ក្រុមហ៊ុន LG Electronics បានទម្លាយចេញនូវព័ត៌មានថា ខ្លួនមានគម្រោងក្នុងការផ្តោតសំខាន់ទៅលើការស្រាវជ្រាវ និងការអភិវឌ្ឍទៅលើគម្រោងជាច្រើននៅឆ្នាំនេះ។ ក្រុមហ៊ុនបច្ចេកវិទ្យានេះ មានគម្រោងក្នុងការវិនិយោគទឹកប្រាក់ 19 ពាន់ពាន់លានដុល្លារវ៉ុន ឬប្រមាណជា 17 ពាន់លានដុល្លារអាមេរិកសម្រាប់គម្រោងជាច្រើនក្នុងការខិតខំប្រឹងប្រែងនៅក្នុងអាជីវកម្មស្មាតហ្វូនរបស់ខ្លួនឡើងវិញ។
សារព័ត៌មាន Korea Herald បានបញ្ជាក់នាពេលថ្មីៗនេះថា LG ពេលនេះកំណត់ទៅលើគំនិតនៃការច្នៃប្រឌិតថ្មីក្នុងការវិនិយោគទៅលើគម្រោង R&D ជាច្រើននៅឆ្នាំ 2018 នេះ។ ក្រុមហ៊ុនបច្ចេកវិទ្យានេះ ក៏មានគម្រោងក្នុងការអភិវឌ្ឍទៅលើបច្ចេកវិទ្យាជាច្រើនទៀតជំនាន់ក្រោយដែលជាសមាសភាករបស់រថយន្ត Modules របស់កាមេរ៉ា សេនស័ររបស់រថយន្តបើកបរដោយខ្លួនឯង និងការប្រើប្រាស់ប្លាស្ទិកសរីរាង្គផងដែរ។ នេះមិនមែនជាអ្វីដែលគួរឱ្យភ្ញាក់ផ្អើលខ្លាំងនោះទេ ដោយសារតែលោក Koo Bon-Joon អគ្គនាយករងរបស់ក្រុមហ៊ុន LG បានប្រកាសនៅក្នុងការប្រជុំមួយជាមួយនឹងនាយកប្រតិបត្តិជាច្រើននាក់កាលពីខែមុននេះម្តងរូចមកហើយ ថាក្រុមហ៊ុនមានគម្រោងទៅលើ R&D នោះ។
លោក Koo បាននិយាយ ថា “ការស្រាវជ្រាវ និងការអភិវឌ្ឍ គឺជាប្រភពសម្រាប់ការរៀបចំនាពេលអនាគត ហើយវាអាចពង្រឹងទៅលើការប្រកួតប្រជែងផ្នែកពាណិជ្ជកម្មផងដែរ។ R&D គឺជាការពង្រីកនូវបច្ចេកវិទ្យា និងភាពជាអ្នកដឹកនាំទៅលើផលិតផល។ នៅក្នុងពេលវេលាដ៏លំបាកនេះ យើងមិនគួរខ្វល់ខ្វាយអំពីលទ្ធផលនៅក្នុងរយៈពេលខ្លីនេះទេ ហើយយើងមិនគួរធ្វេសប្រហែសក្នុងការវិនិយោគទៅលើគម្រោង R&D នេះផងដែរ។”
ក្រុមហ៊ុន LG កំពុងតែធ្វើការពង្រឹងទៅលើការបង្កើនប្រាក់ចំណេញតាមរយៈការបញ្ចេញនូវផលិតផលថ្នាក់ខ្ពស់ជាច្រើន ស្របពេលក្រុមហ៊ុននេះ នឹងផ្តោតទៅលើការរកប្រាក់ចំណូលចេញពីផ្នែកជាច្រើននៃរថយន្ត រ៉ូបូត និងបច្ចេកវិទ្យា AI ជាដើម។ ជំហាននេះ គឺជាវិធីសាស្រ្តថ្មីមួយទៀតរបស់ក្រុមហ៊ុននេះក្នុងការធានាទៅលើការរីកចម្រើនរបស់ក្រុមហ៊ុននេះ បន្ទាប់ពីការកែសម្រួលទៅលើកាលវិភាគក្នុងការបញ្ចេញស្មាតហ្វូនស៊េរីថ្មីរបស់ខ្លួននោះ។
កាលពីដើមខែមុននេះ ក្រុមហ៊ុនបច្ចេកវិទ្យា LG ប្រកាសបង្ហាញថា CES 2018 ក្រុមហ៊ុននេះនឹងលែងអនុវត្តតាមកាលវិភាគរបស់ខ្លួនក្នុងការបញ្ចេញស្មាតហ្វូនស៊េរីថ្មីនេះ។ ជាក់ស្តែង ក្រុមហ៊ុនបច្ចេកវិទ្យា LG ក៏សម្រេចចិត្តក្នុងការសាកល្បងនូវវិធីសាស្ត្រថ្មីដែលមិនប្រកួតប្រជែងជាមួយនឹងដៃគូរបស់ខ្លួននោះទេ។ ក្រុមហ៊ុនបច្ចេកវិទ្យា LG និយាយថា ការទម្លាយបង្ហាញនូវស្មាតហ្វូនស៊េរីថ្មីអាចរក្សានូវវេទិកាល្អសម្រាប់រយៈពេលយូរ។
នៅក្នុងវិធីសាស្រ្តថ្មីនេះ ក្រុមហ៊ុន LG នៅមិនទាន់មានគម្រោងក្នុងការបង្ហាញនូវស្មាតហ្វូនស៊េរីថ្មីក្នុងព្រឹត្តិការណ៍ MWC 2018 នោះទេ។ ជំនួសមកវិញសម្រាប់ស្មាតហ្វូន LG G7 ក្រុមហ៊ុនបច្ចេកវិទ្យា LG នឹងធ្វើការ Upgrade ទៅលើស្មាតហ្វូន LG V30 នៅក្នុងព្រឹត្តិការណ៍នៃការតាំងពិពរណ៍នៅទីក្រុងបាសេឡូណានេះ។ ស្មាតហ្វូននេះមានឈ្មោះហៅថា LG V30+‘α’ ហើយវានឹងប្រើប្រាស់នូវមុខងារនៃបច្ចេកវិទ្យា Google Assistant-based AI ផងដែរ៕
