ការនាំចេញស្មាតហ្វូនស៊េរីថ្មី Samsung Galaxy S9 គឺមានចំនួនលើសពី 8 លានគ្រឿងនៅក្នុងការដាក់លក់នៅក្នុងខែដំបូង នេះបើតាមការបញ្ជាក់របស់អ្នកវិភាគជាច្រើននោះ។ ទោះបីជាស្មាតហ្វូនស៊េរីថ្មី Galaxy S9 នេះមានការដាក់លក់នៅក្នុងទីផ្សារជាច្រើនបន្ទាប់ពីការបង្ហាញខ្លួនក៏ដោយ វាហាក់ដូចជាមិនលក់ខ្លាំងក្លាដូចស្មាតហ្វូន Galaxy S8 ដែលដាក់លក់កាលពីឆ្នាំមុននេះទេ នេះបើតាមការបញ្ជាក់របស់អ្នកវិភាគនៅ Canalys ។
ដូចអ្វីដែលបានលើកឡើងនៅក្នុងរបាយការណ៍នេះ ក្រុមហ៊ុន Samsung ធ្វើការដឹកជញ្ជូនស្មាតហ្វូនបានចំនួន 8 លានគ្រឿងរបស់ Galaxy S9 និង Galaxy S9+ នៅក្នុងរយៈពេលនៃការលក់ 30 ថ្ងៃដំបូង ហើយចំនួននេះគឺស្រដៀងគ្នាទៅនឹងចំនួននៃការនាំចេញស្មាតហ្វូន Galaxy S8 Series កាលពីឆ្នាំមុននេះ។ បន្ថែមពីនេះទៀត សម្រាប់ប្រព័ន្ធកាមេរ៉ាភ្លោះរបស់ស្មាតហ្វូន Galaxy S9+ គឺមានការពេញនិយមខ្លាំងក្លាជាង ហើយវាក៏ផ្តល់នូវប្រាក់ចំណេញច្រើនសម្រាប់ក្រុមហ៊ុនSamsung ផងដែរ។ ការនាំចេញស្មាតហ្វូន 8 លានគ្រឿងនេះ វាមានស្មាតហ្វូន 2.8 លានគ្រឿងដែលដាក់លក់សម្រាប់អតិថិជនរបស់សហរដ្ឋអាមេរិក និងច្រើនជាង 1 លានគ្រឿងនៅក្នុងប្រទេសកូរ៉េខាងត្បូងនោះ។ ភាពពេញនិយមនៃស្មាតហ្វូនស៊េរីថ្មីរបស់ក្រុមហ៊ុន Samsung មានការធ្លាក់ចុះផងដែរបើពិនិត្យមើលទៅលើឆ្នាំ 2016 ដែលជាពេលប្រកាសបង្ហាញ Galaxy S7 និង Galaxy S7 Edge នោះគឺមានសន្ទុះខ្លាំងបំផុត។
ស្មាតហ្វូនទាំងពីរនេះគឺមានការលក់ច្រើនជាង 9 លានគ្រឿងនៅក្នុងការលក់ខែដំបូងនៅខែមីនាឆ្នាំ 2016 ដែលពេលនេះវាមានការនាំចេញសរុបចំនួន 48 លានគ្រឿងនៅក្នុងរយៈពេល 12 ខែនោះ។ ស្មាតហ្វូន Galaxy S8 និង S8+ វិញគឺមានការលក់បានចំនួន 41 លានគ្រឿងនៅក្នុងរយៈពេលមួយឆ្នាំដំបូង។ នៅឆ្នាំនេះ វាមានការប៉ាន់ស្មានថា ស្មាតហ្វូន Galaxy S9 នឹងមានការលក់បានចំនួនដល់ទៅ 45 លានគ្រឿង។ យ៉ាងណាមិញ តម្លៃរបស់ស្មាតហ្វូនថ្នាក់ប្រណិតនេះក៏ជាក្តីបារម្ភសម្រាប់ក្រុមហ៊ុន Samsung ផងដែរ។
ដោយសារតែមានការបង្ខំអោយធ្វើការបញ្ចុះតម្លៃទៅលើស្មាតហ្វូនស៊េរីថ្មីដើម្បីរក្សានូវចំនួននៃការលក់ និងការកើនឡើងនៃក្រុមហ៊ុនផលិតស្មាតហ្វូនមធ្យមជាច្រើន ក្រុមហ៊ុនបច្ចេកវិទ្យា Samsung ប្រហែលជាមិនអាចធ្វើការផ្តោតទៅលើស្មាតហ្វូនតម្លៃថ្លៃខ្លាំងតទៅទៀតនោះទេ។ ស្មាតហ្វូនជាច្រើនដូចជា Huawei’s P20 Pro ក៏មានតម្លៃថោកជាងស្មាតហ្វូនរបស់ក្រុមហ៊ុន Samsung ផងដែរ។ ជាមួយនឹងស្មាតហ្វូន Galaxy S9 ត្រូវគេរំពឹងថានឹងបង្ហាញខ្លួននៅក្នុងរដូវក្តៅខាងមុខនេះ ហើយវានៅមិនមានរយៈពេលយូរនោះទេ៕