ក្រុមហ៊ុន vivo គឺត្រៀមខ្លួនក្នុងការប្រកាសបង្ហាញនូវស្មាតហ្វូនស៊េរីថ្មី NEX នៅក្នុងពេលឆាប់ៗនេះ។ ស្មាតហ្វូននេះបែកធ្លាយពីរលើកមកហើយដែលបង្ហាញអំពីមុខងារសំខាន់ៗ គឺការប្រើប្រាស់នូវអេក្រង់ភ្លោះ។ នៅក្នុងពេលនេះ ស្មាតហ្វូននេះ គឺសំដៅទៅលើស្មាតហ្វូន vivo NEX 2 ហើយក្រុមហ៊ុន vivo ចាប់ផ្តើមនូវការចុះឈ្មោះសម្រាប់អតិថិជនដែលចាប់អារម្មណ៍ទៅលើស្មាតហ្វូននេះ និងទំព័រនៃការចុះឈ្មោះក៏មានបង្ហាញនូវលក្ខណៈសម្បត្តិមួយចំនួនរបស់ស្មាតហ្វូននេះផងដែរ។
ស្មាតហ្វូនស៊េរីថ្មី Vivo NEX 2 នេះនឹងបំពាក់នូវបច្ចេកវិទ្យាស្នូលសំខាន់ៗចំនួន 4 នេះបើតាមគេហទំព័រនេះគឺ៖
1. ការបង្ហាញរូបរាងមុនគេនៅក្នុងឧស្សាហកម្ម៖ ខណៈពេលដែលស្មាតហ្វូនស៊េរីថ្មី vivo NEX 2 ត្រូវគេដឹងថានឹងក្លាយជាស្មាតហ្វូនដែលមានអេក្រង់ភ្លោះដំបូងគេបំផុតនៅក្នុងពិភពលោកនោះ ក្រុមហ៊ុន vivo អះអាងថា ការរចនារូបរាងរបស់ស្មាតហ្វូននេះគឺពិតជាខុសប្លែកគ្នាពីអ្វីដែលយើងធ្លាប់បានឃើញពីមុនមក។
2. បទពិសោធន៍នៃប្រព័ន្ធប្រតិបត្តិការថ្មី៖ វាមានការបង្ហាញថា ក្រុមហ៊ុនបច្ចេកវិទ្យា vivo ធ្វើការអភិវឌ្ឍទៅលើ Version ថ្មីនៃ OS របស់ខ្លួនដែលសម្រាប់ប្រើប្រាស់នៅលើស្មាតហ្វូនដែលមានអេក្រង់ភ្លោះនេះ។ យើងពិតជាចង់ ឃើញនូវមុខងារសំខាន់ៗទាំងនោះមែនទែនដែលនឹងប្រើប្រាស់នៅលើ OS ថ្មីនេះ។
3. បទពិសោធន៍កាមេរ៉ាថ្មី៖ ស្មាតហ្វូន NEX 2 នេះក៏នាំយកនូវវិធីថ្មីមួយទៀតក្នុងការប្រើប្រាស់នូវប្រព័ន្ធកាមេរ៉ានៅលើស្មាតហ្វូននេះ។ នៅក្នុងវីដេអូ Teasers នៅលើទំព័រនេះ ស្មាតហ្វូន NEX 2 នឹងមានកាមេរ៉ាខាងក្រោយដល់ទៅ ៣ គ្រាប់។
4. បច្ចេកវិទ្យា AI ថ្មី៖ ស្មាតហ្វូននេះត្រូវគេបញ្ជាក់ថានឹងបំពាក់នូវបច្ចេកវិទ្យា AI ថ្មីផងដែរ។
ក្រៅពីនេះ ស្មាតហ្វូនស៊េរីថ្មី NEX 2 នឹងមានប្រព័ន្ធស្កេនក្រយ៉ៅដៃក្រោមអេក្រង់ដែលនឹងបំពាក់នៅលើស្មាតហ្វូនដែលមានអេក្រង់ភ្លោះនេះដំបូងបំផុត។ ផ្អែកទៅលើទិន្នន័យនៅលើគេហទំព័រមួយនេះ ស្មាតហ្វូនស៊េរីថ្មី vivo NEX 2 នេះអាចនឹងបង្ហាញខ្លួននៅដើមខែនេះ ហើយអ្នកប្រើប្រាស់អាចធ្វើការកម្មង់ទិញស្មាតហ្វូននេះ បានចាប់ពីថ្ងៃទី 11 ខែធ្នូ រហូតដល់ថ្ងៃទី 6 ខែមករា៕