Samsung បានប្រើប្រាស់នូវបច្ចេកវិទ្យាដោះសោរទូរស័ព្ទដោយការស្កែនផ្ទៃមុខ (iris scanning biometry) ដំបូងគេនៅលើ Galaxy Note 7 ហើយបច្ចេកវិទ្យានេះក៏ត្រូវបាន Samsung ប្រើនៅលើកំពូលស្មាតហ្វូនស្រឡាយ (Galaxy S និង Note) ក្រោយៗជាបន្តបន្ទាប់ផងដែរ។ មុខងារសំគាល់មុខនេះត្រូវបានក្រុមហ៊ុន Samsung អោយហៅថា “Intelligent Scanner”។ វាមិនមែនជាបច្ចេកវិទ្យា 3D Face Scanning ដូចនៅលើ iPhone X និងបណ្តាស្មាតហ្វូនស៊េរីថ្មីៗដូចជា Oppo Find X និងXiaomi Mi 8 Explore Edition នោះទេ។ បើយោងតាមរបាយការណ៍ពីឧស្សាហកម្មក្នុងប្រទេសកូរ៉េបានបង្ហើបអោយដឹងថា Samsung ទំនងជានឹងដកចេញនូវបច្ចេកវិទ្យា iris scanner សម្រាប់ស្មាតហ្វូនជំនាន់ថ្មី Galaxy S10 របស់ខ្លួន។
Galaxy S10 នឹងក្លាយជាទូរស័ព្ទស្មាតហ្វូនដំបូងគេរបស់ក្រុមហ៊ុនយក្សកូរ៉េខាងត្បូងមួយនេះ ដែលប្រើប្រាស់បច្ចេកវិទ្យស្កែនក្រយ៉ៅដៃបង្កប់ក្រោមកញ្ចក់អេក្រង់ (in-display finger scanner) ហើយពួកគេក៏បានអះអាងទៀតថាក្រោយពី Samsung ព្យាយាមហើយទទូលបរាជ័យក្នុងការបំពាក់បច្ចេកវិទ្យា in-display finger scanner នៅលើ Galaxy Note 9 ដែលត្រៀមបង្ហាញខ្លួននារដូវក្តៅខាងមុខនេះ។ គួរបញ្ជាក់ផងដែរថា Samsung បានព្យាយាមប្រើប្រាស់បច្ចេកវិទ្យាស្កែនក្រយ៉ៅម្រាមដៃក្រោមកញ្ចក់អេក្រង់នេះតាំងពីជំនាន់ Galaxy S8 មកម្ល៉េះប៉ុន្តែមិនទទួលបានជោគជ័យនោះទេ។
បន្ថែមពីនេះ Samsung ត្រូវបានគេរាយការណ៍ថាបាននឹងកំពុងធ្វើការអភិវឌ្ឍទៅលើបច្ចេកទ្យា 3D Face scanning module សម្រាប់ប្រើនៅលើ Galaxy S10 ទៀផង ហើយប្រសិនបើការអភិវឌ្ឍបច្ចេកវិទ្យានេះទទួលបានជោគជ័យនោះវាច្បាស់ណាស់ហើយថា Samsung នឹងលែងប្រើប្រាស់មុខងារបច្ចេកវិទ្យា iris scanner លើកំពូលស្មាតហ្វូនរបស់ខ្លួននៅពេលអនាគតយ៉ាងពិតប្រាកដ។ គេក៏ដឹងទៀតថាបច្ចេកវិទ្យា 3D Face scanning module នេះ Samsung នឹងសហការជាមួយក្រុមហ៊ុន Mantis Vision របស់ប្រទេសអ៊ីស្រាអែលក្នុងការអភិវឌ្ឍវាឡើង។
ប្រភពដដែលបានអោយដឹងបន្ថែមទៀតថា ខណៈពេលនេះក្រុមហ៊ុនផលិតគ្រឿងបន្លាស់ផ្សេងៗសម្រាប់ Galaxy S10 បានទទួលការបញ្ជាទិញរួចហើយលើកលែងតែ iris scanner ទេដែលមិនទាន់ទទួលបានការបញ្ជាទិញ។ ហើយអ្វីដែលកាន់តែធ្វើអោយមានការចាប់អារម្មណ៍បំផុតនោះគឺថា Samsung Galaxy S10 នឹងបង្ហាញវត្តមានឡើងជាមួយជម្រើសអេក្រង់ពីរទំហំផ្សេងគ្នាគឺមួយនឹងមានទំហំ 5.8 អ៊ីញ និងមួយទៀតមានទំហំ 6.3 អ៊ីញដូចទៅនឹងស្មាតហ្វូន Galaxy S9 និង S9+ ដែរក៏ប៉ុន្តែ Samsung នឹងធ្វើអោយកាន់តែមានភាពប្រសើរឡើងនៅលើកញ្ចក់អេក្រង់ S10 ដោយវានឹងមានគែមអេក្រង់កាន់តែស្តើង និងមានទំហំផ្ទៃអេក្រង់បង្ហាញធំជាងជំនាន់ S9 ថែមទៀតផង៕
