ដូចដែលយើងគ្រប់គ្នាបានដឹងបានស្គាល់បានប្រើប្រាស់រួចហើយជាមួយផលិតផលបច្ចេកវិទ្យាទំនើបនានារបស់ក្រុមហ៊ុន Xioami ដែលជាក្រុមហ៊ុនល្បីឈ្មោះមួយនៅក្នុងប្រទេសចិន។ ក្រុមហ៊ុននេះបានចាក់គ្រឹះកាន់តែរឹងមាំក្នុងវិស័យផលិតផលបច្ចេកវិទ្យាជាមួយនឹងការចេញលក់ផលិតផលទំនើបៗដែលមានតម្លៃធូរថ្លៃមានដូចជាទូរស័ព្ទស្មាតហ្វូន ថេបប្លែត កុំព្យូទ័រ ឧបករណ៍ឆ្លាតវៃ (Smart Devices), Power Bank និងឧបករណ៍ជាច្រើនទៀត។
ហើយថ្មីៗនេះក្រុមចិនមួយនេះបានធ្វើការប្រកាសចេញដងថតសែលហ្វីស៊េរីថ្មីម៉ូដែល Mijia Gimbal ដែលជាជំនាន់ទីបីចំនួនពីរដោយមួយសម្រាប់ប្រើជាមួយទូរស័ព្ទស្មាតហ្វូន និងមួយទៀតសម្រាប់ប្រើជាមួយកាមេរ៉ាប្រភេទ PTZ Camera។ ឧបករណ៍ Mijia Gimbal ជំនាន់ថ្មីនេះត្រូវបានក្រុមហ៊ុនបំពាក់មកជាមួយកំលាំងថាមពលថ្មខ្លាំងរហូតដល់ទៅ 5,000 មីលីអំពែលម៉ោងដែលមានសមត្ថភាពកាន់ថាមពលប្រើប្រាស់បានយូរដល់ទៅ 16 ម៉ោងនៅពេលសាកពេញម្តង ឬកាន់បានតិចជាង 16 ម៉ោងប្រសិនបើយើងប្រើវាសម្រាប់សាកថាមពលទៅអោយថ្មទូរស័ព្ទដែលភ្ជាប់ជាមួយវា។
ហើយរឹតតែពិសេសបំផុតនោះគឺវាត្រូវបានក្រុមហ៊ុនភ្ជាប់មកជាមួយបច្ចេកវិទ្យាទប់លំនឹងកាមេរ៉ាកម្រិត 3-axis stabilization និងមុខងារ auto-tracking ដែលអាចអោយយើងធ្វើការថតវីដេអូ time lapse បានច្បាស់ដោយភ្ជាប់វាជាមួយជើងកាមេរ៉ា (tripod) តាមរយះវ៉ីសខ្នាត 1/4-inch របស់វា។ ដងសែលហ្វីជំនាន់ថ្មីនេះទ្រទ្រង់ជាមួយស្មាតហ្វូនដែលមានទំងន់អតិបរិមា 200 ក្រាម និងមានទទឹងតួរ 86 មីលីម៉ែត្រ។ Gimbal មានទំងន់សរុប 476 ក្រាម និងមានជម្រើសពីរពណ៌គឺពណ៌ស និងពណ៌ប្រផេះ។
ក្រុមហ៊ុន Xiaomi បានចេញដាក់លក់ឧបករណ៍ជំនាន់ថ្មីនេះក្នុងតម្លៃត្រឹមតែ 600 យ៉េន ឬប្រហែល 93 ដុល្លារអាមេរិកប៉ុណ្ណោះ ដែលតម្លៃនេះគឺធូរថ្លៃជាងដងសែលហ្វីស៊េរី Osmo Mobile 2 របស់ DJI ដែលមានថាមពលថ្មត្រឹមតែ 2,600 មីលីអំពែម៉ោងតែមានតម្លៃដល់ទៅ 129 ដុល្លារ ហើយវាក៏ធូរថ្លៃជាងដងសែលហ្វីម៉ាក Zhiyun Smooth 4 ដែលមានតម្លៃ 99 ដុល្លារផងដែរ៕
