អស់រយៈពេលជាច្រើនឆ្នាំ ក្រុមហ៊ុន Samsung បញ្ចេញនូវព័ត៌មានសំខាន់ៗជាច្រើន អំពីស្មាតហ្វូនដែលមានអេក្រង់អាចបត់បានចេញពីក្រុមហ៊ុននេះ កាលពីសប្តាហ៍មុននេះ នៅក្នុងព្រឹត្តិការណ៍ប្រចាំឆ្នាំ Samsung Developer Conference (SDC) 2018 ។ ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ បានបង្ហាញនូវអេក្រង់ដែលអាចបត់បាន Infinity Flex Display ដែលនឹងប្រើប្រាស់នៅលើស្មាតហ្វូនដែលមានអេក្រង់អាចបត់បាន។ សម្រាប់ Concept Creator ក៏ធ្វើការចែករំលែកនូវវីដេអូនៃគំនិតសម្រាប់ការរចនាទៅលើស្មាតហ្វូនដែលមានអេក្រង់ដែលអាចបត់បានរបស់ក្រុមហ៊ុនបច្ចេកវិទ្យា Samsung ដែលផ្អែកទៅលើព័ត៌មានផ្លូវការ និងព័ត៌មានដែលបែកធ្លាយជាមួយនឹងការទម្លាយនូវការរចនារូបរាងយ៉ាងស្រស់ស្អាតគ្រប់ជ្រុងរបស់ស្មាតហ្វូននេះ។
មានការរំពឹងថា ស្មាតហ្វូនដែលមានអេក្រង់អាចបត់បានរបស់ Samsung គឺជាស្មាតហ្វូនស៊េរីថ្មី Galaxy F series។ សម្រាប់ស្មាតហ្វូន ដែលមានអេក្រង់អាចបត់បាន Galaxy F នេះនឹងមានអេក្រង់នៅខាងក្នុង និងអេក្រង់នៅខាងក្រៅ។ ស្មាតហ្វូននេះអាចបើកបានជាសៀវភៅ។ នៅពេលដែលស្មាតហ្វូននេះបត់នោះ កម្រាស់របស់វា គឺមិនសូវជាក្រាស់នោះទេ។ នៅក្នុងវីដេអូនេះ គឺមានការបង្ហាញអំពីគែមគ្រប់ជ្រុងរបស់ស្មាតហ្វូននេះ។ Samsung បានអះអាងថា អេក្រង់ Infinity Flex Display អាចធ្វើការបើក និងបិទយឺតៗ ដើម្បីការពារការបាក់បែកសម្រាប់អេក្រង់ខាងក្នុងរបស់វា។
ក្រុមហ៊ុនបច្ចេកវិទ្យារបស់ប្រទេសកូរ៉េខាងត្បូង បាននិយាយថា សម្រាប់អេក្រង់ខាងក្រៅរបស់ស្មាតហ្វូននេះ គឺមានទំហំ 4.58 inches ហើយសម្រាប់អេក្រង់ខាងក្នុងរបស់ស្មាតហ្វូននេះគឺមានទំហំ 7.3 inches ។ សម្រាប់អេក្រង់ខាងក្នុងរបស់វាគឺទ្រទ្រង់នូវកម្រិតភាពច្បាស់ 1536 2152 pixels និង 4.2:3 aspect ratio ។ សម្រាប់អេក្រង់ខាងក្រៅរបស់ស្មាតហ្វូននេះ ទ្រទ្រង់នូវកម្រិតភាពច្បាស់ 840x960 pixels ជាមួយនឹង 21:9 aspect ratio ។ សម្រាប់គំនិតនៃស្មាតហ្វូន Galaxy F នេះប្រើប្រាស់នូវកាមេរ៉ាភ្លោះបញ្ឈរជាមួយនឹងភ្លើង dual-tone LED flash ស្ថិតនៅផ្នែកខាងក្រោយរបស់វា។ គែមខាងក្រោមនៃអេក្រង់ខាងមុខរបស់ស្មាតហ្វូននេះ គឺមានរន្ធដោត USB-C port និងរន្ធស្តាប់កាស 3.5mm audio jack ។ សម្រាប់កាមេរ៉ាថតរូប Selfie របស់ស្មាតហ្វូននេះគឺស្ថិតនៅផ្នែកខាងលើនៃអេក្រង់ខាងក្រៅ។
សម្រាប់ការរចនារូបរាងរបស់ស្មាតហ្វូននេះគឺមិនមែនជាការរចនាចុងក្រោយបំផុតនៃស្មាតហ្វូនដែលមានអេក្រង់អាចបត់បានរបស់ក្រុមហ៊ុនបច្ចេកវិទ្យា Samsung នោះទេ។ នេះគឺជាគ្រាន់តែជាវីដេអូនៃគំនិតដែលបានមកពីការរចនា និងពាក្យចចាមអារ៉ាមជាច្រើននោះ។ នៅក្នុងរបាយការណ៍ថ្មីៗនេះទម្លាយថា ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះនឹងបង្ហាញនូវ 5G version សម្រាប់ស្មាតហ្វូន Galaxy S10 នៅក្នុងខែមីនាឆ្នាំក្រោយនេះ។ ស្មាតហ្វូននេះ ត្រូវបានគេរំពឹងថានឹងមានតម្លៃប្រហែលជា $1,800 ៕