រហូតមកដល់ពេលនេះ នៅសល់តែរយៈពេលជាង 1 សប្តាហ៍ទៀតប៉ុណ្ណោះ មុនពេលនៃការប្រកាសចេញនូវស្មាតហ្វូនស៊េរីថ្មី Xiaomi Mi 6X ដែលជាស្មាតហ្វូនជំនាន់ថ្មីទៀតរបស់ Xiaomi នៅក្នុងឆ្នាំ 2018 នេះ។ កាលពីប៉ុន្មានថ្ងៃមុននេះ មានរូបភាពផ្លូវការ Renders របស់ស្មាតហ្វូននេះ បានបែកធ្លាយនៅលើអនឡាញ។ ពេលនេះ ថែមទៀតទាំងមានវីដេអូផ្សព្វផ្សាយពាណិជ្ជកម្មផ្លូវការផងដែរ។
នៅក្នុងវីដេអូផ្សព្វផ្សាយថ្មីនេះ បានបញ្ជាក់ថា ស្មាតហ្វូនស៊េរីថ្មីនេះ នឹងមានប្រព័ន្ធកាមេរ៉ាភ្លោះបញ្ឈរ ហើយក៏មានបំពាក់នូវប្រព័ន្ធស្កេនក្រយ៉ៅដៃនៅខាងក្រោយផងដែរ។ ស្មាតហ្វូននេះ នឹងមានពណ៌ខ្មៅ ក្រហម មាស និងខៀវសម្រាប់ជ្រើសរើស។
លក្ខណៈសម្បត្តិមួយទៀតដែលបញ្ជាក់នៅចុងវីដេអូនេះគឹបង្ហាញអំពីសមត្ថភាពនៅលើប្រព័ន្ធកាមេរ៉ារបស់វានោះ។ ស្មាតហ្វូន Xiaomi Mi 6X ត្រូវបានក្រុមហ៊ុនបំពាក់នូវកាមេរ៉ាខាងក្រោយភ្លោះទំហំ 20MP+8MP ហើយនឹងមានកាមេរ៉ាខាងមុខទំហំ 20MP ផងដែរ។ យោងតាមការបញ្ជាករបស់ Xiaomi បានអោយដឹងថា ស្មាតហ្វូនស៊េរីថ្មី Xiaomi Mi 6X នឹងបង្ហាញខ្លួននៅថ្ងៃទី 25 ខែមេសាខាងមុខនេះ ហើយនេះ គឺជាជំនាន់បន្ទាប់របស់ស្មាតហ្វូន Mi 5X។
បើតាមដឹងគឺថា ស្មាតហ្វូននេះ នឹងមានអេក្រង់ទំហំ 5.99” 2160x1080 display ជាមួយនឹងកម្រិត 18:9 aspect ratio។ ជាមួយគ្នានេះ ក៏មានពាក្យចចាមអារ៉ាមមួយចំនួន បានបញ្ជាក់ផងដែរថា ស្មាតហ្វូនស៊េរីថ្មីនេះ នឹងដំណើរការនូវបន្ទះឈីប Snapdragon 626 processor ឬ Helio P60 SoC ឬ Snapdragon 660។ សម្រាប់រ៉េមរបស់ស្មាតហ្វូនស៊េរីថ្មីនេះ អាចនឹងមានទំហំ 4GB/64GB និង 6GB/128GB។ ស្មាតហ្វូននេះ នឹងដំណើរការប្រព័ន្ធប្រតិបត្តិការ Android Oreo និងថាមពលថ្ម 2910mAh៕
