យោងតាមគណនី @OnLeaks ដែលជាប្រភពអាចជឿជាក់បានគឺ បានបង្ហាញសម្បកទូរស័ព្ទដែលភ្ជាប់នូវប្រព័ន្ធកាមេរ៉ាខាងក្រោយនៃស្មាតហ្វូនស៊េរីថ្មី Galaxy S10 ទាំង 3 ម៉ូដែលរបស់ក្រុមហ៊ុនបច្ចេកវិទ្យាយក្ស Samsung កាន់តែច្បាស់។ ប៉ុន្តែនៅក្នុងពេលនេះ យើងវិលត្រលប់ទៅកាន់អ្នកទម្លាយព័ត៌មានម្នាក់ដែលមានឈ្មោះថា Ice Universe ឬហៅថា @UniverseIce វិញម្តង គណនីមួយនេះ បានអះអាងថា ស្មាតហ្វូន Galaxy S10+ នឹងបំពាក់នូវកាមេរ៉ាខាងក្រោយ 3 គ្រាប់ដូចគ្នាទៅនឹងស្មាតហ្វូនប្រភេទ “regular” GS10 ដែរ ប៉ុន្តែសម្រាប់ស្មាតហ្វូន “entry-level” Galaxy S10 Lite នឹងប្រើប្រាស់នូវកាមេរ៉ាខាងក្រោយភ្លោះតែប៉ុណ្ណោះ។
ទន្ទឹមគ្នានេះផងដែរ ស្មាតហ្វូនស៊េរីថ្មី Galaxy S10 និង S10 Lite ក៏មានការរចនានូវកាមេរ៉ាខាងមុខ Selfie មួយគ្រាប់ដូចគ្នាផងដែរ (កាមេរ៉ាតូចសម្រាប់បំពាក់នៅលើអេក្រង់តែម្តង) ស្របពេលដែលស្មាតហ្វូន S10 Plus ពេលនេះត្រូវបានគេរំពឹងថានឹងប្រើប្រាស់នូវកាមេរ៉ាភ្លោះនៅលើអេក្រង់។ នេះគឺជារឿងដ៏ល្អ ខណៈពេលដែលស្មាតហ្វូន Galaxy S9+ គឺមានកាមេរ៉ាសរុបត្រឹមតែ 3 គ្រាប់ប៉ុណ្ណោះ ប៉ុន្តែចុះបើស្មាតហ្វូនស៊េរីថ្មីវិញនោះ គឺមានកាមេរ៉ាដល់ទៅ 6គ្រាប់វិញនោះ? Ice Universe ហាក់ដូចជាមានការជឿជាក់ថា ព័ត៌មានរបស់គាត់គឺជាការពិត ហើយគាត់ប្រាប់ទៅកាន់អ្នកដែល Follow គាត់នៅលើ Twitter ថា “ពេលវេលានឹងធ្វើការបង្ហាញថាតើអ្នកណាដែលគិតត្រូវនោះ?” ដូចនេះ យើងនៅមានព័ត៌មានផ្សេងទៀតដែលពាក់ព័ន្ធជាមួយនឹងរឿងនេះដែលត្រូវតាមដានបន្តផងដែរ។
ថ្មីៗនេះ មានពាក្យចចាមអារ៉ាមជាច្រើន និងព័ត៌មានបែកធ្លាយរបស់ស្មាតហ្វូនស៊េរីថ្មី Galaxy S10+ ដែលត្រូវបានគេនិយាយថា គឺពិតជាអាចទៅរួចជាមួយនឹងកាមេរ៉ាខាងក្រោយ 4 គ្រាប់ គឺគ្រាន់តែជាការភាន់ច្រឡំតែប៉ុណ្ណោះ ប៉ុន្តែវាប្រហែលជាប្រើប្រាស់សម្រាប់ម៉ូដែលពិសេសណាមួយជាក់ជាមិនខាន។ យើងនៅមិនទាន់ដឹងនោះទេថាតើ ស្មាតហ្វូនមួយនេះនឹងមានឈ្មោះហៅថាដូចម្តេចនោះ? ប៉ុន្តែសម្រាប់ការប្រើប្រាស់នូវកាមេរ៉ាដល់ទៅ 6 គ្រាប់នេះ ពិតជានឹងទ្រទ្រង់នូវបច្ចេកវិទ្យា 5G បច្ចេកវិទ្យា super-advanced 3D sensing technology និងការប្រើប្រាស់ម៉េមូរីក្នុងម៉ាស៊ីនរហូតដល់ទៅ 1TB ផងដែរ។ តើវាអាចក្លាយជាការពិតនោះទេ? យើងនៅមិនទាន់ដឹងថារឿងណាជារឿងពិតនៅឡើយទេ៕