ក្រុមហ៊ុន Spigen បានផលិតសំបកស្មាតហ្វូន Huawei P30 និង P30 Pro ដោយមានភ្ជាប់កាលបរិច្ឆេតនៃការប្រកាសជាផ្លូវការ

ជារៀងរាល់ឆ្នាំ មានក្រុមហ៊ុនផលិតសម្បកទូរស័ព្ទរបស់ស្មាតហ្វូនជាច្រើន តែងតែបានទម្លាយជាមុនសម្រាប់ស្មាតហ្វូនស៊េរីថ្មី មុនការប្រកាសបង្ហាញជាផ្លូវការ។ នៅពេលនេះ ក្រុមហ៊ុនផលិតសម្បកទូរស័ព្ទ Spigen បានបង្ហាញថា សម្បកទូរស័ព្ទចុងក្រោយបំផុតនេះ អាចធានាថាជាការពិតប្រាកដមែនទែន។ រូបភាពជាច្រើនសន្លឹកនេះ បានបង្ហាញអំពីម៉ូដែលជាច្រើនរបស់សម្បកការពារទូស័ព្ទរបស់ស្មាតហ្វូន P30 និង P30 Pro របស់ក្រុមហ៊ុន Huawei ពិតជាមានរូបរាងស្រស់ស្អាតមែនទែន។ 

ស្មាតហ្វូនស៊េរីថ្មី Huawei P30 Pro នេះ គឺមានសម្បកទូរស័ព្ទថ្លា TPU Case ហើយវាមានរន្ធកាមេរ៉ាបញ្ឈរចំនួន 4 គ្រាប់ និងភ្លើង LED Flash ចំនួន 2 គ្រាប់ថែមទៀតផង។ សម្រាប់ស្មាតហ្វូន P30 វិញ គឺមានកាមេរ៉ាបញ្ឈរ ហើយវាមានកាមេរ៉ា 3 គ្រាប់ និងភ្លើង Flash ស្ថិតនៅផ្នែកខាងស្តាំនៅក្រោមកាមេរ៉ាយ៉ាងស្រស់ស្អាត។ នៅផ្នែកខាងមុខរបស់ស្មាតហ្វូន Huawei P30 និង P30 Pro ពិតជាមានស៊ុមព័ទ្ធអេក្រង់ស្តើងមែនទែន។ ស្មាតហ្វូននេះ មិនមានប្រព័ន្ធស្កេនក្រយ៉ៅដៃនោះទេ។ នៅលើរូបភាពដែលបែកធ្លាយនេះ បង្ហាញថា ស្មាតហ្វូននេះ អាចនឹងប្រើប្រាស់នូវបច្ចេកវិទ្យាស្កេនក្រយ៉ៅដៃក្រោមអេក្រង់។ 

អ្វីដែលគួរអោយចាប់អារម្មណ៍នោះចេញពីក្រុមហ៊ុនទម្លាយសម្បកទូរស័ព្ទ Spigen នេះ គឺថាស្មាតហ្វូននីមួយៗ គឺភ្ជាប់ជាមួយនឹងកាលបរិច្ឆេទនៅលើរូបភាពទាំងនេះដែលមានតួអក្សរ "MAR 28" ដែលមានន័យថានៅថ្ងៃទី 28 ខែមីនា។ កាលពីម្សិលមិញនេះ ក្រុមហ៊ុន Huawei បានបញ្ជាក់ថា ស្មាតហ្វូន P30 និង P30 Pro នឹងបង្ហាញខ្លួននៅចុងខែមីនានេះ នេះបើយោងតាមព័ត៌មានដែលបញ្ជាក់ពីក្រុមហ៊ុន Spigen៕