ក្រុមហ៊ុន Samsung ត្រៀមដាក់លក់ស្មាតហ្វូនដែលអាចបត់បាន Galaxy Fold 5G នៅក្នុងប្រទេសចិន ប៉ុន្តែវាមានឈ្មោះផ្សេង។ ស្មាតហ្វូនដែលអាចបត់បាននេះ នឹងដាក់លក់នៅក្នុងប្រទេសនេះ ជាមួយនឹងឈ្មោះហោថា Samsung W20 5G ហើយវានឹងប្រកាសនៅថ្ងៃស្អែកនេះ ខណៈពេលនេះវីដេអូរបស់ស្មាតហ្វូននេះ ក៏មានការបែកធ្លាយនៅក្នុងវីដេអូមួយផងដែរ។ នៅក្នុងវីដេអូខ្លីមួយនេះ មានការបង្ហាញថា ស្មាតហ្វូននេះអាចធ្វើការបើក និងបត់បាន។ ស្មាតហ្វូននេះ មានពណ៌សយ៉ាងស្រស់ស្អាត។
ស្មាតហ្វូន Samsung W20 នេះ មានអេក្រង់ពីរគឺទំហំ 7.3-inch foldable AMOLED ដែលមានកម្រិតភាពច្បាស់ 2152 x 1536 និងអេក្រង់ទី 2 ដែលមានទំហំ 4.6-inches ជាមួយនឹងកម្រិតភាពច្បាស់ 720 x 1680 នៅខាងក្រៅ។ ក្រុមហ៊ុន Samsung នៃការនាំចេញស្មាតហ្វូននេះ ជាមួយនឹងបន្ទះឈីប Snapdragon 855+ ជាមួយនឹងរ៉េមទំហំ 12GB និងម៉េមូរីក្នុងម៉ាស៊ីនទំហំ 512GB។
ស្មាតហ្វូននេះ មានកាមេរ៉ា 6 គ្រាប់។ សម្រាប់កាមេរ៉ាទី 1 គឺមានទំហំ 10MP នៅលើអេក្រង់ខាងក្រៅរបស់ស្មាតហ្វូននេះ។ អ្នកអាចមើលឃើញកាមេរ៉ា 3 គ្រាប់ទំហំ 12MP+12MP+16MP នៅផ្នែកខាងក្រោយរបស់ស្មាតហ្វូននេះ។ វាក៏មានកាមេរ៉ា 2 គ្រាប់ទៀតគឺទំហំ 10MP+8MP នៅលើអេក្រង់ផ្នែកខាងក្នុងផងដែរ។ ស្មាតហ្វូន W20 នេះ នឹងដំណើរការនូវ One UI ផ្អែកទៅលើប្រព័ន្ធប្រតិបត្តិការ Android 9 Pie និងថាមពលថ្ម 4135mAh ថែមទៀតផង៕