ក្រុមហ៊ុបច្ចេកវិទ្យាយក្ស Samsung គឺនៅតែបន្តស្វែងរកនូវបច្ចេកវិទ្យាអ្វីដែលថ្មីសម្រាប់ស្មាតហ្វូន Galaxy S9 និង Galaxy S9+ ដែលទើបតែបង្ហាញខ្លួននៅមិនទាន់យូរប៉ុន្មាននោះ។ ក្រុមហ៊ុនបច្ចេកវិទ្យាយក្សនេះក៏ត្រៀមខ្លួនក្នុងការប្រកាសបង្ហាញនូវស្មាតហ្វូនស៊េរីថ្មីម៉ូដែល Galaxy S10 នៅឆ្នាំក្រោយនេះផងដែរ។ ប៉ុន្តែអ្នកគាំទ្រមួយចំនួននៅតែបញ្ចេញនូវគំនិតជាច្រើនរបស់លក្ខណៈសម្បត្តិ និងរូបរាងរបស់ស្មាតហ្វូន Galaxy S10 នេះផងដែរ។ នេះគឺជាអ្វីដែល Concept Creator បង្កើតឡើង និងបង្ហោះនៅលើ YouTube នោះ។
វីដេអូរបស់ក្រុម Concept គឺមិនមែនជាស្មាតហ្វូនពិតប្រាកដនោះទេ ប៉ុន្តែគំនិតនៃការរចនារបស់ស្មាតហ្វូននេះគឺពិតជាទាក់ទាញខ្លាំងមែនទែន។ នៅក្នុងករណីនេះ ស្មាតហ្វូន Galaxy S10 នឹងផលិតឡើងពីលោហធាតុ និងកញ្ចក់ ហើយវានឹងប្រើប្រាស់នូវប្រព័ន្ធកាមេរ៉ាភ្លោះបញ្ឈរនៅផ្នែកខាងក្រោយថែមទៀត។ ស្មាតហ្វូននេះប្រើប្រាស់នូវរន្ធដោត USB Type-C port នៅផ្នែកខាងក្រោមរបស់ស្មាតហ្វូននេះ ហើយវាក៏មានប្រើប្រាស់នូវ Loudspeaker និងរន្ធដោតកាសស្តាប់ 3.5mm headphone jack ។ នៅផ្នែកខាងស្តាំរបស់ស្មាតហ្វូននេះគឺមានប្រើប្រាស់នូវប៊ូតុង Power ខណៈពេលដែលប៊ូតុង Volume និង Bixby ស្ថិតនៅផ្នែកខាងឆ្វេងរបស់ស្មាតហ្វូននេះផងដែរ។
អ្វីដែលទាក់ទាញបំផុតរបស់ស្មាតហ្វូន Galaxy S10 គឺការប្រើប្រាស់នូវស៊ុមព័ទ្ធអេក្រង់ស្តើងនៅគែមរបស់អេក្រង់នេះ។ គែមរបស់អេក្រង់នេះគឺស្ទើរតែគ្មានស៊ុមតែម្តងខណៈពេលដែលគែមផ្នែកខាងលើ និងផ្នែកខាងក្រោមរបស់វាពិតជាស្តើងជាងស្មាតហ្វូន Galaxy S9 ថែមទៀត។ ស្មាតហ្វូននេះក៏មានការរចនាជាមួយនឹងអេក្រង់គែមកោងដែលពិតជាមានភាពទាក់ទាញខ្លាំងមែនទែន។ គំនិតនៃការរចនាទៅលើស្មាតហ្វូន Galaxy S10 ក៏មានការផ្តល់នូវពណ៌ច្រើនសម្រាប់ជ្រើសរើសផងដែរដូចជាពណ៌ក្រហម ពណ៌ទឹកប្រាក់ ពណ៌ខៀវ និងពណ៌ខ្មៅ៕