ថ្ងៃនេះ មានពាក្យចចាមអារ៉ាមថ្មីបំផុតមួយ បាននិយាយថា ស្មាតហ្វូនស៊េរីថ្មី Galaxy S10 ដែលបង្ហាញខ្លួននៅក្នុងប្រទេសកូរ៉េខាងត្បូងនាពេលដ៏ខ្លីនេះ ត្រូវបានគេអះអាងថា នឹងប្រើប្រាស់នូវប្រព័ន្ធកាមេរ៉ាចំនួន 3 គ្រាប់នៅផ្នែកខាងក្រោយ ដូចដែលក្រុមហ៊ុន Huawei បានប្រើប្រាស់នៅលើស្មាតហ្វូន P20 Pro កាលពីពេលថ្មីៗនេះដែរ។ លោក Kim Dong-won អ្នកវិភាគរបស់ក្រុមហ៊ុន KB Securities បានបញ្ជាក់ថា “Samsung ដែលមានតម្រូវការតិចសម្រាប់ស្មាតហ្វូន Galaxy S9 និង Galaxy S9 Plus ជាងការរំពឹងទុកនោះ នឹងធ្វើការពិចារណាក្នុងការប្រើប្រាស់នូវកាមេរ៉ា 3 គ្រាប់នៅលើស្មាតហ្វូនថ្នាក់ប្រណិតរបស់ខ្លួនជាមួយនឹងមុខងារ 3-D sensor នោះ។”
អ្នកវិភាគរូបនេះ ជឿជាក់ថា ក្រុមហ៊ុន Samsung ពិតជាចង់ប្រើប្រាស់នូវកាមេរ៉ា 3 គ្រាប់ទៅលើស្មាតហ្វូន Galaxy S10 ដោយសារតែទូរស័ព្ទ “iPhone X Plus” ប្រហែលជាប្រើប្រាស់នូវប្រព័ន្ធកាមេរ៉ា 3 គ្រាប់នៅពេលដែលវាបង្ហាញខ្លួននៅក្នុងឆ្នាំ 2019 នោះ។ ប្រសិនបើនេះ គឺជាការពិតមែននោះ ក្រុមហ៊ុន Samsung ពិតជាចង់យកឈ្នះក្រុមហ៊ុន Apple ជាមួយនឹងការបញ្ចេញនូវស្មាតហ្វូនដែលមានកាមេរ៉ា 3 គ្រាប់នៅលើស្មាតហ្វូននេះ ដែលនឹងធ្វើអោយតម្រូវការរបស់ស្មាតហ្វូន Galaxy S10 អាចនឹងមានការកើនឡើង។
គួរបញ្ជាក់ថា ការលក់ស្មាតហ្វូន Galaxy S9 គឺល្អជាងស្មាតហ្វូន Galaxy S8 នៅក្នុងឆ្នាំមុននេះ ប៉ុន្តែតួរលេខ ប្រហែលជាទាបជាងស្មាតហ្វូន Galaxy S7 ដែលមានការលក់ដល់ទៅ 48 លានគ្រឿងសម្រាប់ឆ្នាំដំបូងនោះ។ ស្មាតហ្វូន Galaxy S9+ គឺ លក់បានច្រើនជាងដោយសារតែ ស្មាតហ្វុននេះ ប្រើប្រាស់នូវប្រព័ន្ធកាមេរ៉ាភ្លោះនោះ។ ដូច្នេះ អ្នកវិភាគជឿថា ក្រុមហ៊ុន Samsung អាចនឹងនាំយកនូវកាមេរ៉ា 3 គ្រាប់ មកប្រើប្រាស់នៅលើស្មាតហ្វូន Galaxy S10 នាពេលខាងមុខ ។
របាយការណ៍ពី The Investor បានបញ្ជាក់ថា ស្មាតហ្វូន Galaxy S10 នឹងប្រើប្រាស់នូវបច្ចេកវិទ្យា 3D sensing នៅលើកាមេរ៉ារបស់វាផងដែរ។ ស្មាតហ្វូន Samsung Galaxy S10 ត្រូវបានគេរំពឹងថា នឹងបង្ហាញខ្លួននៅក្នុងឆមាសទី 1 នៅក្នុងឆ្នាំ 2019 នេះដូចគ្នាទៅនឹងឆ្នាំដែលក្រុមហ៊ុន Samsung នឹងប្រកាសបង្ហាញស្មាតហ្វូនស៊េរីថ្មីត្រកូល Galaxy S series សម្រាប់ខួបលើកទី 10 នេះ៕