លោក Pete Lau ដែលជានាយកប្រតិបត្តិរបស់ក្រុមហ៊ុន OnePlus បានបញ្ចេញនូវរូបភាពស្រស់ស្អាតជាច្រើនសន្លឹក ដែលថតដោយកាមេរ៉ារបស់ស្មាតហ្វូនស៊េរីថ្មីទៅក្នុងគណនី Weibo របស់គាត់។ រូបភាពជាច្រើនសន្លឹកនេះ ត្រូវបានថតនៅក្នុងទីក្រុង Stanford, California ដែលគេប៉ាន់ស្មានថាទំនងប្រហែលជាប្រើប្រាស់នូវស្មាតហ្វូន OnePlus 6។ ទាំងនេះ គឺជារូបភាពដែលចែករំលែកដោយលោក Lau។
រូបភាពថ្មីៗជាច្រើនសន្លឹកនេះ បានទម្លាយថា ស្មាតហ្វូន OnePlus 6 អាចធ្វើការថតរូបភាពបានច្បាស់ល្អនៅក្នុងលក្ខខណ្ឌដែលមានពន្លឺច្បាស់ ដែលអាចធ្វើការថតរូបភាពស្រស់ស្អាតទាក់ទាញជាមួយនឹងការប្រើប្រាស់នូវ bokeh effect បានទៀតផង។ នៅពេលឆាប់ៗខាងមុខនេះ ក្រុមហ៊ុន OnePlus គ្រោងនឹងបង្ហាញរូបភាព ដែលថតដោយស្មាតហ្វូននេះ នៅក្នុងទីកន្លែងដែលងងឹតផងដែរ។
តាមរយៈរូបភាពដែលបែកធ្លាយជាច្រើនរបស់ស្មាតហ្វូន OnePlus 6 នេះ បានបង្ហាញថា ស្មាតហ្វូននេះ នឹងប្រើប្រាស់នូវប្រព័ន្ធកាមេរ៉ាភ្លោះ 20MP+16MP។ ស្មាតហ្វូន OnePlus 5T ដែលបង្ហាញខ្លួនកាលពីឆ្នាំមុននេះ ក៏មានភ្ជាប់ជាមួយនឹងកាមេរ៉ាដូចគ្នានេះដែរ។ ពេលនេះ នៅមិនទាន់មានព័ត៌មានលម្អិតរបស់វានៅឡើយទេ ប៉ុន្តែកាមេរ៉ារបស់ស្មាតហ្វូន OnePlus 6 គឺមានការពង្រឹងទៅលើសមត្ថភាពជាច្រើន បើធ្វើការប្រៀបធៀបជាមួយនឹងស្មាតហ្វូន OnePlus 5T នោះ។
បន្ទាប់ពីរូបភាពថតនៅក្នុងទីក្រុង Stanford, California នេះ មានការសន្និដ្ឋានថា នាយកប្រតិបត្តិរបស់ក្រុមហ៊ុន OnePlus គឺស្ថិតនៅក្នុងសហរដ្ឋអាមេរិកក្នុងការត្រៀមខ្លួនប្រកាសចេញនូវស្មាតហ្វូន OnePlus 6។ ព័ត៌មានបែកធ្លាយជាច្រើន កាលពីពេលមុននេះ បានទម្លាយថា ស្មាតហ្វូន OnePlus 6 នឹងមានអេក្រង់ 6.28-inch Notched Display, បន្ទះឈីប Snapdragon 845, រ៉េមទំហំ 6GB និង 8GB និងមានម៉េមូរីទំហំ 256 GB UFS 2.1 storage។ ស្មាតហ្វូននេះ នឹងមានថាមពលថ្ម 3,450mA។ ក្រុមហ៊ុន OnePlus ត្រូវបានគេដឹងថា នឹងប្រើប្រាស់នូវបច្ចេកវិទ្យា Dash Charge V2 នៅលើស្មាតហ្វូន OnePlus 6 ដែលអនុញ្ញាតឱ្យអ្នកប្រើប្រាស់ប្រើវា បានពេញមួយថ្ងៃដោយគ្រាន់តែបញ្ចូលថ្មនៅក្នុងរយៈពេលតែ 20 នាទីនោះ។
នៅដើមខែនេះ ប្រភពជាច្រើនចេញពី GizmoChina បានទម្លាយថា ស្មាតហ្វូន OnePlus 6 ដែលមានម៉េមូរីទំហំ 64GB/128 GB និង 256GB គឺលក់នៅក្នុងតម្លៃ 3,299 Yuan (~$525), 3,799 Yuan (~$605) និង 4,399 Yuan (~$700) នៅក្នុងប្រទេសចិន។ ស្មាតហ្វូននេះ អាចនឹងបង្ហាញខ្លួនជាផ្លូវការនៅថ្ងៃទី 5 ខែឧសភា នៅក្នុងប្រទេសចិន ជាមួយនឹងពណ៌ថ្មី Blue Coral ផងដែរ៕
