ស្របពេលដែលក្រុមហ៊ុនផលិតស្មាតហ្វូនក្នុងប្រទេសចិនដូច Xiaomi និង Huawei ជាដើម បានបំពាក់ថាមពលថ្មនៅលើកំពូលស្មាតហ្វូនរបស់ពួកគេដែលមានទំហំធំរហូតដល់ទៅ 4,000mAh ឬក៏ធំជាងនេះ ប៉ុន្តែបើយើងក្រឡេកមកមើលក្រុមហ៊ុនបច្ចេកវិទ្យាយក្សរបស់ពិភពលោក Samsung និង Apple វិញហាក់មិនទាន់ឡើងគីឡូក្នុងការបំពាក់ថាមពលថ្មដែលមានកំលាំងខ្លាំងនៅលើកំពូលស្មាតហ្វូនរបស់ពួកគេនៅឡើង បើទោះបីជាពេលនេះកំពូលស្មាតហ្វូនរបស់ក្រុមហ៊ុនទាំងពីរបានបំពាក់នូវបច្ចេកវិទ្យាអេក្រង់លាតធំរួចហើយក្តី (Galaxy S8+/S9+, មានថ្មខ្នាត 3,500mA, Note 8 មានថ្មខ្នាត 3,300mAh និង iPhone X មានថ្មខ្នាត 2716mAh)។
គេរំពឹងទុកថាកំពូលស្មាតហ្វូន Galaxy Note 9 និង iPhone ជំនាន់ថ្មីដែលនឹងបង្ហាញខ្លួនក្នុងឆ្នាំ 2018 នេះអាចនឹងបង្កើនទំហំថ្មធំជាងជំនាន់មុខៗរបស់ពួកវា។ បើយោងទៅលើព័ត៌មានបែកធ្លាយដែលបានចេញផ្សាយលើកមុនបានអោយដឹងថាកំពូលស្មាតហ្វូនកាត់ហ្វាប់ប្លែតជំនាន់ថ្មី Galaxy Note 9 នឹងត្រូវបានក្រុមហ៊ុនធ្វើការបំពាក់មកជាមួយថ្មធំជាងមុនខ្នាត 3,850mAh ប៉ុន្តែនៅថ្ងៃនេះមានរបាយការណ៍ថ្មីមួយទៀតបានបញ្ជាក់ថា Note 9 អាចនឹងបំពាក់ថ្មធំខ្នាត 4,000mAh ដូចកំពូលស្មាតហ្វូន Huawei P20 Pro និងធំជាងជំនាន់ Note 8 ដែលមានថ្មខ្នាត 3,300mAh។
ប្រភពខាងលើ បានបន្តថាសម្រាប់កញ្ចក់អេក្រង់របស់វាក៏អាចនឹងរីកធំជាងជំនាន់មុខបន្តិចដោយវានឹងបំពាក់នូវកញ្ចក់អេក្រង់ទំហំ 6.4 អ៊ីង (Note 8 ទំហំ 6.3អ៊ីង) និងជាប្រភេទបន្ទះអេក្រង់ Super AMOLED ថ្មីដែលប្រើប្រាស់បច្ចេកវិទ្យាអេក្រង់ជំនាន់ទីពីរ Infinity Display 2.0 ដែល Samsung បានប្រើនៅលើបងប្អូន Galaxy S9។ ហើយអ្វីដែលកាន់តែមានការចាប់អារម្មណ៍បំផុតនោះគឺថា Galaxy Note 9 នឹងក្លាយជាកំពូលស្មាតហ្វូនដំបូងរបស់ Samsung ដែលប្រើប្រាស់បច្ចេកវិទ្យាស្កែនក្រយ៉ៅម្រាមដៃក្រោមកញ្ចក់អេក្រង់ (In-Display Scanner)។
ដោយឡែកសម្រាប់កំលាំងម៉ាស៊ីនរបស់វាវិញអាចនឹងប្រតិបត្តិការនៅលើបន្ទះឈីប Exynos 9810 ឬ Snapdragon 845 ខ្នាត 10nm ប្រើប្រាស់បច្ចេកវិទ្យាផលិតជំនាន់ទី2 (2nd-Gen 10nm process) ហើយនឹងមានរ៉េមទំហំ 6GB ជាមួយអង្គផ្ទុកទិន្នន័យទំហំ 128GB (អាចបន្ថែមទំហំម៉េមេរីក្រៅបាន)។ រីឯកាមេរ៉ារបស់វាវិញត្រូវបានគេព្យាករណ៍ថា Samsung អាចនឹងធ្វើការអភិវឌ្ឍន៍បន្ថែមពីលើកាមេរ៉ាភ្លោះរបស់ Galaxy S9+ ដើម្បីធ្វើអោយការថតរូប និងវីដេអូនៅលើ Note 9 កាន់តែមានលក្ខណៈពិសេសបំផុតស៊ីដាច់កាមេរ៉ាកំពូលស្មាតហ្វូនដទៃ៕
