ថ្មីៗនេះ មានការបែកធ្លាយអំពីស្មាតហ្វូនស៊េរីថ្មី Galaxy S9 និង Galaxy S9+ ដែលមានអេក្រង់ពេញលេញជាមួយនឹងស៊ុមព័ទ្ធអេក្រង់ស្តើងបំផុត។ នៅក្នុងរូបភាពចុងក្រោយបំផុតនេះ ស្មាតហ្វូនស៊េរីថ្មី Galaxy S9 និង Galaxy S9+ មានអេក្រង់គែមកោងនៅផ្នែកខាងមុខ និងផ្នែកខាងក្រោយដែលមានការរចនារូបរាងដូចគ្នាទៅនឹងស្មាតហ្វូន Galaxy S8 និង Galaxy S8+ ទៅលើការរចនារូបរាង។ មនុស្សជាច្រើន នៅតែចាប់អារម្មណ៍ខ្លាំងទៅលើការរចនារូបរាងរបស់ស្មាតហ្វូនស៊េរីថ្មីនេះ។
ដូចអ្វីដែលយើងមើលឃើញនៅលើរូបភាពនេះ ស្មាតហ្វូន Galaxy S9+ បំពាក់នូវប្រព័ន្ធកាមេរ៉ាភ្លោះជាមួយនឹងប្រព័ន្ធស្កេនក្រយ៉ៅដៃនៅផ្នែកខាងក្រោយផងដែរ។ ស្មាតហ្វូននេះ អាចនឹងមានការបន្ថែមនូវ stereo speakers របស់ក្រុមហ៊ុន AKG ផងដែរ។
ស្មាតហ្វូន Galaxy S9 និង Galaxy S9+ នឹងបំពាក់នូវបន្ទះឈីប Snapdragon 845 ដែលមានល្បឿន 2.6GHz នៅក្នុងសហរដ្ឋអាមេរិក និងការប្រើប្រាស់បន្ទះឈីប Exynos 9810 version ដែលមានល្បឿន 2.9GHz។ ស្មាតហ្វូន Galaxy S9 នឹងមានរ៉េមទំហំ 4GB ខណៈពេលដែលស្មាតហ្វូន Galaxy S9+ នឹងមានរ៉េមទំហំ 6GB និងម៉េមូរីក្នុងម៉ាស៊ីនទំហំ 64GB។ ស្មាតហ្វូន Galaxy S9 មានថាមពលថ្ម 3000mAh និងស្មាតហ្វូន Galaxy S9+ នឹងមានថាមពលថ្ម 3500mAh និងប្រព័ន្ធប្រតិបត្តិការ Android 8.0 Oreo ថែមទៀតផង។
ស្មាតហ្វូន Galaxy S9 និង Galaxy S9+ នឹងប្រើប្រាស់កាមេរ៉ា 12MP ដែលមាន F 1.5/2.4 apertures ខណៈពេលដែលស្មាតហ្វូន Galaxy S9+ នឹងមានប្រើប្រាស់កាមេរ៉ាភ្លោះទំហំ 12MP ភ្ជាប់ជាមួយនឹង f/2.4 aperture ផងដែរ។ ក្រុមហ៊ុនបច្ចេកវិទ្យា Samsung ក៏ត្រៀមខ្លួនក្នុងការប្រកាសបង្ហាញស្មាតហ្វូនស៊េរីថ្មី Galaxy S9 និង Galaxy S9+ នៅក្នុងព្រឹត្តិការណ៍ MWC នៅទីក្រុងបាសេឡូណាផងដែរនៅពេលខាងមុខនេះ៕