ស្មាតហ្វូនស៊េរីថ្មីរបស់ក្រុមហ៊ុន Xiaomi គឺស្មាតហ្វូន Mi 8 ដែលនឹងបង្ហាញខ្លួនជាមួយនឹងគែមកោងនៅប៉ុន្មានថ្ងៃខាងមុខនេះ ប៉ុន្តែយើងនៅមិនទាន់បានដឹងអំពីលក្ខណៈសម្បត្តិរបស់ស្មាតហ្វូននេះនៅឡើយនោះទេ។ បើតាមព័ត៌មានច្បាស់មួយបានិយាយថា ស្មាតហ្វូនXiaomi Mi 8 នេះ នឹងប្រកាសបង្ហាញខ្លួនជាផ្លូវការនៅថ្ងៃទី 31 ខែឧសភាខាងមុខនេះ ហើយព័ត៌មាននេះ គឺបានបញ្ជាក់ដោយក្រុមហ៊ុនផលិតស្មាតហ្វូនរបស់ចិននេះតែម្តង។
បើទោះបីជាយើងនៅសល់រយៈពេលមួយសប្តាហ៍ទៀតទើបដល់ថ្ងៃប្រកាសបង្ហាញនោះ លក្ខណៈសម្បត្តិរបស់ស្មាតហ្វូននេះ ក៏បង្ហាញខ្លួននៅលើអនឡាញផងដែរ។ ស្មាតហ្វូន Mi 8 នឹងមានលក្ខណៈសម្បត្តិដូចគ្នាទៅនឹងស្មាតហ្វូនថ្នាក់ប្រណិតជាច្រើនទៀតដែលដាក់លក់នៅលើទីផ្សារនោះ។ អ្វីដែលសំខាន់នោះ ស្មាតហ្វូនជាច្រើនរបស់ក្រុមហ៊ុនបច្ចេកវិទ្យា Xiaomi គឺមានតម្លៃថោកជាងស្មាតហ្វូនរបស់ដៃគូប្រកួតប្រជែង ហើយនេះ គឺជាហេតុផលដែលស្មាតហ្វូននេះពេញនិយមនៅលើទីផ្សារនោះ។ ស្មាតហ្វូន Mi 8 ត្រូវគេរំពឹងថា នឹងប្រើប្រាស់នូវបន្ទះឈីប Qualcomm Snapdragon 845 រ៉េមទំហំ 6GB និងម៉េមូរីក្នុងម៉ាស៊ីនទំហំ 128GB។
ស្មាតហ្វូននេះមានអេក្រង់ទំហំ 6.2-inch IPS display ជាមួយនឹងកម្រិតភាពច្បាស់ FHD+ (2200x1080 pixels)។ សម្រាប់អ្នកដែលចូលចិត្តថតរូបភាពនឹងពេញចិត្តជាមួយនឹងស្មាតហ្វូននេះដោយសារតែវាប្រើប្រាស់នូវប្រព័ន្ធកាមេរ៉ាភ្លោះ (20MP+16MP) នៅខាងក្រោយ និងកាមេរ៉ាខាងមុខទំហំ 16MP សម្រាប់ថតរូបភាពថែមទៀតផង។ ស្មាតហ្វូន Xiaomi Mi 8 បំពាក់នូវថាមពលថ្មដែលមានថាមពល 3,300 mAh និងប្រព័ន្ធប្រតិបត្តិការ Android 8.1 Oreo ហើយវាមានទម្ងន់ 172g និងកម្រាស់ស្តើងត្រឹមតែ 7.8mm នោះ។ ស្មាតហ្វូននេះនឹងបង្ហាញខ្លួននៅក្នុងប្រទេស ហើយក្រុមហ៊ុនXiaomi នឹងនាំយកស្មាតហ្វូននេះទៅកាន់ទីផ្សារនៅក្នុងពេលឆាប់ៗខាងមុខនេះផងដែរ៕