/2.0 ទ្រទ្រង់នូវមុខងារ AI-enhanced Face Unlock សម្រាប់ធ្វើការដោះសោរដោយការចំណាំផ្ទៃមុខពីលើការដោះដោយការស្កែនក្រយ៉ៅម្រាមដៃ។
ក្នុងទីផ្សារសហរដ្ឋអាមេរិក Nokia7.1 មានតម្លៃខ្ទង់ $349 និងទីផ្សារអឺរ៉ុបមានតម្លៃខ្ទង់ €319 សម្រាប់ម៉ូដែលមានរ៉េមទំហំ 3GB និងអង្គផ្ទុក 32GB ហើយសម្រាប់ម៉ូដែលមានរ៉េមទំហំ 4GB និងអង្គផ្ទុក 64GB មានតម្លៃខ្ទង់ €349 ជាមួយជម្រើសពីរពណ៌គឺខៀវបែប Gloss Midnight Blue និងទឹកប្រាក់បែប Gloss Steel៕
