ព័ត៌មានថ្មី៖ Galaxy S10 ទាំង 3 ម៉ូដែល អាចនឹងបំពាក់នូវថាមពលថ្មទំហំ 4000mA និងមានអេក្រង់ទំហំ 93.4% ធៀបជាមួយនឹងតួខ្លួន

យោងតាមពាក្យចចាមអារ៉ាមថ្មីមួយដែលបែកធ្លាយចេញពីអនឡាញ បានបង្ហាញថា ស្មាតហ្វូនអេក្រង់ធំរបស់ត្រកូល Galaxy S10 នឹងបំពាក់នូវថាមពលថ្មធំទំហំដល់ទៅ 4000mAh រួមជាមួយនឹងអេក្រង់ទំហំ 93.4% បើធៀបជាមួយនឹងតួខ្លួន។ ប្រភពព័ត៌មានខាងលើបានបញ្ជាក់ផងដែរថា កន្លកមក គឺមានពាក្យចចាមអារ៉ាមជាច្រើន បានបញ្ជាក់ថា ក្រុមហ៊ុន Samsung កំពុងតែធ្វើការនៅលើគំរូជាច្រើនចុងក្រោយបំផុត ដែលអាចនឹងមានការបោះបង់ចោលនូវរន្ធដោតកាសស្តាប់ថែមទៀតផង។ 

រហូតមកដល់ពេលនេះ គ្រប់គ្នាប្រាកដជាបានដឹងហើយថា ក្រុមហ៊ុន Samsung គឺជាក្រុមហ៊ុនមួយដែលស្ថិតនៅក្នុងចំណោមក្រុមហ៊ុនបច្ចេកវិទ្យាជាច្រើន ដែលនៅតែបញ្ចេញនូវស្មាតហ្វូន ដែលមានរន្ធដោតកាសស្តាប់ 3.5mm។ ហើយកន្លងមកនេះមានពាក្យចចាមអារ៉ាមជាច្រើន បានចង្អុលបង្ហាញថា ស្មាតហ្វូន Galaxy S10 ទាំង 3 ម៉ូដែលនេះ មានអេក្រង់ទំហំ 5.8 អ៊ីង និងមួយទៀត មានអេក្រង់ទំហំ 6.44 អ៊ីង។ ស្មាតហ្វូនម៉ូដែលអេក្រង់តូច គឺជា Galaxy S10 ដែលមានតម្លៃថោកដែលមានម៉េមូរីក្នុងម៉ាស៊ីនទំហំ 64GB ហើយនិងមានអេក្រង់រាបស្មើរ ស្របពេលដែលនៅក្នុងប៉ុន្មានឆ្នាំចុងក្រោយនេះ អេក្រង់គែមកោងរបស់ក្រុមហ៊ុន Samsung បង្ហាញខ្លួនជាច្រើនម៉ូដែលមកហើយនោះ។ 

ជាមួយគ្នានេះ ក្រុមហ៊ុន Samsung ត្រូវបានគេរាយការណ៍ថា កំពុងតែធ្វើការនៅលើបច្ចេកវិទ្យាស្កេនក្រយ៉ៅដៃក្រោមអេក្រង់សម្រាប់ស្មាតហ្វូននៅឆ្នាំក្រោយនេះ ហើយបច្ចេកវិទ្យាក្រោមអេក្រង់នេះ ក៏ប្រហែលជាប្រើប្រាស់សម្រាប់កាមេរ៉ា និងសេនស័រជាច្រើនទៀត នឹងប្រើប្រាស់នៅផ្នែកខាងលើនៃអេក្រង់។ ស្មាតហ្វូននេះ នឹងធ្វើការប្រកួតប្រជែងជាមួយនឹងស្មាតហ្វូន Xiaomi Mi Mix 3 ដែលប្រើប្រាស់នូវកាមេរ៉ាខាងមុខ និងសេនស័រជាច្រើនទៀតទៅកាន់ផ្នែកខាងក្រោយជាប្រភេទរុញវិញ។ ក្រុមហ៊ុនបច្ចេកវិទ្យា Samsung ទំនងជាប្រើប្រាស់នូវបច្ចេកវិទ្យាថ្មីនៃអេក្រង់នេះ នៅលើស្មាតហ្វូនជាច្រើនម៉ូដែលនៃ Galaxy S10 ។

ទាក់ទិនទៅនឹងព័ត៍មានរន្ធដោតកាសនេះ ប្រសិនបើក្រុមហ៊ុន Samsung ចង់ដកចេញនូវរន្ធដោតកាសស្តាប់នោះចេញ ក្រុមហ៊ុន ក៏នឹងមានកន្លែងសម្រាប់បំពាក់នូវបច្ចេកវិទ្យាថ្មីនេះដែរ។ កន្លងមកបើទោះបីជាក្រុមហ៊ុន Apple សម្រេចចិត្តដកចេញនូវរន្ធដោតកាសស្តាប់ក៏ដោយ ក្រុមហ៊ុន Samsung និងក្រុមហ៊ុនបច្ចេកវិទ្យាជាច្រើនទៀតក៏នៅតែរក្សានូវរន្ធស្តាប់កាសនេះដដែល៕