ក្រុមហ៊ុនបច្ចេកវិទ្យាយក្ស Samsung បានបាត់បង់នូវចំណែកទីផ្សារស្មាតហ្វូនរបស់ខ្លួន ជាបន្តបន្ទាប់នៅក្នុងទីផ្សារស្មាតហ្វូននេះ ដោយនៅក្នុងពេលថ្មីៗនេះ នៅប្រទេសចិន គឺមានការធ្លាក់ចុះរហូតដល់នៅសល់ត្រឹមតែក្រោម 1%។ នេះគឺជាភាពបរាជ័យដ៏ធំមួយរបស់ក្រុមហ៊ុនកូរ៉េមួយនេះ ដែលបាត់បង់នូវចំណែកទីផ្សារនៅក្នុងប្រទេសអាស៊ីមួយនេះ ដែលត្រូវបានគេចាត់ថា ជាទីផ្សារស្មាតហ្វូនធំបំផុតនៅក្នុងពិភពលោកនោះ។
ប៉ុន្តែទោះជាមានរឿងយ៉ាងនេះក៏ដោយ នៅក្នុងទីផ្សារស្មាតហ្វូនធំបំផុតទីពីររបស់ពិភពលោក គឺប្រទេសឥណ្ឌានោះ ក្រុមហ៊ុន Samsung បានបន្តនូវការប្រកួតប្រជែងរបស់ខ្លួនជាច្រើនជាមួយនឹងក្រុមហ៊ុនម៉ាកយីហោជាច្រើនរបស់ចិន ដោយធ្វើបានយ៉ាងល្អ។ ដើម្បីធ្វើការទប់ទល់ជាមួយនឹងការប្រកួតប្រជែងដ៏ខ្លាំងក្លាពីដៃគូជាច្រើន នៅក្នុងពេលថ្មីៗនេះ ក្រុមហ៊ុបកូរ៉េមួយនេះបានបញ្ចេញនូវស្មាតហ្វូន Galaxy J8, Galaxy J6, Galaxy A6 និង A6+ នៅក្នុងប្រទេសឥណ្ឌាផងដែរ។
នៅក្នុងរបាយការណ៍ជាច្រើននៅក្នុងការ បញ្ចេញនូវស្មាតហ្វូននេះ លោក Sumit Walia ដែលជាអគ្គនាយករបស់ក្រុមហ៊ុន Samsung នៅក្នុងប្រទសឥណ្ឌា បានផ្តល់នូវការយល់ដឹងដ៏គួរឱ្យចាប់អារម្មណ៍ជាច្រើនទៅលើដំណើរការរបស់ក្រុមហ៊ុន Samsung នៅក្នុងប្រទេសនេះផងដែរ។ ក្រុមហ៊ុន Samsung បានអះអាងថា ខ្លួនមានចំណែកទីផ្សារដល់ទៅ 40% ចាប់ផ្តើមជាមួយនឹងប្រាក់ចំណូលដ៏ច្រើននេះ ក្រុមហ៊ុន Samsung មានកំណើន 27% ដែលមានតម្លៃស្មើទៅនឹងទឹកប្រាក់ 5 ពាន់លានដុល្លារអាមេរិកនៅក្នុងប្រទេសឥណ្ឌាសម្រាប់ឆ្នាំ 2017។ ក្រុមហ៊ុននេះ បានបញ្ចប់នៅក្នុងឆមាសទី 1 ឆ្នាំ 2018 ជាមួយនឹងចំណែកទីផ្សារដល់ទៅ 40%។
ជាមួយនឹងការបង្ហាញនូវស្មាតហ្វូនស៊េរីថ្មីៗជាច្រើននោះ ក្រុមហ៊ុន Samsung មានការរំពឹងថានឹងមានការកើនឡើងចំណែកទីផ្សារ 5% ទៀតផងដែរ។គ្រប់ផលិតផលទាំងអស់ដែល បានដាក់លក់នៅក្នុងប្រទេសឥណ្ឌា គឺមានការផលិតនៅក្នុងរោងចក្រនៅក្នុងទីក្រុង Noida។ ក្រុមហ៊ុននេះ រំពឹងថា រោងចក្រនេះ នឹងធ្វើការផលិតនូវស្មាតហ្វូន 120 លានគ្រឿងនៅត្រឹមឆ្នាំ 2020។ ក្រុមហ៊ុន Samsung ក៏មានគម្រោងក្នុងការនាំចេញស្មាតហ្វូនចេញពីប្រទេសនេះផងដែរ៕