Sony ស៊េរីថ្មី ដែលមានឈ្មោះថា H8266 ត្រូវបានបង្ហាញខ្លួននៅលើប្រព័ន្ធ Database នៃក្រុមហ៊ុន AnTuTu នៅថ្ងៃនេះ ដោយបានបង្ហាញពីលក្ខណៈសម្បត្តិរបស់ស្មាតហ្វូននេះផងដែរ។ ស្មាតហ្វូនស៊េរីថ្មីនេះ ទំនងក្លាយជាស្មាតហ្វូននៃម៉ាកយីហោ Xperia ដ៏សំខាន់របស់ក្រុមហ៊ុន Sony ដែលដំណើរការប្រព័ន្ធប្រតិបត្តិការ Snapdragon 845 ហើយវាថែមទាំងដំណើរការនូវបន្ទះឈីបស៊េរីថ្មីចុងក្រោយរបស់ក្រុមហ៊ុន Qualcomm រ៉េមទំហំ 4GB និងម៉េមូរីក្នុងម៉ាស៊ីនទំហំ 64GB ថែមទៀត។
នៅក្នុងបញ្ជីនេះ បានបង្ហាញថា ស្មាតហ្វូន Sony H8266 នឹងប្រើប្រាស់នូវអេក្រង់កម្រិត FHD+ ជាមួយនឹង 2160x1080 ភិចសែលនិងកម្រិត 18:9 (2:1) aspect ratio។ ស្មាតហ្វូន Sony H8266 ប្រហែលជាបំពាក់នូវលក្ខណៈសម្បត្តិខ្លាំងក្លាជាមួយនឹងការរចនារូបរាងគែមកោងថែមទៀតផង។ ស្មាតហ្វូននេះអាចនឹងដំណើរការប្រព័ន្ធប្រតិបត្តិការ Android 8.0 Oreo ។
យោងតាមព័ត៌មានបែកធ្លាយមុននេះ ស្មាតហ្វូន Sony H8266 នឹងបំពាក់នូវថាមពលថ្ម 3240mAh ជាមួយនឹងរន្ធដោត Qnovo Adaptive Charging Support និងប្រព័ន្ធ IP68 សម្រាប់ការពារការជ្រាបទឹក និងធូលីផងដែរ។ ខណៈពេលដែលក្រុមហ៊ុនបច្ចេកវិទ្យាយក្សរបស់ប្រទេសជប៉ុននេះមានគម្រោងក្នុងការប្រកាសបង្ហាញស្មាតហ្វូន H8266 នៅក្នុងព្រឹត្តិការណ៍ MWC 2018 នៅចុងខែកុម្ភៈខាងមុខនេះ។ សូមជំរាបថា Snapdragon 845 គឺជាបន្ទះឈីបចុងក្រោយបំផុត ដែលគេគ្រោងនឹងបំពាក់នៅលើស្មាតហ្វូន Galaxy S9 ដែលត្រៀមដាក់បង្ហាញនៅក្នុងព្រឹត្តិការណ៍ MWC នៅទីក្រុងបាសេឡូណាផងដែរ៕
