យើងបានលឺហើយថា ក្រុមហ៊ុនបច្ចេកវិទ្យាយក្ស Samsung គឺជាដៃគូប្រកួតប្រជែងដ៏ធំរបស់ស្មាតហ្វូន Motorola Razr 2019 ជាពិសេសទៅលើស្មាតហ្វូនដែលមានទម្រង់នៃការបត់ជាប្រភេទ Clamshell ហើយក្រុមហ៊ុនបច្ចេកវិទ្យានេះនៅតែសម្រេចចិត្តក្នុងការប្រើប្រាស់នូវអេក្រង់ដែលមានទំហំ 6.7" ឬ 7.9" ។ សម្រាប់ស្មាតហ្វូនដែលមានអេក្រង់បត់បានទំរង់ជា Clamshell Fold នេះគឺមានតម្លៃលក់ត្រឹមតែ $845 ដែលតម្លៃនេះគឺថោកជាងស្មាតហ្វូន Razr ដែលមានតម្លៃ $1500 ប៉ុន្តែសម្រាប់លក្ខណៈសម្បត្តិមួយចំនួនរបស់ស្មាតហ្វូននេះក៏មានការកាត់បន្ថយផងដែរ។
ទោះជាយ៉ាងណាក៏ដោយ ក្រុមហ៊ុន Motorola មិននៅស្ងៀមមួយកន្លែងនោះទេ ខណៈពេលដែលក្រុមហ៊ុន Samsung កំពុងតែធ្វើការនៅលើស្មាតហ្វូនដែលអាចបត់បានជាច្រើនម៉ូឌែលផ្សេងទៀតសម្រាប់ពេលអនាគត។ សម្រាប់ទម្រង់នៃការឌីស្សាញជាច្រើនម៉ូឌែលរបស់ក្រុមហ៊ុនបច្ចេកវិទ្យា Samsung តាមប្រភពចេញពី LetsGoDigital បញ្ជាក់ថា វាមានការស្នើសុំឯកសារនៅក្នុងការិយាល័យប៉ាតង់អឺរ៉ុប (European Patent Office) ដែលមានភ្ជាប់ជាមួយនឹងទម្រង់នៃការឌីស្សាញជាប្រភេទ Clamshell ដែលស្រដៀងគ្នាទៅនឹងស្មាតហ្វូនស៊េរីថ្មី Razr 2019 របស់ក្រុមហ៊ុនបច្ចេកវិទ្យា Motorola ។
សម្រាប់ការឌីស្សាញទៅលើស្មាតហ្វូននេះវិញនោះ អេក្រង់របស់វាអាចធ្វើការបត់បានជាច្រើនទម្រង់ផ្សេងៗគ្នា ហើយជាពិសេសវាពិតជាមានភាពងាយស្រួលក្នុងការប្រើប្រាស់ដោយដៃម្ខាងបានថែមទៀត។ ក្រុមហ៊ុន Motorola ក៏ធ្លាប់ប្រើប្រាសនូវ Mods នៅលើស្មាតហ្វូនជាច្រើនរបស់ខ្លួនដូចជា Z3 ដែលភ្ជាប់ជាមួយនឹង 5G Moto Mod ដែលធ្វើអោយវាក្លាយជាស្មាតហ្វូនដំបូងបំផុតដែលអាចប្រើប្រាស់ជាមួយនឹងបច្ចេកវិទ្យា 5G network របស់ក្រុមហ៊ុន Verizon បាននៅក្នុងពេលនោះ។
អ្វីដែលគួរអោយកត់សម្គាល់នោះ វានឹងមានស្មាតហ្វូនដែលអាចបត់បានយ៉ាងហោចណាស់ចំនួន 4 ម៉ូឌែលនៅឆ្នាំក្រោយនេះដែលជារបស់ក្រុមហ៊ុន Samsung, Motorola និង LG ហើយក្រុមហ៊ុន Huawei និង Xiaomi ក៏មិននៅស្ងៀមផងដែរក្នុងការបញ្ចេញនូវស្មាតហ្វូនដែលអាចបត់បានរបស់ខ្លួនជាច្រើនម៉ូឌែលនៅឆ្នាំក្រោយនេះ។ សម្រាប់តម្លៃរបស់វាអាចនឹងមានការធ្លាក់ចុះផងដែរ៕