ក្រុមហ៊ុន OPPO បានប្រកាសចេញស្មាតហ្វូនស្រឡាយថ្មី “Reno Series” កាលពីកំឡុងខែឧសភា ហើយស្មាតហ្វូនស្រឡាយថ្មីនេះពិតជាមានទីផ្សាររីក ចម្រើនយ៉ាងឆាប់រហ័សបំផុតគួរជាទីមោទនបំផុត។ ស្មាតហ្វូនស្រឡាយថ្មី Oppo Reno ត្រូវបានក្រុមហ៊ុនធ្វើការផលិតឡើងដោយមានការសម្រិតសម្រាំងយ៉ាងពិសេសជាមួយការរចនារូបរាងបែបប្រណិតសម្រាប់ការប្រើប្រាស់ មានអេក្រង់លាតសន្ធឹងស្រឡះល្អ កំលាំងម៉ាស៊ីនខ្លាំង ហើយជាពិសេសគឺប្រព័ន្ធកាមេរ៉ាថតរូបដ៏ទំនើបដែលមានសមត្ថភាពខ្លាំង និងចេញលក់ក្នុងតម្លៃថោកសមរម្យអាចទទួលយកបាន។
ក្នុងចំណោមបងប្អូនគ្រួសារត្រកូល Oppo Reno ម៉ូដែលមានកំលាំងម៉ាស៊ីនខ្លាំង និងសមត្ថភាពកាមេរ៉ាខ្លាំងជាងគេគឺ Reno 10x Zoom ហើយវាក៏ជាស្មាតហ្វូនដំបូងរបស់ OPPO និងដំបូងគេក្នុងលោកដែលបំពាក់នូវកែវលែនកាមេរ៉ា Periscope ដែលមានលទ្ថភាពខ្ពស់អាចធ្វើការទាញពង្រួមប្លង់ថតអោយមកជិតបានដល់ទៅ 60 តង់ (60x Digital zoom)។ ងាកមកបច្ចុប្បន្នភាពនេះវិញក្រុមហ៊ុន OPPO បាននឹងធ្វើការកែប្រែម៉ូដែល Reno 10x zoom សារជាថ្មីឡើងវិញដើម្បីវាយលុកទីផ្សារម្តងទៀតជាម៉ូដែលពិសេសហៅថា “Oppo Reno 10x zoom Special Edition”។
ស្មាតហ្វូនម៉ូដែលពិសេសនេះក្រុមហ៊ុន OPPO នឹងធ្វើការប្រកាសចេញលក់នៅលើទីផ្សារប្រទេសភីលីពីននៅថ្ងៃទី 30 ចុងខែវិច្ឆិកានេះ ហើយក្រុមហ៊ុននឹងបន្តពាំនាំទៅចែកចាយនៅទីផ្សារក្នុងបណ្តាប្រទេសជាច្រើនទៀតនៅពេលក្រោយ។ ចំនុចពិសេសរបស់ Reno 10x zoom special edition គឺការបំពាក់នូវកំលាំងរ៉េមធំដល់ទៅ 12GB និងអង្គផ្ទុកទិន្នន័យស្រាប់ទំហំ 256GB ដូចនេះវានឹងធ្វើអោយកំលាំងម៉ាស៊ីនរបស់ស្មាតហ្វូន Special Edition មួយនេះរត់បានកាន់តែរលូនបំផុត ហើយរឹតតែពិសេសគឺវានឹងមកជាមួយពណ៌ថ្មីគឺពណ៌ខៀវទឹកសមុទ្រ (Ocean Blue) ដ៏ស្រស់ស្អាតថែមទៀតផង។
ដោយឡែកសម្រាប់គុណសម្បត្តិផ្សេងៗទៀតរបស់វាគឺនៅរក្សាដូចម៉ូដែល Reno 10x zoom ធម្មតាដដែលគឺមានអេក្រង់ Super AMOLED ទំហំ 6.6” ជាមួយប្រព័ន្ធកាមេរ៉ាសែលហ្វីស្តាយងើបឡើងបែបចំហៀង (Shark-fin Pop up Selfie), ប្រព័ន្ធកាមេរ៉ាក្រោយបីគ្រាប់ជាមួយលែន Periscope ទំហំ 13MP, ប្រើបន្ទះឈីប Snapdragon 855 និងដំណើរការដោយ Android 9.0 Pie និងពាក់ស្បែកមុខកម្មវិធីដោយ ColorOS6៕
