នៅថ្ងៃនេះ ក្រុមហ៊ុន Apple បានបង្ហាញអំពីមូលនិធិនៃគម្រោងវិនិយោគដំបូងបំផុតរបស់ខ្លួននៅក្នុងប្រទេសចិន នៅក្នុងការភ្ជាប់ទំនាក់ទំនងនៃអ្នកផ្គត់ផ្គង់ជាច្រើនរបស់ខ្លួន ជាមួយនឹងប្រភពថ្មពលដែលកកើតឡើងវិញនោះ។ កិច្ចការងារនេះ គឺជាផ្នែកមួយនៃការប្តេជ្ញាចិត្តរបស់ក្រុមហ៊ុន Apple ចូលររួមដោះស្រាយទៅលើការផ្លាស់ប្តូរធាតុអាកាស និងបង្កើនទៅលើការប្រើប្រាស់ថាមពលដែលកកើតឡើងវិញ ជាមួយនឹងសង្វាក់ផ្គត់ផ្គង់របស់ខ្លួន។ នៅក្នុងសេចក្តីប្រកាសនេះ បញ្ជាក់ថា មានក្រុមហ៊ុនផ្គត់ផ្គង់ចំនួន 10 និងក្រុមហ៊ុន Apple នឹងធ្វើការវិនិយោគរួមគ្នាជាមួយនឹងទឹកប្រាក់ជិត 300 លានដុល្លារអាមេរិកនៅក្នុងរយៈពេល 4 ឆ្នាំខាងមុខនេះ នៅក្នុងមូលនិធិថាមពលស្អាតរបស់ចិន China Clean Energy Fund។ មូលនិធិនេះ នឹងធ្វើការវិនិយោគ និងអភិវឌ្ឍទៅលើគម្រោងថាមពលស្អាតជាច្រើន ដែលមានការផ្គត់ផ្គង់ថាមពលច្រើនជាង 1 gigawatt សម្រាប់ថាមពលកកើតឡើងវិញនៅក្នុងប្រទេសចិន ហើយវាអាចផ្គង់ផ្គង់បានជាង 1 លានផ្ទះ។
លោក Lisa Jackson ដែលជាអនុប្រធានរបស់ក្រុមហ៊ុន Apple ផ្នែកបរិស្ថាន គោលការណ៍ និងសង្គម បាននិយាយថា “នៅក្នុងក្រុមហ៊ុន Apple យើងមានមោទនៈភាពដែលបានចូលរួមជាមួយនឹងក្រុមហ៊ុនជាច្រើន នៅក្នុងការបោះជំហាន ដើម្បីធ្វើការដោះស្រាយទៅលើបញ្ហាការផ្លាស់ប្តូរធាតុអាកាសពិភពលោក។ យើងពិតជាមានក្តីរីករាយណាស់ដែលអ្នកផ្គត់ផ្គង់របស់យើងចូលរួមនៅក្នុងមូលនិធិនេះ ហើយយើងសង្ឃឹមថា គំរូមួយនេះ អាចធ្វើការជួយអាជីវកម្មជាច្រើនគ្រប់ទំហំក្នុងការទទួលបាននូវលទ្ធផលវិជ្ជមានសម្រាប់ភពផែនដីរបស់យើងនោះ។”
ការផ្លាស់ប្តូរទៅកាន់ការប្រើប្រាស់ថាមពលថ្មស្អាតគឺជារឿងស្មុគស្មាញ។ ក្រុមហ៊ុនតូចៗ ប្រហែលជាមិនមានលទ្ធភាពក្នុងការបង្កើតនូវប្រភពនៃថាម ពលស្អាតនោះទេ។ ប៉ុន្តែមូលនិធិថាមពលស្អាតនៅក្នុងប្រទេសចិន China Clean Energy Fund នឹងផ្តល់អោយអ្នកចូលរួមនូវផលប្រយោជន៍ជាច្រើននៅក្នុងការទិញនូវថាមពល និងលទ្ធភាពក្នុងការជួយទៅលើដំណោះស្រាយនៃថាមពលស្អាតថែមទៀត។ នៅក្នុងមូលនិធិ China Clean Energy Fund នឹងធ្វើការរៀបចំគ្រប់គ្រងដោយក្រុមហ៊ុន DWS Group ដែលជាអ្នកជំនាញទៅលើការវិនិយោគទៅលើមូលនិធិនេះ។
ព័ត៌មាននៅថ្ងៃនេះ គឺកើតឡើងបន្ទាប់ពីការប្រកាសរបស់ក្រុមហ៊ុន Apple នៅក្នុងដើមឆ្នាំនេះក្នុងការបង្កើតនូវថាមពលស្អាតអោយបាន 100% និងការដំណើរការនូវកម្មវិធី Supplier Clean Energy Program របស់ខ្លួននៅក្នុងឆ្នាំ 2015 នោះ។ ចាប់តាំងពីកម្មវិធីនេះ បានបង្កើតមក ក្រុមហ៊ុនដៃគូចំនួន 23 ចាប់ផ្តើមប្រតិបត្តិការរបស់ខ្លួនច្រើនជាង 10 ប្រទេសផ្សេងគ្នា នឹងមានគោលដៅក្នុងការផ្គត់ផ្គង់នូវថាមពលស្អាតសម្រាប់ការផលិតរបស់ក្រុមហ៊ុន Apple អោយបាន 100%។ ក្រុមហ៊ុន Apple និងខ្សែសង្វាក់ផ្គត់ផ្គង់របស់ខ្លួន ធ្វើការបង្កើតនូវថាមពលបានច្រើនជាង 4 gigawatts សម្រាប់ថាមពលស្អាតថ្មីនេះ ទៅកាន់ពិភពលោកនៅក្នុងឆ្នាំ 2020 ។
ក្រុមហ៊ុន Apple ក៏ធ្វើការជាមួយនឹងក្រុមហ៊ុនផ្គត់ផ្គង់ជាច្រើនក្នុងការស្វែងរកនូវវិធីសាស្រ្តថ្មីៗ នៅក្នុងការកាត់បន្ថយនូវការជះចំហាយចេញពីផ្ទះបៃតងផងដែរ។ ថ្មីៗនេះ ក្រុមហ៊ុន បានប្រកាសថា ខ្លួនបានចាប់យកក្រុមហ៊ុនផ្គត់ផ្គង់អាលុយមីញ៉ូម Alcoa Corporation និង Rio Tinto Aluminum នៅក្នុងការប្រើប្រាស់នូវបច្ចេកវិទ្យាថ្មីនេះ ដែលបញ្ឈប់ទៅលើការបញ្ចេញហ្គាសចេញពីផ្ទះបៃតងផងដែរ។
