ថ្មីៗនេះ ក្រុមហ៊ុន Honor ដែលជាក្រុមហ៊ុនកុលសម្ព័ន្ធរបស់ក្រុមហ៊ុនបច្ចេកវិទ្យាយក្ស Huawei បានប្រកាសចេញនូវស្មាតហ្វូនស៊េរីថ្មីបំផុតរបស់ខ្លួន ម៉ូដែល Honor V10 ដ៏ស្រស់ស្អាតបំផុត។ ហើយពេលនេះ មានរូបភាព Poster ថ្មីនៅលើទំព័រផ្លូវការនៅលើបណ្តាញសង្គម Weibo របស់ក្រុមហ៊ុនមួយទៀតហើយ ដោយបានទម្លាយថា ក្រុមហ៊ុន នឹងប្រកាសចេញនូវស្មាតហ្វូនស៊េរីថ្មីមួយទៀតនៅថ្ងៃទី 13 ខែធ្នូខាងមុខនេះ ក៏ប៉ុន្តែយើងនៅមិនទាន់ដឹងថាតើជាស្មាតហ្វូន Honor Note 9 ឬ Honor 9 Lite ។
នៅក្នុងរូបភាព Posters ខាងលើនេះ បានបង្ហាញអំពីតារាចម្រៀង និងតារាសម្តែងជនជាតិចិនឈ្មោះ Hu Ge ដែលពាក់វ៉ែនតាការពារកំដៅថ្ងៃនៅខាងមុខ និងមួយទៀតគាត់ពាក់វ៉ែនតាការពារកំដៅថ្ងៃនៅខាងក្រោយក្បាលរបស់គាត់។ ហើយក៏មានការសរសេរនូវពុម្ពអក្សរពណ៌សចំនួន 4 ផងដែរនៅលើរូបភាពនេះ។ យើងជឿជាក់ថា ស្មាតហ្វូននេះ អាចនឹងមានកាមេរ៉ាភ្លោះទាំងផ្នែកខាងមុខ និងផ្នែកខាងក្រោយ។ គួរបញ្ជាក់ថា ក្រុមហ៊ុន Honor ក៏ធ្លាប់មានស្មាតហ្វូនស៊េរីថ្មីដែលមានកាមេរ៉ា 4 គ្រាប់រួចមកហើយនោះ គឺស្មាតហ្វូន Honor 9i នៅក្នុងប្រទេសឥណ្ឌា ឬស្មាតហ្វូន Huawei Maimang 6 នៅក្នុងប្រទេសចិន ឬស្មាតហ្វូនHuawei Nova 2i នៅក្នុងប្រទេសឥណ្ឌូនេស៊ី ឬស្មាតហ្វូន Huawei Mate 10 Lite នៅក្នុងទីផ្សារនៃប្រទេសជាច្រើនទៀត។
រហូតមកដល់ពេលនេះ មានពាក្យចចាមអារ៉ាមជាច្រើនដែលថា ក្រុមហ៊ុន Honor នឹងប្រកាសស្មាតហ្វូន Honor 9 Lite/Youth ជាមួយនឹងស្មាតហ្វូន Honor V10 ប៉ុន្តែស្មាតហ្វូននេះ គឺមិនបានបង្ហាញខ្លួននោះទេ។ សម្រាប់ព្រឹត្តិការណ៍នាពេលខាងមុខនេះ ទំនងប្រហែលជាការប្រកាសវត្តមានរបស់ស្មាតហ្វូន Honor 9 Lite ឬ Honor Note 9 ។ យ៉ាងណាមិញ ការដាក់លក់ស្មាតហ្វូនមួយដែលមានឈ្មោះច្រើនដល់ទៅ 4 ឬ 5 នៅក្នុងទីផ្សារផ្សេងៗគ្នានោះពិតជាធ្វើឱ្យអ្នកប្រើប្រាស់យល់ច្រឡំមែនទែន៕