ក្រុមហ៊ុន LG Electronics បាននិយាយ កាលពីថ្ងៃទី 21 ខែមីនាថា ស្មាតហ្វូនស៊េរីថ្មីរបស់ខ្លួនគឺ G8 ThinQ នឹងដាក់លក់ជាផ្លូវការនៅក្នុងទីផ្សារក្នុងស្រុកក្នុងសប្តាហ៍នេះហើយ។ ស្មាតហ្វូនស៊េរីថ្មី G8 ThinQ មានតម្លៃ 897.600 វ៉ុន (796 ដុល្លារ) ហើយស្មាតហ្វូននេះ ចាប់ផ្តើមមានដាក់លក់នៅលើទីផ្សារក្នុងស្រុកនៅថ្ងៃទី 22 ខែមីនានេះ ហើយនឹងបន្តទៅទីផ្សារអាមេរិកខាងជើង និងអឺរ៉ុបក្នុងប៉ុន្មានសប្តាហ៍ខាងមុខទៀត។ តម្លៃនេះ មានតម្លៃថ្លៃជាង Samsung Galaxy S10e ដែលជា "ស្មាតហ្វូនមានតម្លៃធូរថ្លៃ" ចុងក្រោយបំផុតរបស់ក្រុមហ៊ុនបច្ចេកវិទ្យាយក្សមួយនេះ ដែលមានតម្លៃ 899 800 វ៉ុន។
ស្មាតហ្វូនស៊េរីថ្មី G8 នេះ មានកាមេរ៉ាខាងមុខដែលប្រើប្រាស់នូវបច្ចេកវិទ្យា 3D ដែលផ្តល់ជូននូវសុវត្ថិភាពកាន់តែប្រសើរ និងទ្រទ្រង់ទៅលើកម្មវិធីកម្រិតខ្ពស់ជាច្រើនទៀតក៏ដូចជាការប្រើប្រាស់បច្ចេកវិទ្យា time-of-flight technology ផងដែរ។ ស្មាតហ្វូន 4G នេះប្រើប្រាស់អេក្រង់ OLED display ដែលអាចប្រើប្រាស់ជាឧបករណ៍បំពងសំលេងគុណភាពសម្លេងល្អជាងមុន ពិរោះបំផុត។ G8 គឺជាស្មាតហ្វូនដំបូងបង្អស់របស់ពិភពលោក ដែលប្រើប្រាស់ជាមួយនឹងការផ្ទៀងផ្ទាត់សរសៃឈាមចេញពីបាតដៃកម្រិតខ្ពស់ (advanced palm vein authentication) ដែលអាចសម្រេចទៅបានដោយការបញ្ចូលគ្នានៃកាមេរ៉ា ToF និងសេនស័រចាប់សញ្ញាអ៊ីនហ្វ្រារ៉េដ។
ស្មាតហ្វូននេះ ក៏មានលក្ខណៈពិសេសគឺ Air Motion ដែលអនុញ្ញាតឱ្យអ្នកប្រើប្រាស់អាចឆ្លើយការខល ការប្តូររវាងកម្មវិធីជាច្រើន ឬឡើងចុះសំលេងដោយមិនចាំបាច់ប៉ះទូរស័ព្ទនោះទេ។ ក្រុមហ៊ុនបច្ចេកវិទ្យា LG និយាយថាខ្លួនគ្រោងនឹងបញ្ចេញស្មាតហ្វូន 5G ដំបូងរបស់ខ្លួនជាមួយនឹងអេក្រង់ពាក់កណ្តាលទីពីរដែលអាចផ្ដាច់បាននៅក្នុងឆមាសទីមួយឆ្នាំនេះ ប៉ុន្តែមិនបានបញ្ជាក់ពីកាលបរិច្ឆេទជាក់លាក់ ឬតម្លៃរបស់វានោះទេ៕
