ពេលវេលាខានស្អែកនេះ ក្រុមហ៊ុន Huawei នឹងធ្វើការប្រកាសចេញនូវស្មាតហ្វូនចំនួន 3 ម៉ូដែល ប៉ុន្តែស្មាតហ្វូន ដែលគួរអោយចាប់អារម្មណ៍ជាងគេបំផុតនោះ គឺស្មាតហ្វូនថ្នាក់ប្រណិត Huawei Mate 20 Pro។ រហូតមកទល់ពេលនេះ មានព័ត៌មានបែកធ្លាយជាច្រើនអំពីស្មាតហ្វូននេះ។ នៅថ្ងៃនេះ របាយការណ៍ថ្មីមួយ បានធ្វើការទម្លាយនូវអ្វីគ្រប់យ៉ាងរបស់ស្មាតហ្វូននេះផងដែរ។
កន្លងមកមានការបែកធ្លាយថា ប្រព័ន្ធកាមេរ៉ារបស់ស្មាតហ្វូននេះ នឹងមានកម្រិតសេនស័រដល់ទៅ 40MP និងមានការប្រើប្រាស់នូវ f/1.8 Aperture រួមនិងបច្ចេកវិទ្យាថ្មីមួយទៀត ដែលមានឈ្មោះហៅថា “FusionMind” សម្រាប់ធ្វើការបញ្ចូលនូវ 4 ភិចសែល អោយក្លាយជាមួយវិញ ដែលធ្វើឱ្យគុណភាពរូបភាពច្បាស់ បើទោះបីថតនៅក្នុងទីងងឹតក៏ដោយ។ ដូចគ្នាទៅនឹងស្មាតហ្វូន P20 Pro ដែរ ស្មាតហ្វូនស៊េរីថ្មី Mate 20 Pro នឹងប្រើប្រាស់នូវ Telephoto Camera ដែលមានភ្ជាប់ជាមួយនឹង f/2.4 Aperture។ ទោះជាយ៉ាងណាក៏ដោយ កាមេរ៉ានេះមានការពង្រីកពីទំហំ 8-megapixels ទៅ 20MP។ បន្ថែមពីនេះទៀតនោះ សម្រាប់ Lens ថ្មីនេះ គឺអាចទ្រទ្រង់នូវមុខងារ 5x optical zoom ទៀតផង។ សម្រាប់កាមេរ៉ាខាងមុខរបស់ស្មាតហ្វូននេះគឺមានទំហំ 24MP។
ក្រៅពីកាមេរ៉ានេះ ស្មាតហ្វូន Huawei Mate 20 Pro នឹងមានអេក្រង់ទំហំដល់ទៅ 6.39-inch display ជាមួយនឹងគែមកោង និងមុខងារប្រព័ន្ធស្កេនក្រយ៉ៅដៃក្រោមអេក្រង់ផងដែរ។ អេក្រង់របស់ស្មាតហ្វូននេះ មានកម្រិតភាពច្បាស់ដល់ទៅ 3120x1440p។ នៅផ្នែកខាងលើរបស់អេក្រង់នេះមាន Notch ដែលមានបំពាក់នូវបច្ចេកវិទ្យា 3D facial recognition technology ដែលប្រើប្រាស់នូវប្រព័ន្ធ Vertical Surface Emitting Laser (VSEL) ។
យោងតាមការបញ្ជាក់របស់ក្រុមហ៊ុន Huawei បានអោយដឹងថា បន្ទះឈីបថ្មី Kirin 980 នឹងប្រើប្រាស់នៅលើស្មាតហ្វូននេះជាមួយនឹងល្បឿនដល់ទៅ 2.6GHz។ ស្មាតហ្វូននេះ នឹងមានរ៉េមទំហំ 4GB សម្រាប់ទីផ្សារជាច្រើន ហើយសម្រាប់ទីផ្សារនៅអ៊ឺរ៉ុប គឺមានទំហំ 6GB។ ស្មាតហ្វូននេះ មានម៉េមូរីក្នុងម៉ាស៊ីនទំហំ 128GB, 256GB ឬ 512GB ហើយវាក៏អាចធ្វើការបន្ថែមនូវម៉េមូរីខាងក្រៅ 256GB nanoSD ផងដែរ។ សម្រាប់ Version ទំហំរ៉េម 8GB ក៏នឹងមានដាក់លក់ផងដែរ។ ស្មាតហ្វូននេះនឹងប្រើប្រាស់នូវប្រព័ន្ធថាមពលថ្ម 4,200mAh ជាមួយនឹងបច្ចេកវិទ្យា 40W fast charging ដែលត្រូវក្រុមហ៊ុននេះ ហៅថា SuperCharge 2.0 ដែលអាចធ្វើការបញ្ចូលថាមពលថ្មបាន 70% នៅក្នុងរយៈពេល 30 នាទីប៉ុណ្ណោះ។ ស្មាតហ្វូននេះក៏ប្រើប្រាស់នូវប្រព័ន្ធ IP67 ទៅ IP68 ។ សម្រាប់មុខងារជាច្រើនទៀតរបស់ស្មាតហ្វូននេះគឺមានដូចជា NFC, Bluetooth 5.0 និង Gigabit WLAN ជាមួយនឹងប្រព័ន្ធប្រតិបត្តិការ Android 9 Pie និង EMUI 9.0 ផងដែរ។
ស្មាតហ្វូនស៊េរីថ្មី Huawei Mate 20 Pro គឺមានជម្រើស 4 ពណ៌យ៉ាងស្រស់ស្អាត គឺពណ៌ខ្មៅ ពណ៌ខៀវ ពណ៌ Twilight និងពណ៌បៃតង ហើយតម្លៃរបស់ស្មាតហ្វូននេះ អាចនឹងមានតម្លៃដល់ទៅ $1100។ ស្មាតហ្វូននេះ នឹងចាប់ផ្តើមដាក់លក់នៅដើមខែវិច្ឆិកាខាងមុខនេះ ហើយការកម្មង់ទិញមុន គឺបន្ទាប់ពីការប្រកាសនៅថ្ងៃទី 16 ខែតុលាខាងមុខនេះ៕
